ខ្សែបម្រើស្លាប សុក សំណាង អាចវិលត្រលប់មកលើទីលានជួយក្រុមព្រះខ័នរាជស្វាយរៀង សមាជិកពានរង្វាន់លីគកំពូលកម្ពុជា (Metfone Cambodian League) វិញបានហើយក្រោយសម្រាកប្រមាណវះកាត់និងព្យាបាលជាង៥ខែដោយសារបញ្ហារបួសឆ្អឹងស្មងជើងខាងស្តាំដែលជារបួសចាស់ ដែលកើតលើរូបគេកាលពីឆ្នាំ២០១៨ កន្លងទៅ។
យោងតាមវិបសាយផ្លូវការរបស់ក្លិបព្រះខ័នរាជស្វាយរៀង ដែលមានមូលដ្ឋាននៅខេត្តស្វាយរៀង បានបញ្ជាក់ថា កីឡាកររូបនេះបានបង្ហាញខ្លួនក្នុងជំនួបយកឈ្នះក្លិប អគ្គស្នងការដ្ឋាននគរបាលជាតិ ដោយលទ្ធផល ៧ទល់១ កាលពីថ្ងៃ ២០ កុម្ភៈ កន្លងទៅ ស្របពេលដែលការបញ្ជាក់របស់ពេទ្យក្លិបផ្ទាល់ថាកីឡាករវ័យ២៤ឆ្នាំរូបនេះ ត្រូវការពេលសម្រាកព្យាបាលបន្ថែមដោយសារតែទើបតែជាបានត្រឹមតែ៨០ ភាគរយ បូករួមទាំងការហ្វឹកហាត់កម្លាំងឲ្យដូចដើមវិញ។
សូមរំលឹកថា បញ្ហារបួសនេះតម្រូវឲ្យកីឡាករ សុក សំណាង ត្រូវចេញទៅពិនិត្យតាមដាន ព្យាបាលនិងវៈកាត់របួសរបស់ខ្លួននៅប្រទេសវៀតណាម ដែលចាយពេលរហូតដល់ទៅ៥ខែ ហើយអវត្តមានរបស់កីឡាកររូបនេះលើទីលានធ្វើឲ្យគេបាត់បង់ឱកាសក្នុងក្រុមជម្រើសជាតិកម្ពុជាផង បាត់ឱកាសក្នុងការជួយក្លិបព្រះខ័នរាជស្វាយរៀង ក្នុងពានរង្វាន់លីគកំពូលកម្ពុជានិងពានរង្វាន់សម្តេចតេជោ ហ៊ុន សែន កាលពីឆ្នាំ២០១៨ផង។
គេចាំបានថាកីឡាករ សុក សំណាង ត្រូវបានលោក សំ វ៉ាន់ដេត បានដាក់ចូលបញ្ជីក្រុមធំរបស់ក្លិបព្រះខ័នរាជស្វាយរៀង នៅឆ្នាំ២០១០ ក្រោយបង្ហាញខ្លួនបានល្អនៅក្នុងក្រុមយុវជនថ្នាល ហើយកីឡាកររូបនេះធ្លាប់ជាផ្នែកមួយជួយឲ្យក្រុមឈ្នះបានពានរង្វាន់លីគកំពូលកម្ពុជា នៅឆ្នាំ២០១៣ និងពានរង្វាន់សម្តេចតេជោ ហ៊ុន សែន នៅឆ្នាំ២០១១,២០១២,២០១៥ និង២០១៧ នេះផងដែរ។ កីឡាករវ័យ២២ឆ្នាំរូបនេះក៏ធ្លាប់កោះហៅឲ្យចូលរួមក្នុងក្រុមជម្រើសជាតិកម្ពុជា ផងដែរទាំងឈុតយុវជននិងឈុតធំ៕
Source: Kampuchea Thmey Daily
0 Comments