ប៉ូលិសហូឡង់កាលពីថ្ងៃចន្ទបានចាប់ខ្លួនជនសង្ស័យដើមកំណើតទួរគីម្នាក់ពាក់ព័ន្ធការបាញ់ប្រហារលើរថភ្លើងដឹកមនុស្សមួយគ្រឿងក្នុងទីក្រុង Utrecht ដែលបានបណ្តាលឲ្យមនុស្ស៣នាក់ស្លាប់នៅក្នុងអ្វីដែលក្រុមមន្ត្រីនិយាយថាគឺជាការវាយប្រហារភេរវកម្ម។
ប៉ូលិសបានបើកការតាមប្រមាញ់បុរសម្នាក់ឈ្មោះ Gokmen Tanis អាយុ៣៧ឆ្នាំដោយបញ្ចេញរូបភាពនៃជនសង្ស័យជាខ្មាន់កាំភ្លើងនិងព្រមានដល់សាធារណជនកុំឲ្យទៅជិតគាត់បន្ទាប់ពីការវាយប្រហារដែលក្នុងនោះក៏មានមនុស្សប្រាំនាក់ផ្សេងទៀតរងរបួសផងដែរ។
វិហារឥស្លាមនិងសាលារៀនត្រូវបិទនៅទូទាំងទីក្រុងធំបំផុតលំដាប់ទីបួនរបស់ប្រទេសហូឡង់មួយនេះបន្ទាប់ពីការបង្ហូរឈាមមុនពេលមន្ត្រីប្រដាប់អាវុធជាច្រើននាក់បានឡោមព័ទ្ធអគារមួយហើយបានចាប់ខ្លួនគាត់។
អាជ្ញាធរហូឡង់បាននិយាយថា ពួកគេនៅតែកំពុងស៊ើបអង្កេតលើមូលហេតុដែលជំរុញឲ្យមានការវាយប្រហារនេះ។
លោក Rob van Bree ស្នងការប៉ូលិសក្រុង Utrecht បានប្រាប់សន្និសីទសារព័ត៌មានមួយបន្ទាប់ពីប្រគល់ក្រដាសមួយសន្លឹកជាមួយព័ត៌មានអំពីការចាប់ខ្លួននេះថា “យើងទើបតែបានដឹងថា ជនសង្ស័យដែលយើងកំពុងតាមរកនោះគឺត្រូវបានចាប់ខ្លួនហើយ”។
ស្របពេលជាមួយគ្នានោះដែរ អភិបាលក្រុងលោក Jan van Zanen បានប្រាប់សន្និសីទព័ត៌មានដដែលនេះថា វាគឺជាថ្ងៃដ៏ខ្មៅងងឹតសម្រាប់ទីក្រុង Utrecht។
រឿងហេតុនេះបានចាប់ផ្តើមនៅពេលដែលស្នូរកាំភ្លើងបានផ្ទុះឡើងនៅជិតរថភ្លើងដឹកមនុស្សក្បែរទីលាន24 Oktoberplein ដោយបណ្តាលឲ្យមនុស្សរត់គេចខ្លួនចេញពីរថភ្លើងហើយបង្កឲ្យមានការឆ្លើយតបដ៏ធំមួយរបស់ប៉ូលិស។
បន្ទាប់មកប៉ូលីសបានបើកការប្រមាញ់ដ៏ធំមួយក្នុងអំឡុងពេលដែលខ្មាន់កាំភ្លើងសង្ស័យត្រូវបានគេជឿថាបានប្លន់រថយន្តម៉ាក Renault Clio មួយគ្រឿងមុនពេលត្រូវបានចាប់ខ្លួនប្រហែលប្រាំពីរម៉ោងក្រោយមកក្នុងចម្ងាយប្រហែលបីគីឡូម៉ែត្រពីទីតាំងវាយប្រហារ។
គួរបញ្ជាក់ថា កងកម្លាំងសន្តិសុខមានការប្រុងប្រយ័ត្នខ្ពស់នៅតាមព្រលានយន្តហោះនិងអគាររដ្ឋាភិបាលដទៃទៀតបន្ទាប់ពីការវាយប្រហារនេះដែលបានកើតឡើងត្រឹមតែប៉ុន្មានថ្ងៃប៉ុណ្ណោះបន្ទាប់ពីមនុស្សចំនួន៥០នាក់ត្រូវបានសម្លាប់នៅវិហារឥស្លាមក្នុងប្រទេសនូវែលហ្សេឡង់៕ AFP
Source: Kampuchea Thmey Daily
0 Comments