ភ្នំពេញ ៖ បុរសម្នាក់ ត្រូវបានសាក្សីអះអាងថា ឃើញគាត់ បានបើកបរម៉ូតូយ៉ាងលឿន រួចទៅបុកគូទ រថយន្តគេពីក្រោយ បណ្តាលឲ្យបាក់.កស្លាប់ខ្លួនឯង។
ហេតុការណ៍នេះបានកើតឡើង កាលពីវេលាម៉ោង២៣និង១៥នាទីយប់ ថ្ងៃទី២១មីនា ស្ថិតនៅតាមបណ្តោយផ្លូវជាតិលេខ១ ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។
ជនរងគ្រោះ ដែលជួបហេតុការណ៍គ្រោះថ្នាក់ចរាចរណ៍រហូតបាត់បង់ជីវិតនោះ ត្រូវបានគេស្គាល់ឈ្មោះ ឆែម ប៊ុនលី ភេទប្រុស អាយុ៣៩ឆ្នាំ មុខរបរកម្មករសំណង់ រស់នៅភូមិចុងព្រែក សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។
យោងតាមរបាយការណ៍របស់នគរបាលខណ្ឌច្បារអំពៅបានឲ្យដឹងថា នៅមុនពេលកើតហេតុ ជនរងគ្រោះបានបើកបរម៉ូតូម៉ាកសង់ ពណ៌ខ្មៅ ពាក់ស្លាកលេខភ្នំពេញ1FE 90 68 ដោយធ្វើដំណើរតាមបណ្ដោយផ្លូវជាតិលេខ១ ទិសដៅ ពីកើត ទៅលិច។ លុះទៅដល់ចំណុចភូមិជ្រោយអំពិល សង្កាត់ក្បាលកោះ បានទៅបុកគូទរថយន្តគេពីក្រោយបាក់.ក ស្លាប់នៅនឹងកន្លែង។ ដោយឡែក ម៉ូតូ ត្រូវខូចខាតផ្នែកខាងមុខខ្ទេចតែម្តង។
តាមរបាយការណ៍បញ្ជាក់ថា រថយន្តដែលម៉ូតូជនរងគ្រោះបុកពីក្រោយនោះ គឺមិនស្គាល់ភិនភាគ និងស្លាកលេខឡើយ ព្រោះបន្ទាប់ពីមានហេតុការណ៍នេះកើតឡើង បានបន្តដំណើរទៅមុខបាត់។
បច្ចុប្បន្ន សព ត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី ដោយសារទីតាំងកើតហេតុស្ថិតនៅក្បែរផ្ទះជនរងគ្រោះនោះដែរ៕
Source: Kampuchea Thmey Daily
0 Comments