ភ្នំពេញ ៖ លោក សេង លាង ចៅក្រមសាលាដំបូងរាជធានីភ្នំពេញ ដែលទទួលចាត់ការសំណុំរឿងគ្រឿងញៀននៅក្លឹបកម្សាន្តរ៉ុក នៅពេញមួយថ្ងៃទី២២ ខែមីនា ឆ្នាំ២០១៩នេះ បានបង្គាប់ឲ្យអនុរក្សពន្ធនាគារព្រៃ.ស បញ្ជូនជនជាប់ចោទគ្រឿងញៀនចំនួន១៧នាក់ នៅក្លឹបកម្សាន្តរ៉ុក មកតុលាការដើម្បីសាកសួរបន្តបន្ថែម ជុំវិញបទល្មើសគ្រឿងញៀន ដែលជានីតិវិធីបើកការស៊ើបសួរ។
ជាមួយគ្នានេះ បើតាមប្រភពព័ត៌មានពីសាលាដំបូងរាជធានីភ្នំពេញបានបញ្ជាក់ឲ្យដឹងថា ចៅក្រមតុលាការបង្គាប់ឲ្យសមត្ថកិច្ចសាធារណៈស្វែងរក និងចាប់ខ្លួនបុគ្គល២នាក់ ដែលជាប់ពាក់ព័ន្ធនឹងបទល្មើសគ្រឿងញៀននៅរ៉ុកនេះផងដែរ ហើយបើតាមការបញ្ជាក់របស់ សម្ដេចក្រឡាហោម ស ខេង ជនដែលត្រូវតាមចាប់ខ្លួននោះ គឺជាមន្ត្រីនគរបាលទៀតផង។
ប្រភពព័ត៌មានច្បាស់ការពីសាលាដំបូងបានឲ្យដឹងថា ព្រះរាជអាជ្ញា និងចៅក្រមស៊ើបសួរបានសម្រេចចោទប្រកាន់ ឧកញ៉ា គិត ធៀង ពីបទ ផ្ដល់ទីតាំង ចាត់ចែង សម្រួលឲ្យមានការប្រើប្រាស់ដោយខុសច្បាប់នូវសារជាតិញៀន និងបទសមគំនិត តាមមាត្រា៤៤ ចំណុច នៃច្បាប់ ស្ដីពីការត្រួតពិនិត្យគ្រឿងញៀន ដែលប្រព្រឹត្តនៅមណ្ឌលកម្សាន្ត ROCK ស្ថិតនៅតាមបណ្ដោយមហាវិថីព្រះមុនីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី២៣ ខែកុម្ភៈ ឆ្នាំ២០១៩ តាមមាត្រា៤២ និង៤៤ នៃច្បាប់ ស្ដីពីការត្រួតពិនិត្យគ្រឿងញៀន និងមាត្រា២៩ នៃក្រមព្រហ្មទណ្ឌ។
ចំណុច២ នៃមាត្រា៤៤ ច្បាប់ស្ដីពីការត្រួតពិនិត្យគ្រឿងញៀន បានកំណត់ឲ្យផ្ដន្ទាទោសជនជាប់ចោទដាក់ពន្ធនាគារពី៥ឆ្នាំ ទៅ១០ឆ្នាំ និងពិន័យជាប្រាក់ពី១០លានរៀល ទៅ២០លានរៀល។
សូមរំលឹកថា ឧកញ៉ា គិត ធៀង ត្រូវបានសមត្ថកិច្ចចាប់ខ្លួនតាមដីកាតុលាការ កាលពីថ្ងៃទី១១ ខែមីនា ឆ្នាំ២០១៩ ក្រោយពេល សម្ដេចតេជោ ហ៊ុន សែន រំលឹកពីបទល្មើសគ្រឿងញៀនដ៏គួរឲ្យស្អប់ខ្ពើម នៅជាប់របងសាលារៀន ដល់ទៅ២កន្លែង ក្នុងសង្កាត់ទន្លេបាសាក់ ខណ្ឌចម្ការមន។
នៅព្រឹក ថ្ងៃទី១២មិនា សមត្ថកិច្ចបាននាំខ្លួនជនសង្ស័យមកប្រគល់ឲ្យតុលាការសាកសួរពេញមួយថ្ងៃ ដែលសំណុំរឿងនេះ ត្រូវបាន សម្ដេចនាយករដ្ឋមន្ត្រី រំលឹកម្ដងហើយ ម្ដងទៀត តុលាការ ត្រូវតែធ្វើឲ្យបានម៉ត់ចត់ ត្រឹមត្រូវ និងម៉ឺងម៉ាត់ដល់ទីជម្រៅ មិនលើកលែងដាច់ខាត៕
Source: Kampuchea Thmey Daily
0 Comments