ពិធីបុណ្យ​ងូត​ភក់​ប្រពៃណី​របស់​អ្នក​កោះ​បាលី​ បាន​ទាក់ទាញ​ហ្វូងមនុស្ស

មួយថ្ងៃ​បន្ទាប់ពី​កោះ​បាលី​របស់​ឥណ្ឌូនេស៊ី​បាន​ស្ងប់ស្ងាត់​សម្រាប់​ពិធីបុណ្យ “Day of Silence” ប្រចាំឆ្នាំ​, មនុស្ស​រាប់រយ​នាក់​បាន​ចូលរួម​ពិធីបុណ្យ​ងូត​ភក់​តាមបែប​សាសនា​ដែល​ត្រូវបាន​ប្រារព្ធ​ធ្វើឡើង​វិញ​នាពេល​ថ្មីៗ​នេះ​បន្ទាប់ពី​ខកខាន​អស់​រយៈពេល​៦០​ឆ្នាំ។

ការ​ងូត​ភក់​ដែល​ត្រូវបាន​គេ​ស្គាល់​ក្នុងស្រុក​ថា Mebuug-buugan គឺ​ត្រូវបាន​គេ​ជឿថា​នឹង​បន្សុទ្ធ​និង​លុបបំបាត់​សំណាងអាក្រក់​និង​ថាមពល​អវិជ្ជមាន។

បុរស ស្ត្រី​និង​កុមារ​ដែល​ស្លៀក​សារុង​និង​ឈ្នួត​ក្បាល​ប្រពៃណី​បាន​ប្រមូល​ភក់​ពី​ព្រៃកោងកាង​ក្នុងភូមិ Kedonganan នៅ​ខាងក្រៅ​ក្រុង Denpasar កាលពី​ថ្ងៃ​សុក្រ​ហើយ​បាន​ប៉ាត​ខ្លួនឯង​ដែលជា​ផ្នែក​មួយ​នៃ​ពិធី​បន្សុទ្ធ។

វា​បាន​កើតឡើង​មួយថ្ងៃ​បន្ទាប់ពី​ពិធីបុណ្យ​របស់​កោះ​បាលី​ឈ្មោះ Nyepi ដែល​អ្នក​កាន់សាសនា​ហិណ្ឌូ​និង​អ្នកទេសចរ​នៅលើ​កោះ​នេះ​ត្រូវបាន​គេ​រំពឹងថា​នឹង​ស្នាក់នៅ​ក្នុងផ្ទះ​និង​ឆ្លុះបញ្ចាំង​ខ្លួនឯង​ខណៈដែល​ជើងហោះហើរ ភ្លើង​និង​អ៊ី​ន​ធឺ​ណេ​ត​ត្រូវបាន​បញ្ឈប់​ទាំងអស់។

កាលពី​អតីតកាល អ្នក​ចូលរួមបាន​អាក្រាតកាយ​ក្នុង​ពិធីបុណ្យ​ភក់​នេះ​ប៉ុន្តែ​នៅ​ពាក់កណ្តាល​សតវត្សរ៍​ទី​២០​អ្នកស្រុក​មិនសូវ​ពេញចិត្ត​ជាមួយ​ភាព​អាក្រាតកាយ​នៅ​ទីសាធារណៈ​នោះទេ។

ពិធីបុណ្យ​នេះ​ត្រូវបាន​ផ្អាក​អស់​រយៈពេល​៦​ទសវត្ស​មកហើយ​រហូត​ដល់ពេល​ដែល​វា​បានចាប់ផ្តើម​ឡើងវិញ​កាលពី​៣​ឆ្នាំមុន​ដោយសារ​ការយល់​ដឹងថា គំនិត​នៃ​ពិធីបុណ្យ​នេះ​នឹង​ផ្លាស់ប្តូរ​ដូច្នេះ​អ្នកចូលរួម​ត្រូវបាន​អនុញ្ញាត​ឲ្យ​ស្លៀកពាក់។

អ្នកភូមិ​គ្រប់​វ័យ​បាន​ប៉ាត​ភក់​លើ​នរណាម្នាក់​ដែលជា​ញាតិសន្តាន​បន្ទាប់ពី​ការ​អធិស្ឋាន​សុំ​សុវត្ថិភាព​និង​សំណាងល្អ​។ បន្ទាប់ពី​ពិធីបុណ្យ​ងូត​ភក់ ពួកគេ​បានធ្វើ​ដំណើរ​ទៅ​ឆ្នេរ​ដែល​នៅ​ជិត​បំផុត​ដើម្បី​លាងជម្រះ​ភាពកខ្វក់​និង​កម្ចាត់​វិញ្ញាណ​អាក្រក់។

គួរ​បញ្ជាក់ថា ពិធីបុណ្យ​នេះ​មាន​ប្រជាប្រិយភាព​ចាប់តាំងពី​ការវិល​ត្រឡប់មកវិញ​ហើយ​អ្នកទេសចរ​រាប់សិប​នាក់​បាន​មើល​នៅ​ខាងក្រៅ​និង​ថតរូប​ដើម្បី​ចាប់យក​រូបភាព​ដែល​បាត់បង់​អស់​រយៈពេល​ជាច្រើន​ទសវត្ស​មកហើយ៕ AFP

​

Source: Kampuchea Thmey Daily