លោក ហ៊ុន ម៉ាណែត ៖ ពលរដ្ឋ៨៣ភាគរយ បានចេញទៅបោះឆ្នោត ប៉ុន្តែក្រុមប្រឆាំងមិនបានទទួលយកនូវឆន្ទៈរបស់រាស្ត្រ បែរជាព្យាយាមញុះញង់គ្រប់រូបភាព

ភ្នំពេញ ៖ លោកឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរងនៅកងយោធពលខេមរភូមិន្ទ មេបញ្ជាការកងទ័ពជើងគោក ថ្លែងបែបនេះនៅក្នុងពិធីផ្សព្វផ្សាយបូកសរុបលទ្ធផលការងារយោធា ឆ្នាំ២០១៨ និងផែនការសកម្មភាពការងារ ឆ្នាំ២០១៩ នៃទីបញ្ជាការយោធភូមិភាគពិសេស។

មានប្រសាសន៍ទៅកាន់អ្នកចូលរួម លោកឧត្ដមសេនីយ៍ឯក ហ៊ុន ម៉ាណែត បាននាំមកនូវការផ្ដាំផ្ញើសាកសួរសុខទុក្ខពីសំណាក់ សម្ដេចតេជោ នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ជូនដល់នាយទាហាន នាយទាហានរង ទាំងអស់ក្នុងយោធភូមិភាគពិសេស និងកោតសរសើរចំពោះយោធភូមិភាពពិសេស ដែលបានបំពេញភារកិច្ចការពារសុខសន្តិភាពជូនប្រជាជន ទប់ស្កាត់ការបង្កអសន្តិសុខ ទប់ស្កាត់បដិវត្តពណ៌ ដោយលោកបានបញ្ជាក់ថា យោធភូមិភាពពិសេស ជាអង្គភាពដ៏សំខាន់មួយក្នុងកិច្ចការពារសុខសុវត្ថិភាពជុំវិញរាជធានីភ្នំពេញ។

លោកបន្តថា យើងបានបញ្ចប់សង្គ្រាម ដែលបានកើតឡើងរយៈពេល៥០០ឆ្នាំ ក្រោមការដឹកនាំរបស់សម្ដេចតេជោ តែក្រុមអ្នកចង់បំផ្លាញសន្តិភាព នៅតែចិញ្ចឹមចិត្តបំផ្លាញសន្តិភាព ដែលយើងខិតខំរកមកដោយលំបាកនេះ។ គោលនយោបាយរបស់រាជរដ្ឋាភិបាលរក្សាមិត្តភាព រក្សាកិច្ចសហប្រតិបត្តិការគ្រប់ភាគី មិនប្រកាន់ថា ប្រទេសណាមួយឡើយ។

តាមលោកឧត្ដមសេនីយ៍ឯក ហ៊ុន ម៉ាណែត ប្រជាពលរដ្ឋកម្ពុជា៨៣ ភាគរយ បានចេញទៅបោះឆ្នោត ដែលនេះបានបង្ហាញថា ប្រជាជនកម្ពុជា ចង់បានសេចក្តីសុខ ប៉ុន្តែក្រុមប្រឆាំងមួយចំនួនមិនបានទទួលយកនូវឆន្ទរបស់រាស្ត្រ និងព្យាយាមគ្រប់រូបភាព ដើម្បីបំផ្លាញ ញុះញង់គ្រប់រូបភាពក្នុងគោលបំណងរុញប្រទេសធ្លាក់ក្នុងបដិវត្តពណ៌។ កន្លងទៅ ក៏មានការអូសទាញកម្លាំងប្រដាបអាវុធមិនឲ្យស្ដាប់រដ្ឋាភិបាល ប៉ុន្តែមិនអាចធ្វើទៅបានដោយសារ តែកងទ័ពបានយល់ច្បាស់ និងជឿជាក់លើរាជរដ្ឋាភិបាល និងបានការពារដាច់ខាត រដ្ឋធម្មនុញ្ញ ការពាររាជរដ្ឋាភិបាលស្របច្បាប់។

ជាមួយនឹងការលើកឡើងខាងលើនេះ លោកឧត្ដមសេនីយ៍ឯក ហ៊ុន ម៉ាណែត បានផ្តល់អនុសាសន៍ដល់អង្គភាព ត្រូវពង្រឹងការងារដឹកនាំបញ្ជា ធ្វើផែនការធានា ផែនការហ្វឹកហ្វឺន លើកកម្ពស់សមត្ថភាពកងទ័ព និងបង្កើតយន្តការការងារឲ្យមាននិរន្តរភាព និងប្រសិទ្ធភាព ពង្រឹងគុណភាពយោធាចារ្យ ដើម្បីបណ្ដុះបណ្ដាល ពង្រឹងគុណភាពទ័ព រៀបចំការងារអប់រំចិត្តសាស្ត្រ ក្តាប់សតិអារម្មណ៍កងទ័ព យកចិត្តទុកដាក់ថែទាំយោធបករណ៍ឲ្យបានល្អ បង្កើតកិច្ចសហប្រតិបត្តិការល្អរវាងភាគីមិត្ត រក្សាព្រំដែនសន្តិភាពចូលរួមក្នុងការរុករកអដ្ឋិធាតុជាមួយភាគីមិត្ត។ ចូលរួមការងារមនុស្សធម៌ ការងារសង្គម ជួយដល់មូលដ្ឋាន។

លោកឧត្ដមសេនីយ៍ឯក ហ៊ុន ម៉ាណែត បានបញ្ជាក់ដែរថា ការងារសមាគមអតីតយុទ្ធជន ដែលកន្លងទៅថ្មីៗនេះ លោកបានប្រគល់ថវិកាជូនមូលនិធិ សមាគមអតីតយុទ្ធជនកម្ពុជា ដែលបានមកពីការរៀបចំព្រឹត្តិការណ៍ប្រកួតកីឡាយោធាឆ្នាំ២០១៨កន្លងទៅ ក្នុងនោះត្រូវបានបែងចែកទៅទូទាំង២៥ រាជធានីខេត្ត ក្នុងមួយខេត្ត២០លានរៀល ប្រើប្រាស់លើការងារសាងសង់ផ្ទះ និងចូលបុណ្យសពអតីតយុទ្ធជនទាំងនេះ គឺសំដៅទៅលើការយកចិត្តទុកដាក់លើកិត្តិយស ជីវភាពរស់នៅ និងជាការដឹងគុណជូនដល់អតីតយុទ្ធជនដែលខិតខំលះបង់ពលីកម្ម ដើម្បីជាតិមានសុខសន្តិភាព។

សូមបញ្ជាក់ថា នាថ្ងៃព្រហស្បតិ៍ ២កើត ខែផល្គុន ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី៧ ខែមីនា ឆ្នាំ២០១៩ នៅទីបញ្ជាការយោធភូមិភាគពិសេស កងទ័ពជើងគោក បានប្រារព្ធពិធីផ្សព្វផ្សាយបូកសរុបលទ្ធផលការងារយោធា ឆ្នាំ២០១៨ និងផែនការសកម្មភាពការងារឆ្នាំ២០១៩ ក្រោមវត្តមានលោកឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរងនៅកងយោធពលខេមរភូមិន្ទ មេបញ្ជាការកងទ័ពជើងគោក និង ឯកឧត្ដម ព្រហ្ម ឌិន រដ្ឋលេខាធិការ ក្រសួងការពារជាតិ ព្រមទាំងបាននាំយកនូវអំណោយជាគ្រឿងឧបភោគបរិភោគ បរិក្ខារប្រើប្រាស់មួយចំនួន និងថវិកា១០លានរៀលជូនអង្គភាពយោធភូមិភាគពិសេសផងដែរ៕