ក្រុមអ្នកប្រយុទ្ធដែលគាំទ្រដោយសហរដ្ឋអាមេរិកបានសង្ឃឹមទុកជាច្រើនសប្ដាហ៍មកហើយថា ថ្ងៃចុងក្រោយបានមកដល់ហើយសម្រាប់រដ្ឋ Caliphate របស់ក្រុមរដ្ឋឥស្លាមប៉ុន្តែទឹកដីដ៏តូចចុងក្រោយរបស់ខ្លួនមើលទៅហាក់ដូចជាមិនទំនងជានៅទទេសោះ។
ស្ត្រី កុមារនិងបុរសរាប់ពាន់នាក់បានសម្រុកចេញពីមូលដ្ឋាននៅក្នុងភូមិ Baghouz របស់ប្រទេសស៊ីរីចាប់តាំងពីខែធ្នូមកហើយការចាកចេញនៅតែបន្ត។
ចំនួននេះបានធ្វើឲ្យកងកម្លាំងដែលដឹកនាំដោយពួកឃើដមានការភ្ញាក់ផ្អើល។ លោក Adnan Afrin អ្នកនាំពាក្យកងកម្លាំងប្រជាធិបតេយ្យស៊ីរី (SDF) បាននិយាយកាលពីថ្ងៃព្រហស្បតិ៍ថា “នៅពេលយើងចាប់ផ្តើមប្រតិបត្តិការ យើងដឹងថានឹងមានជនស៊ីវិលប៉ុន្តែមិនមានចំនួនច្រើនដូចនេះទេ”។
ក្នុងរយៈពេលប៉ុន្មានថ្ងៃថ្មីៗនេះ បុរសនិងស្ត្រីរាប់ពាន់នាក់រួមទាំងអ្នកដែលធ្លាប់បានចូលរួមជាមួយក្រុម IS មកពីទូទាំងពិភពលោកផងដែរនោះគឺបានចាកចេញពីមូលដ្ឋានរបស់ក្រុម IS ។
បញ្ហានេះបាននាំឲ្យមានការសន្មតថា ក្រុមគ្រួសារមួយចំនួននៅតែលាក់ខ្លួននៅក្នុងភូមិ Baghouz ហើយអ្នកដែលបដិសេធចាកចេញឬចុះចាញ់បានសម្រេចចិត្តស៊ូស្លាប់នៅទីនោះ។
មន្ត្រីមួយរូបរបស់ SDF បាននិយាយថា “ពួកគេមកពីក្រោមដី ពួកគេមិនដែលបញ្ចប់ទេ”។
គណៈកម្មាធិការជួយសង្គ្រោះអន្ដរជាតិ (IRC) កាលពីថ្ងៃសុក្របាននិយាយថា មនុស្សចំនួន១២,០០០នាក់មកពីភូមិ Baghouz បានមកដល់ជំរំមួយសម្រាប់អ្នកមិនមែនជាយុទ្ធជននៅភាគឦសានប្រទេសស៊ីរីក្នុងរយៈពេល៤៨ម៉ោងចុងក្រោយរួមទាំងមនុស្សប្រហែល៦,០០០នាក់កាលពីថ្ងៃព្រហស្បតិ៍ផងដែរ។
យោងតាម IRC បានឲ្យដឹងថា ជនស៊ីវិលជាង៥៥,០០០នាក់បានមកដល់ជំរំ Al-Hol ដែលគ្រប់គ្រងដោយពួកឃើដចាប់តាំងពីខែធ្នូមក។
អង្គការនេះបាននិយាយថា “IRC និងភ្នាក់ងារដទៃទៀតកំពុងធ្វើគ្រប់បែបយ៉ាងដែលពួកគេអាចធ្វើបានដើម្បីជួយដល់អ្នកមកដល់ថ្មីប៉ុន្តែជំរំ Al-Hol នៅពេលនេះគឺស្ថិតនៅចំណុចបែកបាក់។ គ្មាននរណាម្នាក់អាចទាយបានទេថាមានស្ត្រីនិងកុមារយ៉ាងច្រើនបែបនេះដែលនៅតែកំពុងរស់នៅក្នុងភូមិ Baghouz”៕ AFP
Source: Kampuchea Thmey Daily
0 Comments