អ្នកប្រដាល់ជើងខ្លាំងកម្ពុជា២រូប គឺពុទ្ធ ឆាយរិទ្ធី អ្នកប្រដាល់ក្លិបពុទ្ធសេរីវង្សកីឡា និងមាជ សុខរ៉ា អ្នកប្រដាល់ក្លិបថ្មគោលពោធិសែនជ័យ នឹងត្រូវជួបប្រកួតជាមួយអ្នកប្រដាល់ថៃ នាយប់ថ្ងៃអាទិត្យ ទី២៤ ខែមីនា ឆ្នាំ២០១៩នេះ នៅលើសង្វៀនបាយ័នស្ទឹងមានជ័យ។
ពុទ្ធ ឆាយរិទ្ធី ត្រូវជួបប្រកួតជាមួយអ្នកប្រដាល់ថៃឈ្មោះផេត ឆ័ត្រឆ័យ សរ.ប៊ុនយៀម (Phetchchharchai Sor.Bunyeam) ក្នុងកម្មវិធីប្រដាល់ខារ៉ាបាវ នៅសង្វៀនបាយ័នស្ទឹងមានជ័យ។ ឆាយរិទ្ធី ជួប ផេតឆ័ត្រឆ័យក្នុងទម្ងន់៦៧គីឡូក្រាម។ សម្រាប់ជំនួបរវាងពុទ្ធ ឆាយរិទ្ធី និង ផេតឆ័ត្រឆ័យនេះ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក។
ផេតឆ័ត្រឆ័យ បើធៀបជាមួយពុទ្ធ ឆាយរិទ្ធី នោះ ក៏ប្រហែលជាពុំអាចឈ្នះពុទ្ធ ឆាយរិទ្ធី បានដែរ ដោយសារអ្នកប្រដាល់ថៃរូបនេះ មានបទពិសោធន៍មិនជាល្អនិងខ្លាំងជាងឆាយរិទ្ធីនោះឡើយ។
ពុទ្ធ ឆាយរិទ្ធី ឥឡូវនេះគេមានការវិវត្តន៍ខាងក្បាច់គុនច្រើន គួបផ្សំនឹងការខំប្រឹងហ្វឹកហាត់ទៀត ឃើញថាគេខ្លាំង និងល្អជាងមុន។ ឆាយរិទ្ធី គេមានកំណត់ត្រាប្រកួត១១៩លើក ឈ្នះ៩២លើក ចាញ់២៥លើក និងស្មើ០២លើក ខណៈដែលផេតឆ័ត្រឆ័យ គេមានប្រវត្តិប្រកួតចំនួន៦៩លើក ឈ្នះ៥៩លើក និង ចាញ់១០លើក មិនដែលស្មើ។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។ ប៉ុន្តែយ៉ាងណា ពុទ្ធ ឆាយរិទ្ធី បានអះអាងថា ចំពោះការប្រកួតលើកនេះ ថ្វីត្បិតតែគេមិនធ្លាប់ដែលជួបផេតឆ័ត្រឆ័យ តែគេមិនញញើតនោះឡើយ។
គួរបញ្ជាក់ថា ពុទ្ធ ឆាយរិទ្ធី ប្រកួតជាមួយថៃលើកចុងក្រោយនេះ គឺបានប្រកួតឈ្នះ មីឈូក ( My Chhuok )ក្នុងទឹកទី៣ កាលពីថ្ងៃទី០៣ ខែមីនា ឆ្នាំ២០១៩ កន្លងមកនេះ។
ចំពោះ មាជ សុខរ៉ា គេនឹងត្រូវជួបប្រកួតជាមួយអ្នកប្រដាល់ថៃ ក្លាឃុនសឹក ផរ.ប៉ា យ៉ាស៊ូ(Klakhunserk Phor.Payasue )។ ពួកគេទាំងពីរ នឹងជួបប្រកួតគ្នាក្នុងប្រភេទទម្ងន់៦៧ គីឡូក្រាមដែរ។
ក្លាឃុនសឹក គេធ្លាប់មកប្រកួតនៅកម្ពុជាច្រើនលើកហើយកន្លងមក។ អ្នកប្រដាល់ថៃរូបនេះ ជាជើងខ្លាំង។ ទោះជាយ៉ាងណា មាជសុខរ៉ា ជួបជាមួយក្លាឃុនសឹក លើកនេះ ក៏មិនជាធានាប៉ុន្មានដែរ ព្រោះ ក្លា ឃុនសឹក គេជាជើងខ្លាំង និងធ្លាប់ផ្ដួលអ្នកប្រដាល់កម្ពុជាអស់ច្រើននាក់មកហើយ។
មាជ សុខរ៉ា គេបានត្រៀមខ្លួនយ៉ាងល្អ សម្រាប់ការប្រកួតនេះ។យ៉ាងណា មាជ សុខរ៉ា លើកនេះ អាចថាគេមានការប្រុងប្រយ័ត្នជាងមុន ដែលធ្វើឲ្យ ក្លាឃុន សឹក ពិបាកសង្ឃឹមឈ្នះដែរ។
ក្លា ឃុនសឹក បើតាមអ្នកផ្គូផ្គងឲ្យដឹងនោះ គេមានកំណត់ត្រាប្រកួតជិត១០០លើក ឈ្នះ៧៨លើកចាញ់១៥លើក ស្មើ០១លើក និងធ្លាប់វាយដៃគូឲ្យសន្លប់២១លើកឯណោះ។ តែបើធៀបជាមួយប្រវត្តិប្រកួតរបស់ មាជ សុខរ៉ា គឺច្រើនជាងសុខរ៉ា ដោយមាជ សុខរ៉ា មានកំណត់ត្រាប្រកួតចំនួន៨៧លើក ឈ្នះ៧០លើក ចាញ់១៤លើក និងស្មើ០៣លើក។
ទោះជាយ៉ាងនេះក្តី មាជ សុខរ៉ា មិនអាចមើលងាយក្លាឃុនសឹកបានឡើយ ព្រោះអ្នកប្រដាល់ថៃរូបនេះ ទើបតែស្គាល់ចាញ់១៥លើកប៉ុណ្ណោះ ក្នុងការប្រកួតជិត១០០លើកនោះ។ ចាំមើលមាជ សុខរ៉ា និង ក្លាឃុនសឹក នេះ តើនរណាជាអ្នកឈ្នះ? ក្នុងការជួបគ្នាលើកដំបូងនេះ។
ចំពោះការប្រកួតរវាងអ្នកប្រដាល់រួមជាតិវិញ គួន ប៊ុនហ៊ីម អ្នកប្រដាល់ក្លិបពន្លឺសាមគ្គីខេត្តបាត់ដំបង ត្រូវគេផ្តល់ឱកាសឲ្យជួបសងសឹកជាមួយមាស សារ៉ាក់ អ្នកប្រដាល់ក្លិបអាណាចក្រគុនខ្មែរ ដោយជួបគ្នាក្នុងទម្ងន់៥៧គីឡូក្រាម។
ប៊ុនហ៊ីម បានវាយចាញ់សារ៉ាក់ ក្នុងទឹកទី៣ កាលពីចុងខែធ្នូកន្លងមកនោះ។ សម្រាប់ ការឡើងសងសឹកនេះ ពុំដឹងថា គួន ប៊ុនហ៊ីម គេសងសឹកមាស សារ៉ាក់ បានសម្រេច ឬអត់នោះទេ?៕
Source: Kampuchea Thmey Daily
0 Comments