ភ្នំពេញ ៖ ប្រជាពលរដ្ឋដែលខ្វះខាតជីវភាពរស់នៅសង្កាត់ព្រែកប្រាចំនួន៣០គ្រួសារ បានទទួលអំណោយពីអនុសាខាកាកបាទក្រហមកម្ពុជាខណ្ឌច្បារអំពៅ។
យោងតាមប្រភពពី លោក ខៀវ សំអាត មន្ត្រីប្រចាំការអនុសាខាកាកបាទក្រហមកម្ពុជាខណ្ឌច្បារអំពៅបានឲ្យកម្ពុជាថ្មីដឹងថា នៅព្រឹកថ្ងៃទី២០មីនានេះ លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ និងជាប្រធានអនុសាខាកាកបាទក្រហមកម្ពុជាខណ្ឌច្បារអំពៅ រួមដំណើរដោយ លោក លោកស្រីអភិបាលរងខណ្ឌ លោកប្រធានការិយាល័យចំណុះ បាននាំយកអំណោយរបស់អនុសាខាកាកបាទក្រហមកម្ពុជាខណ្ឌច្បារអំពៅ ទៅផ្តល់ជូនប្រជាពលរដ្ឋចំនួន៣០គ្រួសារដែលកំពុងខ្វះខាតជីវភាព នៅក្នុងសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
ក្នុងពិធីប្រគល់អំណោយ លោក ចេង មុនីរ៉ា បានមានប្រសាសន៍ថា អំណោយដែលនៅចំពោះមុខលោកតា លោកយាយ និងបងប្អូនទាំង៣០គ្រួសារនេះ គឺជាអំណោយរបស់សម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្ដេចបានផ្តល់មកអនុសាខាកាកបាទក្រហមកម្ពុជាខណ្ឌច្បារអំពៅ សម្រាប់ផ្តល់ជូនប្រជាពលរដ្ឋដែលមានការខ្វះខាតជីវភាព។
នេះ ស.បញ្ជាក់ឲ្យឃើញថា ជានិច្ចកាល សម្តេច តែងយកចិត្តទុកដាក់គិតគូរដល់ប្រជាពលរដ្ឋយើងគ្រប់ពេលវេលា និងគ្រប់ទីកន្លែង។
លោក ចេង មុនីរ៉ា បានបញ្ជាក់ទៀតថា ប្រជាពលរដ្ឋកម្ពុជាយើងមានសំណាងណាស់ ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចទាំងទ្វេ តែងគិតគូរពីសុខទុក្ខ និងស្ថានភាពរស់នៅរបស់ប្រជាពលរដ្ឋ ដោយសម្ដេច មិនទុកឲ្យប្រជាពលរដ្ឋកម្ពុជាណាម្នាក់ ត្រូវបាត់បង់ជីវិតដោយសារតែខ្វះខាតជីវភាពនោះឡើយ។
ជាក់ស្តែងដូចថ្ងៃនេះ គឺអំណោយរបស់ សម្តេច បានផ្តល់ជូនបងប្អូនដែលខ្វះខាតចំនួន៣០គ្រួសារដោយក្នុង១គ្រួសារៗ ទទួលបាន ៖ អង្ករ៣០គីឡូក្រាម ម៉ី១០កញ្ចប់ ស្ករស១កញ្ចប់ ទឹកក្រូច៤កំប៉ុង ទឹកស៊ីអ៊ីវ ឬទឹកត្រី៦ដប និងថវិកា៣០.០០០រៀល៕
Source: Kampuchea Thmey Daily
0 Comments