ពលរដ្ឋនៅភូមិអូរប្រើស សប្បាយរីករាយ ខណៈចៅអធិការវត្តអូរប្រើស ធ្វើពិធីចែកទឹកឲ្យពួកគាត់ ដែលកំពុងខ្វះខាតទឹក និងពិបាកទៅរកនៅកន្លែងឆ្ងាយ

ប៉ៃលិន ៖ ប្រជាពលរដ្ឋរស់នៅភូមិអូរប្រើស សង្កាត់អូរតាវ៉ៅ ក្រុងប៉ៃលិន មានចិត្តសប្បាយរីករាយយ៉ាងខ្លាំង ខណៈព្រះចៅអធិការវត្តអូរប្រើស ព្រះនាម អ៊ុំ មង្គល បានធ្វើពិធីចែកទឹកដល់ពួកគាត់ ដែលកំពុងជួបការខ្វះខាតជាប្រចាំថ្ងៃ និងពិបាកទៅដឹកនៅកន្លែងឆ្ងាយ។

បើតាម លោក ឌឿន ចាន់ឌី អនុភូមិអូរប្រើស សង្កាត់អូរតាវ៉ៅ បានឲ្យដឹងនៅព្រឹកថ្ងៃទី២៥មីនានេះថា ដោយមើលឃើញប្រជាពលរដ្ឋក្នុងភូមិអូរប្រើស មានការខ្វះខាតទឹកប្រើប្រាស់ប្រចាំថ្ងៃ ទើបព្រះគ្រូចៅអធិការវត្តអូរប្រើស ព្រះនាម អ៊ុំ មង្គល ស្នើសុំអាជ្ញាធរភូមិ ជួយអំពាវនាវដល់ប្រជាពលរដ្ឋណា ដែលមានការខ្វះខាតទឹក សូមមកយកនៅក្នុងវត្ត ដោយព្រះគ្រូចៅអធិការ បានចំណាយថវិកាផ្ទាល់ខ្លូន ហៅគេឲ្យមកខួងអណ្តូងទឹក សម្រាប់ប្រើប្រាស់ជាប្រយោជន៍រួម ដោយចំណាយអស់១០០០ដុល្លារ។

លោកក៏បានបញ្ជាក់ដែរថា ប្រជាពលរដ្ឋភូមិអូរប្រើសមានចំនួន៣០៣គ្រួសារ ស្មើនឹងមនុស្សរាយចំនួន១២៨៦នាក់ ដែលចែកជា៨ក្រុម ហើយនៅក្នុងភូមិមានអណ្ដូងស្នប់ចំនួន០៨ ដែលជាអំណោយរបស់អាជ្ញាធរខេត្ត ប៉ុន្តែត្រូវបានខូចអស់ហើយដែរ ដោយសព្វថ្ងៃ មានតែអណ្ដូងមួយគត់ជាអំណោយរបស់ ឯកឧត្ដម សៅ សារ៉ាត់ សម្រាប់ប្រើប្រាស់ក្នុងភូមិ តែរីងស្ងួតអស់ទឹកទៅហើយ។

ពាក់ព័ន្ធបញ្ហានេះដែរ ព្រះចៅអធិការវត្តអូរប្រើស ព្រះនាម អ៊ុំ មង្គល មានថេរៈដីកាប្រាប់អ្នកយកព័ត៌មានយើងថា ការដែលព្រះអង្គអំពាវនាវឲ្យប្រជាពលរដ្ឋ មកយកទឹក គឺជាការចែករំលែកបុណ្យកុសល ក្នុងវិស័យព្រះពុទ្ធសាសនា ហើយបើយើងសង្កេតមើលប្រទេសកម្ពុជាយើង កំពុងជួបគ្រោះរាំងស្ងួត ខ្វះខាតទឹកប្រើប្រាស់ ដែលបញ្ហានេះបានកើតឡើងនៅទូទាំងប្រទេស ព្រមជាមួយនេះសម្ដេចអគ្គមហាសេនាបតីតេជោ ហ៊ុន សែន ក៏បានណែនាំ ដល់ថ្នាក់ដឹកនាំខេត្ត និង អាជ្ញាធរគ្រប់ជាន់ថ្នាក់ ព្រះសង្ឃ កងកម្លាំងប្រដាប់អាវុធ មន្ត្រីរាជការ និងសប្បុរសជន ត្រូវរួមគ្នាជួយដោះស្រាយការលំបាក និងដឹកទឹកចែកជូនឲ្យប្រជាពលរដ្ឋបានប្រើប្រាស់ទាន់ពេលវេលា។

ព្រះអង្គមានថេរៈដីកាបន្តថា ការចែកទឹកនេះ គឺមានការសហការជាមួយអាជ្ញាធរភូមិ ប្រជាការពារភូមិ ហើយបើប្រជាពលរដ្ឋណា មិនមានលទ្ធភាពក្នុងការដឹកជញ្ជូនទេ គឺមានក្រុមការងារដឹកដល់លំនៅដ្ឋានបងប្អូនតែម្ដង ដោយមិនមានយកកម្រៃនោះឡើយ។
ចំណែកប្រជាពលរដ្ឋ ដែលបានមកទទួលទឹក ក៏បានសម្ដែងនូវចិត្តសប្បាយរីករាយយ៉ាងក្រៃលែង ដោយសារតែ ខណៈពេលពួកគាត់ជួបបញ្ហាខ្វះខាតទឹកប្រើប្រាស់ ស្រាប់តែព្រះគ្រូចៅអធិការវត្ត អំពាវនាវឲ្យពួកគាត់មកដឹកទឹកយកទៅប្រើប្រាស់ផងដែរ ជាមួយគ្នានេះ ពួកគាត់ ក៏សូមថ្លែងអំណរគុណ ដល់ព្រះគ្រូចៅអធិការវត្ត ដែលបានចែករំលែកទឹកជួយដល់ពួកគាត់ផងដែរ៕