ភ្នំពេញ ៖ លោក រ៉ុង ឈុន ប្រធានសហភាពសហជីពកម្ពុជា និងលោកគ្រូ-អ្នកគ្រូចំនួន១០នាក់ នៅព្រឹកថ្ងៃទី២៧ ខែមីនា ឆ្នាំ២០១៩នេះ បានចូលមកឆ្លើយបំភ្លឺនៅចំពោះមុខតុលាការ ពាក់ព័ន្ធនឹងបណ្តឹងសុំបដិសេធចោលលិខិតរបស់ក្រសួងអប់រំ យុវជន និងកីឡា ដែលបានសម្រេចលុបឈ្មោះពួកគាត់ចេញពីក្របខ័ណ្ឌរដ្ឋ។
តាមដីកាកោះ របស់ លោក រស់ ពិសិដ្ឋ ចៅក្រម នៃសាលាដំបូងរាជធានីភ្នំពេញ ចុះថ្ងៃទី១៣ ខែមីនា ឆ្នាំ២០១៩ បានកោះហៅ ឈ្មោះ រ៉ុង ឈុន,ឈ្មោះ លី ឌី,ឈ្មោះ វង វុទ្ធី,ឈ្មោះ គង់ ស៊ីវង្ស,ឈ្មោះ ជុំ ចាន់,ឈ្មោះ មុត មណ្ឌ,ឈ្មោះ ពៀត ម៉ាប់,ឈ្មោះ ចន្ទ សុភា,ឈ្មោះ ហុង សុជា,ឈ្មោះ យិន ឈូករ័ត្ន និងឈ្មោះ ខែម ស៊ីថា ឲ្យចូលឆ្លើយក្នុងនាមជាដើមចោទ។
រីឯចុងចម្លើយ នៃសំណុំរឿង លេខ១០៨ ចុះថ្ងៃទី១៦ ខែមករា ឆ្នាំ២០១៩ គឺក្រសួង អប់រំ យុវជន និងកីឡា ដោយមានតំណាងដោយ លោក ហង់ ជួនណារ៉ុង ដែលជារដ្ឋមន្ត្រី នៃក្រសួងអប់រំ យុវជន និងកីឡា។
លោក រ៉ុង ឈុន និង គ្រូបង្រៀន១០នាក់ខាងលើ បានប្តឹងមកតុលាការសុំឲ្យបដិសេធលិខិតរបស់ក្រសួងអប់រំ យុវជន និងកីឡា ដែលបានសម្រេចលុបឈ្មោះពួកគាត់ចេញពីក្របខ័ណ្ឌ កាលពីដើមខែមករា ឆ្នាំ២០១៨កន្លងទៅ បន្ទាប់ពីក្រសួងបានរកឃើញថា ពួកគាត់ បានបោះបង់ចោលការងារ និងមួយចំនួនទៀតអវត្តមានដោយគ្មានច្បាប់អនុញ្ញាតត្រឹមត្រូវ៕
Source: Kampuchea Thmey Daily
0 Comments