ភ្នំពេញ ៖ លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានមានប្រសាសន៍ថា ជារៀងរាល់ពេលប្រជុំ ឬ ចុះជួបសំណេះសំណាលជាមួយប្រជាពលរដ្ឋតាមបណ្តាសង្កាត់ទាំង៨ក្នុងខណ្ឌច្បារអំពៅ លោកតែងតែណែនាំដល់បងប្អូនប្រជាពលរដ្ឋបើចង់បានឯកសារអ្វីផ្សេងៗ យកទៅប្រើប្រាស់តាមផ្លូវច្បាប់សូមមកជួបមន្ត្រីរាជការប្រចាំការនៅការិយាល័យច្រកចេញចូលតែមួយ របស់សាលាខណ្ឌច្បារអំពៅជៀសវាងឲ្យអ្នកគក់ជេររត់ការឲ្យនាំបាត់បង់ថវិកាច្រើនហើយចំណាយពេលវេលាវែងឆ្ងាយទៀតផង។
លោកចេង មុនីរ៉ា បានបញ្ជាក់ទៀតថា ការិយាល័យច្រកចេញចូលតែមួយរបស់សាលាខណ្ឌច្បារអំពៅ គឺទទួលធ្វើឯកសារពាក់ព័ន្ធ និងផ្លូវច្បាប់សម្រាប់ឲ្យប្រជាពលរដ្ឋយកទៅប្រើប្រាស់បានយ៉ាងស្របច្បាប់ ហើយឯកសារមួយចំនួនមិនត្រង់ប្រាក់ទៀតផង។ ប៉ុន្តែបើឲ្យអ្នកគក់ជេររត់ការវិញគឺត្រូវចំណាយថវិកាយ៉ាងច្រើនតាមការទាមទាររបស់អ្នកគក់ជេរ ហើយមានពេលខ្លះអ្នកគក់ជេរយកឯកសារទៅទុកចោលរួចទម្លាក់កំហុសថាមកពីមន្ត្រីសាលាខណ្ឌនិងសង្កាត់ធ្វើការយឺតយ៉ាវទៅវិញ។
លោកអភិបាលខណ្ឌបានបញ្ជាក់ទៀតថា រាល់ឯកសារទាំងអស់បើសិនជាប្រជាពលរដ្ឋចង់បានយកទៅប្រើប្រាស់ឲ្យបានលឿនហើយមិនចំណាយថវិកាច្រើន គឺត្រូវមកបំពេញឯកសារនៅការិយាល័យច្រកចេញចូលតែមួយ នៅសាលាខណ្ឌច្បារអំពៅរាល់ពេលម៉ោងធ្វើការដោយមានមន្ត្រីប្រចាំការរង់ចាំបម្រើសេវាជូនដោយមិនឲ្យប្រជាពលរដ្ឋលោករង់ចាំយូរឡើយ។ ហើយសូម្បីតែបច្ចុប្បន្នអគ្គិសនីប្រើប្រាស់មិនគ្រប់គ្រាន់ ប៉ុន្តែលោកអភិបាលខណ្ឌច្បារអំពៅបានទិញម៉ាស៊ីនភ្លើងដាក់បញ្ឆេះនៅពេលដាច់ភ្លើងធ្វើយ៉ាងណាមិនឲ្យខកខានឯកសារដែលប្រជាពលរដ្ឋលោកមកធ្វើនៅការិយាល័យច្រកចេញចូលតែមួយឲ្យបានឆាប់និងមិនចំណាយថវិកាច្រើនដោយតម្លៃសេវា គឺមានបិទនៅក្នុងការិយាល័យដែលចេញដោយក្រសួងមហាផ្ទៃតាមផ្លូវច្បាប់ដោយមិនមានមន្ត្រីណាម្នាក់យកលើសពីតារាងឡើយ៕
Source: Kampuchea Thmey Daily
0 Comments