ភ្នំពេញ ៖ លោកសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល បានស្នើដល់ដៃគូសហប្រតិបត្តិការទាំងអស់ រួមទាំងជប៉ុន កូរ៉េ និងដៃគូដទៃទៀត បន្ដជួយបណ្ដុះបណ្ដាលដល់គ្រូពេទ្យកម្ពុជាពិសេសលើជំនាញត្រចៀ ក ច្រមុះ បំពង់ក សល្យសាស្ត្រ ក្បាល និងកដើម្បីលើកកម្ពស់សមត្ថភាពគ្រូពេទ្យឲ្យកាន់តែ ប្រសើរឡើងថែមទៀត។
ថ្លែងនៅក្នុងពិធីបើកវេទិកាវេជ្ជសាស្ត្រ សមាគមគ្រូពេទ្យត្រចៀក ច្រមុះ បំពង់ក សល្យសាស្ត្រ ក្បាល និងក កម្ពុជា សហប្រតិបត្តិការ ជាមួយមន្ទីរពេទ្យ JIKEI តូក្យូ ជប៉ុនកាលពីព្រឹកថ្ងៃទី២៣ ខែមីនា ឆ្នាំ២០១៩ នៅសណ្ឋាគារ ភ្នំពេញលោករដ្ឋមន្ដ្រីបានមានប្រសាសន៍ថា «ក្រោមកិច្ចសហប្រតិបត្ដិការ និងការជួយបណ្ដុះបណ្ដាលរបស់ភាគីដៃគូពាក់ព័ន្ធ បានជួយលើកកម្ពស់សុខុមាលភាពរបស់ប្រជាជនយើងច្រើនណាស់។ ជាក់ស្ដែង មន្ទីរពេទ្យ JIKEI ប្រទេសជប៉ុន ដែលជាមន្ទីរពេទ្យមានលក្ខណៈស្ដង់ដារអន្ដរជាតិ បានជួយបណ្ដុះបណ្ដាលទាំងទ្រឹស្ដី និងការវះកាត់ ដល់មន្ទីរពេទ្យកម្ពុជាយើង។ សម្រាប់ភាគីកូរ៉េ ក៏ដូច្នេះដែរ ពិសេសថ្មីៗនេះ បានប្រើឧបករណ៍ទំនើប ដើម្បីព្យាបាលដល់កុមារ គ-ថ្លង់នៅកម្ពុជាយើង ឲ្យអាចស្ដាប់លឺ និងនិយាយបានទៀត ដូចមនុស្សទូទៅបាន»។
លោករដ្ឋមន្ដ្រី សង្ឃឹមយ៉ាងមុតមាំថា ដៃគូពាក់ព័ន្ធទាំងអស់នេះ នឹងបន្ដជួយគាំទ្របន្ថែមទៀត ទាំងការបណ្ដុះបណ្ដាល បច្ចេកទេស និងផ្សេងទៀត ដើម្បីជួយលើកកម្ពស់វិស័យសុខាភិបាល ក្នុងបម្រើនូវសេវាសុខភាព ជូនដល់ប្រជាពលរដ្ឋ ឲ្យបានកាន់តែប្រសើរឡើង។
លោកសាស្ត្រាចារ្យ ម៉ម ប៊ុនហេង ក៏បានថ្លែងអំណរគុណដល់ដៃគូពាក់ព័ន្ធទាំងអស់ ដែលបានខិតខំប្រឹងប្រែងបន្ដជួយគាំទ្រកន្លងមកនេះ ដែលបានចូលរួមចំណែកយ៉ាងច្រើន ជួយដល់សុខុមាលភាពរបស់ប្រជាជនកម្ពុជា។
ជាមួយគ្នានេះដែរ លោករដ្ឋមន្ដ្រីសុខាភិបាលបានជំរុញដល់ប្រធានសមាគមអាណត្តិទី៨នេះ បន្ដខិតខំប្រឹងប្រែងបន្ថែមទៀត ក្នុងការបណ្ដុះបណ្ដាលឲ្យសមាជិករបស់ខ្លួន ដើម្បីជួយឲ្យប្រទេសយើង បានរីកចម្រើនទាន់ប្រទេស ក្នុងតំបន់ក៏ដូចជាសាកលលោក។
លោកសាស្ត្រាចារ្យជំនួយ ប៉ូ រដ្ឋា ប្រធានសមាគមគ្រូពេទ្យត្រចៀក ច្រមុះ បំពង់ក សល្យសាស្ត្រ ក្បាល និងកម្ពុជាបានមានប្រសាសន៍ថា សមាគមតែងតែសហការជាមួយជាមួយក្រុមគ្រូពេទ្យនៅតាមបណ្តាប្រទេ សមួយចំនួនដូចជាបារាំថ ម៉ាឡេស៊ី អង់គ្លេស អាមេរិក អូស្ត្រាលី នេប៉ាល់ សាំងហ្គាពួរដើម្បីជួយវះកាត់ជួនដល់ប្រជាពលរដ្ឋកម្ពុជានិងជួយបង្ហាត់បង្រៀនជំនាញឬផ្លាស់ប្តូរបទពិសោធន៍ថ្មីៗបន្ថែមទៀត ដល់ក្រុមគ្រូពេទ្យថ្មីៗនិងនិស្សិតដើម្បីឲ្យពួកគេមានសមត្ថភាពកាន់តែខ្ពស់មានសីលធម៌វិជ្ជាជីវៈថ្លៃថ្នូរស្តង់ដារតែមួយ ប្រើភាសាតែមួយដើម្បីព្យាបាលដល់អ្នកជំងឺប្រកបដោយប្រសិទ្ធភាពផ្តល់ទំនុកចិត្តនិងភាពជឿជាក់មកលើសេវារដ្ឋសំដៅកាត់បន្ថយការចេញទៅព្យាបាលនៅក្រៅប្រទេស។
ជាងនេះទៅទៀត ក្រុមគ្រូពេទ្យកម្ពុជាបានសហការជាមួយក្រុមគ្រូពេទ្យមកពីប្រទេសកូរ៉េបានធ្វើការវះកាត់ជំងឺគថ្លង់ជួនដល់ប្រជាពលរដ្ឋពិសេសកុមារ នៅមន្ទីរពេទ្យព្រះអង្គឌួងដែលធ្វើឲ្យពួកគេអាចមានជីវិតថ្មីអាចស្តាប់ឬនិយាយបានដូចមនុស្សទូទៅព្រមទាំងអាចចូលរួមនៅក្នុងសកម្មភាពនានាក្នុងសង្គមបានពេញលេញ ។
លោកសាស្ត្រាចារ្យជំនួយបានបន្តថា ជាពិសេសក្នុងឱកាសបើកវេទិកាវេជ្ជសាស្ដ្រ អាណត្ដិទី៨នេះ ដែលសហការ ជាមួយមន្ទីរពេទ្យ JIKEI ប្រទេសជប៉ុន, កូរ៉េ និងប្រទេសថៃក៏ជាឱកាសជួបជុំសាមគ្គីដ៏រឹងមាំមួយផងដែរ រវាងសមាជិក សមាជិកាសមាគមទាំងអស់ ទាំងក្នុងនិងក្រៅទេសដើម្បីបានចែករំលែកនូវបទពិសោធន៍ល្អៗឲ្យគ្នាទៅវិញទៅមកផងដែរ៕
Source: Kampuchea Thmey Daily
0 Comments