ភ្នំពេញ ៖ ស្រីម្នាក់ត្រូវបានគេប្រទះឃើញ ធ្លាក់ពីលើអគារមួយកន្លែង ដែលមានកំពស់រហូតដល់១០ជាន់ មកក្រោម ចំលើគំនរខ្សាច់ បណ្ដាលឲ្យស្លាប់ យ៉ាងអាណោចអធម៌ សង្ស័យ លោតសម្លាប់ខ្លួន។ ករណីនេះត្រូវបាន សមត្ថកិច្ចដាក់ការសង្ស័យ នារីរងគ្រោះមានវិបត្តិ ផ្លូវចិត្ត ធ្វើអត្តឃាតខ្លួនឯង។
ហេតុការណ៍នេះបានកើតឡើង កាលពីវេលាម៉ោង១២និង១០នាទីយប់ រំលងអធ្រាត្រ ឈានចូលថ្ងៃទី២៨ ខែមីនា ឆ្នាំ២០១៩ ស្ថិតនៅតាមបណ្ដោយផ្លូវលេខ១៦៣ កែងនិងផ្លូវលេខ២៧៨ ត្រង់ចំណុចខាងកើតវត្តមហាមន្ត្រី ក្នុងសង្កាត់អូឡាំពិច ខណ្ឌចំការមន។
តាមសេចក្តីរាយការណ៍បានឲ្យដឹងថា នៅមុនពេលកើតហេតុ អ្នកជិតខាង ពុំបានឮ ឬមានបញ្ហា អ្វីនោះទេ ក្រោយមក ក៏ស្រាប់តែឮ សម្លេងធ្លាក់ក្ដុកមកក្រោម ប្រជាពលរដ្ឋនៅក្បែរនោះ ដើរទៅមើលឃើញ នារីម្នាក់ ស្លាប់លើគំនរខ្សាច់យ៉ាងអាណោចអធម៌ ដោយផ្ទៃមុខស្ត្រីរូបនោះមានស្នាមបែកមុខ និងមានឈាមផងដែរ។ បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ច សពស្ត្រីរងគ្រោះមិនត្រូវស្គាល់អត្តសញ្ញាណនៅឡើយទេ នារីរងគ្រោះ ជាកម្មករសំណងនៅទីតាំងខាងលើ។ ក្រោយពីកើតហេតុ សមត្ថកិច្ចមូលដ្ឋានបានមកដល់កន្លែងកើតហេតុ បានយកខ្សែមកព័ទ្ធជុំវិញសព រួចទាក់ទងទៅសមត្ថកិច្ចជំនាញមកធ្វើកោសល្យវិច័យសពរងគ្រោះខាងលើ។ តាមជំហានដំបូង សមត្ថកិច្ចសន្និដ្ឋានថា ជាករណីអត្តឃាតលោតសម្លាប់ខ្លួន ដោយសារមានវិបត្តិ តែទោះបីជាយ៉ាងណាគេនៅមិនទាន់ដឹងច្បាស់ ពីមូលហេតុ នៅឡើយទេ។
ក្រោយពីពិនិត្យរួច សមត្ថកិច្ចបានឲ្យរថយន្តសាមុយដឹកតម្កល់នៅវត្តស្ទឹងមានជ័យ រង់ចាំសាច់ញាតិមកទទួលសពយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments