អភិបាលខេត្តត្បូងឃ្មុំ ជំរុញដល់អាជ្ញាធរស្រុកតំបែរ និងមន្ទីរជំនាញ រួមគ្នាដោះស្រាយបញ្ហានានា ជូនពលរដ្ឋឲ្យមានប្រសិទ្ធភាព

ត្បូងឃ្មុំ ៖ ឯកឧត្ដមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តត្បូងឃ្មុំ បានជំរុញឲ្យអភិបាលស្រុកតំបែរ សហការជាមួយមន្ទីរជំនាញ ត្រូវក្តាប់ឲ្យបាននូវរាល់បញ្ហានានា ក្នុងមូលដ្ឋានរបស់ខ្លួន ដើម្បីត្រួតពិនិត្យ ពិភាក្សា និងជួយសម្រួលក្នុងការដោះស្រាយភ្លាមៗ ពិសេសបញ្ហាសន្តិសុខសុវត្ថិភាព ជូនប្រជាពលរដ្ឋ ស្របតាមគោលនយោបាយភូមិ-ឃុំមានសុវត្ថិភាព របស់រាជរដ្ឋាភិបាលកម្ពុជា ដែលបានដាក់ចេញឲ្យមានប្រសិទ្ធភាព។

មានប្រសាសន៍ជំរុញបែបនេះ បានធ្វើឡើងនាថ្ងៃទី២២ ខែមីនា ឆ្នាំ២០១៩ នៅសាលាស្រុកតំបែរ ក្នុងឱកាសឯកឧត្ដមបណ្ឌិត ជាម ច័ន្ទសោភ័ណ បានចុះជួបសំណេះសំណាលជាមួយថ្នាក់ដឹកនាំ មន្ត្រីរាជការ ក្រុមប្រឹក្សាឃុំមេភូមិ និងកងកម្លាំងប្រដាប់អាវុធគ្រប់ប្រភេទ ចំណុះឲ្យរដ្ឋបាលស្រុកតំបែរ ដើម្បីស្តាប់បញ្ហាប្រឈម សំណូមពរ និងដោះស្រាយកង្វល់របស់ប្រជាពលរដ្ឋតាមមូលដ្ឋាន។

ក្នុងឱកាសនោះ អាជ្ញាធរឃុំមួយចំនួនក្នុងស្រុកតំបែរ ខេត្តត្បូងឃ្មុំ បានលើកឡើងនូវបញ្ហាប្រឈម សំណូមពរមួយចំនួន ដល់អាជ្ញាធរខេត្តពិនិត្យ លទ្ធភាពជួយ ពិសេសការតបណ្ដាញអគ្គិសនី ក្នុងមូលដ្ឋានរបស់ពួកគាត់ និងប្រជាពលរដ្ឋក្រីក្រ មិនមានដី និងទីជម្រកស្នាក់នៅ។

ជាការឆ្លើយតប ចំពោះបញ្ហាការតបណ្តាញអគ្គិសនី ឯកឧត្ដមបណ្ឌិត អភិបាលខេត្ត បានចាត់ឲ្យមន្ទីរជំនាញ សិក្សាលើបញ្ហានេះ នឹងដោះស្រាយជូន។

ឯកឧត្ដមបណ្ឌិត បញ្ជាក់យ៉ាងដូចច្នេះថា ចំពោះការតបណ្តាញអគ្គិសនី លោកនឹងពិភាក្សាជាមួយមន្ទីរជំនាញ រួមជាមួយអាជ្ញាធរអគ្គីសនីកម្ពុជា ពិនិត្យលទ្ធភាព ក្នុងការតបណ្តាញចូល ដោយឡែកការខ្វះខាតអគ្គិសនីប្រើប្រាស់វិញ លោក ក៍សុំការអធ្យាស្រ័យផងដែរ ព្រោះថាមិនមែនតែក្នុងខេត្តត្បូងឃ្មុំនោះទេ ដែលខ្វះខាត ពោលគឺស្ទើរទូទាំងប្រទេស ក៏ដូចជាប្រទេសជិតខាងយើង។

ឯកឧត្តមបណ្ឌិត ជាម ច័ន្ទសោភ័ណ បញ្ជាក់បន្ថែមថា រាជរដ្ឋាភិបាលកម្ពុជា ក៏បានអំពាវផងដែរ ដល់អ្នកប្រើប្រាស់អគ្គិសនីទូទាំងប្រទេស ឲ្យរួមគ្នាកាត់បន្ថយ និងសន្សំសំចៃការប្រើប្រាស់អគ្គិសនី ព្រោះថាដោយសារកត្តាកម្ដៅឡើងខ្លាំង ធ្វើឲ្យលទ្ធភាពក្នុងការផលិតអគ្គិសនីប្រើប្រាស់ មានការខ្វះខាត ដែលទាមទារឲ្យមានការអធ្យាស្រ័យពីអ្នកប្រើប្រាស់ រហូតដល់ខែវស្សាចូលមកដល់ ទើបមានអគ្គិសនីប្រើប្រាស់គ្រប់គ្រាន់ឡើងវិញ។

ចំពោះបញ្ហាប្រជាពលរដ្ឋស្នើសុំដី ឯកឧត្ដមបណ្ឌិត អភិបាលខេត្ត ក៏បានបញ្ជាក់ថា ឲ្យតែបងប្អូនពិតជាទីទាល់ក្រ គ្មានដីគ្មានទីជម្រកពិតប្រាកដ លោកនឹងស្នើសុំដី នៅតំបន់ដីសម្បទានសង្គមកិច្ច ដែលមាននៅខេត្តក្រចេះ ចែកជូនដល់បងប្អូនដែលពិតជាទីទាល់ក្រ និងត្រូវការពិតប្រាកដ។

ឯកឧត្ដមបណ្ឌិត ជាម ច័ន្ទសោភ័ណ ក៏បានស្នើ លោកមេភូមិមេឃុំ ត្រូវក្តាប់ឲ្យជាប់នូវរាល់បញ្ហា និងសំណូមពរ ជាពិសេសពលរដ្ឋណាដែលមានជីវភាពខ្វះខាត ទីទាល់ក្រពិតប្រាកដ ហើយរាយការណ៍មកថ្នាក់ស្រុក និងបន្តមកថ្នាក់ខេត្ត ដើម្បីដោះស្រាយជូនភ្លាមៗ។ ជាចុងក្រោយ ចំណុចដែលសំខាន់បំផុតនោះ គឺត្រូវរួមគ្នាថែរក្សាសុខសន្តិភាព ដើម្បីបន្តការអភិវឌ្ឍប្រទេសជាតិយើងឲ្យកាន់តែមានភាពរីកចម្រើន លើគ្រប់វិស័យថែមទៀត ជាមួយ សម្ដេចតេជោ ហ៊ុន សែន ប្រមុខដឹកនាំ ដ៏ឆ្នើមរបស់កម្ពុជា។

លោក សុខ សារិទ្ធ អភិបាលស្រុកតំបែរ បានឲ្យដឹងថា អាជ្ញាធរបានយកចិត្តទុកដាក់យ៉ាងខ្លាំង ក្នុងការលើកស្ទួយជីវភាព របស់នៅរបស់ប្រជាពលរដ្ឋ ក្នុងនោះបានកសាងហេដ្ឋារចនាសម្ព័ន្ធមានដូចជា ផ្លូវថ្នល់ តបណ្ដាញអគ្គិសនី សាលារៀន មណ្ឌលសុខភាព ស្រះទឹក ប្រព័ន្ធប្រឡាយជាដើម តែយ៉ាងណានៅមិនទាន់បំពេញគ្រប់តម្រូវការរបស់ប្រជាពលរដ្ឋ បានមួយរយៈភាគរយនោះទេ ដោយយើងត្រូវបន្តធ្វើជាជំហានៗ។

ឯកឧត្ដមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តត្បូងឃ្មុំ បានបន្តទៅសំណេះសំណាល ជាមួយសិស្សានុសិស្ស និងលោកគ្រូអ្នកគ្រូ នៅវិទ្យាល័យ ហ៊ុន សែន តំបែរ ដោយធ្វើការលើកទឹកចិត្តសិស្សានុសិស្ស ដែលប្រលងជាប់និទ្ទេសAទាំងអស់ ដោយសន្យាផ្តល់ជូននូវកុំព្យូទ័រយួរដៃ ម្នាក់១គ្រឿង ព្រមទាំងជំរុញឲ្យពួកគាត់ខិតខំប្រឹងប្រែងសិក្សាដើម្បីអនាគតខ្លួនផង ដើម្បីកិត្តិយសក្រុមគ្រួសារ ពិសេសជាទំពាំងដ៍៏មានគុណភាព ដើម្បីស្នងឫស្សី សក្ដិសមជាសសរទ្រូងប្រទេសជាតិ៕