ប្រដាល់ ៖ សុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ ត្រូវគេផ្គូផ្គងឲ្យជួបប្រកួតជាមួយ ចាន់ វ៉ារិទ្ធ អ្នកប្រដាល់ក្លិបនិរោធមានជ័យ នារសៀលថ្ងៃសៅរ៍ ទី៣០ ខែមីនា ឆ្នាំ២០១៩នេះ នៅលើសង្វៀនបាយ័នស្ទឹងមានជ័យ។
ពីរនាក់នេះ ធ្លាប់ជួបគ្នាម្តងហើយកាលពីថ្ងៃទី១៣តុលា២០១៨កន្លងមក។ ដូច្នេះ ជំនួបលើកនេះ គឺជាការជួបគ្នាលើកទី២ និងការជួបសងសឹករបស់ ចា វ៉ារិទ្ធ។ ពួកគេទាំងពីរ ប្រកួតគ្នាក្នុងប្រភេទទម្ងន់៦៣,៥០០គីឡូក្រាម។
ចាន៉ វ៉ារិទ្ធ ជាអ្នកប្រដាល់ស្រករក្រោយ និងមិនមានឈ្មោះបោះសំឡេងនោះទេ តែគេជាអ្នកប្រដាល់ដែលមានផ្លែល្អ។ ជាទម្លាប់របស់សុខ សុវណ្ណ គេឡើងប្រកួតច្រើនវ៉ៃមិនយោគយល់អ្វីនោះទេ។ គេឡើងប្រកួតចុងក្រោយនេះ (២៤មីនា២០១៩)កន្លងទៅនេះ បានផ្ដួលអ្នកប្រដាល់ជើងចាស់ ថន ភឿត ក្លិបឃ្លាំងមឿងកីឡា ក្នុងទឹកទី៣។
ចំពោះ សុខ សុវណ្ណ វិញ ក៏ជាអ្នកប្រដាល់ជើងចាស់ ដោយត្រូវបានអ្នកស្នេហាកីឡាប្រដាល់ចាប់អារម្មណ៍ ដោយសារតែការប្រកួតរបស់គេល្អ ហើយលទ្ធផលឈ្នះច្រើនជាងចាញ់។
ទោះជាគេមានវ័យច្រើនជាង ចាន់ វ៉ារិទ្ធ បន្តិចក្តី សម្រាប់ស្នៀតប្រដាល់របស់ សុខ សុវណ្ណ មិនជាចាញ់ វ៉ារិទ្ធ នោះទេ។ សម្រាប់ការជួបគ្នានេះ បើសិនជាសុខ សុវណ្ណ ពុំមានបញ្ហាអ្វីកើតឡើងទេនោះ វ៉ារិទ្ធ គឺពិបាកហើយ ព្រោះ សុខ សុវណ្ណ មានតិចនិកល្អជាង។ សុខសុវណ្ណ យ៉ាប់តែបញ្ហាកម្លាំងកាយសម្បទាមួយមុខប៉ុណ្ណោះ ឯស្នៀតប្រដាល់របស់គេមានផ្លែល្អ។ តែយ៉ាងណា ចាន់ វ៉ារិទ្ធ ក៏មានផ្លែល្អដែរ។ ដូច្នេះ ក្នុងការជួបប្រកួតគ្នាលើកនេះ គឺមិនអាចទាយមុនថា សុខ សុវណ្ណ ឈ្នះ ឬ ចាន់ វ៉ារិទ្ធ ឈ្នះនោះឡើយ?។
នីម នន អ្នកប្រដាល់ក្លិបកងពលតូចទ័ពឆ័ត្រយោង៩១១ នឹងជួបប្រកួតជាមួយ អេរ៉ាវ៉ាន់ ចាន់រាជ អ្នកប្រដាល់ក្លិបកុសលកីឡា។ ពីរនាក់នេះ ជួបគ្នាក្នុងប្រភេទទម្ងន់៥៧គីឡូក្រាម។
ក្រុមអ្នកវិភាគកីឡាប្រដាល់ក្នុងស្រុកបាននិយាយថា នីម នន ថ្វីត្បិតតែជាអ្នកប្រដាល់ជើងខ្លាំង និងចាស់វស្សា តែមិនប្រាកដថាឈ្នះ អេរ៉ាវ៉ាន់ ចាន់រាជ នោះទេ ព្រោះ ចាន់រាជ គេមានកណ្ដាប់ដៃខ្លាំង ជើង ជង្គង់ កែង ក៏ពិសេសដែរ។ មួយទៀត អេរ៉ាវ៉ាន់ គេមានកាយសម្បទារឹងមាំ ដៃជើងវែង រហ័ស និងមានចិត្តប្រដាល់ធំថែមទៀត។ ទោះជាយ៉ាងណាក្តី ការជួបគ្នារវាង នីម នន និង អេរ៉ាវ៉ាន់ ចាន់រាជ នេះ ពុំមានអ្នកណាហ៊ានទស្សន៍ទាយមុនថា អ្នកណាឈ្នះ អ្នកណាចាញ់នោះដែរ?។
ប៉ុន្តែទោះជាយ៉ាងណា គេក៏មិនទុកចិត្តចំពោះ អេរ៉ាវ៉ាន់ ចាន់រាជ ប៉ុន្មានដែរ ព្រោះ ចាន់រាជ ប្រកួតមិនសូវទៀងទាត់ប៉ុន្មានទេ។ មួយរយៈពេលចុងក្រោយនេះ គេមានហាក់ដូចជាវាយមិនសូវល្អ និងលទ្ធផលចាញ់ច្រើនជាងឈ្នះ។ ចាន់រាជ ប្រកួតលើកចុងក្រោយនេះ វាយចាញ់ខេម ចាន់ អ្នកប្រដាល់ក្លិបកងពលតូចទ័ពឆ័ត្រយោង៩១១ដោយពិន្ទុ កាលពីថ្ងៃទី១៦ ខែមីនា ឆ្នាំ២០១៩នៅលើសង្វៀនបាយ័នស្ទឹងមានជ័យ។ ឯការប្រកួតចុងក្រោយរបស់នីម នន វិញ គេបានវាយឈ្នះ សេក គឹមសាន្ត អ្នកប្រដាល់ក្លិបអង្គរមានជ័យខេត្តសៀមរាបដោយពិន្ទុ។
សុខ វិរៈ អ្នកប្រដាល់ក្លិបសំរោងកោងខេត្តបាត់ដំបង នឹងជួបប្រកួតជាមួយលី តឿន អ្នកប្រដាល់ក្លិបមកុដរាជសីហ៍។ ពួកគេជួបគ្នាក្នុងប្រភេទទម្ងន់៦០គីឡូក្រាម។ ពីរនាក់នេះ ធ្លាប់ប៉ះគ្នាម្តងហើយកាលពីដើមឆ្នាំ២០១៨កន្លងមក ដោយ សុខ វិរៈ ចាញ់ លី តឿន ក្នុងទឹកទី១។
អ្នកប្រដាល់ទាំងពីររូបនេះ ជាអ្នកប្រដាល់ចាស់វស្សាដូចគ្នា។ ប៉ុន្តែលី តឿន គេខ្លាំង និងល្អ ហើយការប្រកួតរបស់គេក៏ល្អដែរ ដោយឡើងប្រកួតចុងក្រោយនេះ ទោះបីជាវាយចាញ់ លីន វិរៈ អ្នកប្រដាល់ក្លិបបូរីរាជសីហ៍មានរិទ្ធដោយពិន្ទុក្តី ក៏គេចាញ់ដោយល្អមើល និងចាប់ចិត្តដែរ។
សម្រាប់ការជួបគ្នារវាង សុខ វិរៈ និង លី តឿន នេះ បើតាមក្រុមអ្នកវិភាគប្រដាល់អះអាងនោះ គឺគេមានជំនឿទុកចិត្តលើ លី តឿន ឈ្នះច្រើនជាង។
សល ស្រស់ អ្នកប្រដាល់ក្លិបសាលវ័ន្តកីឡា នឹងជួបប្រកួតជាមួយ អេលីត គឹមហុង អ្នកប្រដាល់ជើងថ្មីក្លិបឆ្មាសសែនសុខគុនខ្មែរ ដោយប្រកួតក្នុងទម្ងន់៥៤គីឡូក្រាម។ ចំណែក អ្នកប្រដាល់ឆៃ រ៉េត ក្លិបកងពលតូចទ័ពឆ័ត្រយោង៩១១ ត្រូវជួបជាមួយ អ៊ុំ សំអូន អ្នកប្រដាល់ក្លិបកុលបុត្រគុនខ្មែរ ក្នុងទម្ងន់៦០គីឡូក្រាម៕
Source: Kampuchea Thmey Daily
0 Comments