សៀមរាប ៖ ដោយមានការចុះផ្សាយនៅតាមសារព័ត៌មានបណ្ដាញសង្គមនាពេលកន្លងមកនោះ ពាក់ព័ន្ធនឹងការជីកយកដីធ្វើអាជីវកម្ម ពីតំបន់គម្រោងអភិវឌ្ឍន៍មជ្ឈមណ្ឌលវប្បធម៌ សន្តិភាព របស់សម្តេចព្រះអគ្គមហាសង្ឃរាជធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា នៅរសៀលថ្ងៃទី២៦ ខែមីនា ឆ្នាំ២០១៩ នៅសាលាខេត្តសៀមរាប បានបើកកិច្ចប្រជុំដោះស្រាយ ក្រោមការដឹកនាំរបស់ឯកឧត្ដម ទៀ សីហា អភិបាល នៃគណៈអភិបាលខេត្ត ដោយមានការចូលរួមពីអស់លោក ជាអភិបាលរងខេត្ត នាយក នាយករងរដ្ឋបាលសាលាខេត្ត មន្ទីរពាក់ព័ន្ធ ទីចាត់ការអន្តរវិស័យសាលាខេត្ត និង អាជ្ញាធរក្រុង លោកចៅសង្កាត់ តំណាងក្រុមហ៊ុនផងដែរ។
ឆ្លងតាមការលើកឡើងរបស់ថ្នាក់ដឹកនាំមន្ទីរធនធានទឹក និង ឧតុនិយមខេត្ត បរិស្ថានខេត្ត មន្ទីរទេសចរណ៍ខេត្ត មន្ទីរ កសិកម្មខេត្ត និង មន្ទីររៀបចំដែនដី នគរូបនីយកម្ម សំណង់ និង សុរិយោដីខេត្ត បានធ្វើការបញ្ជាក់អំពីជីវប្រវត្តិ អំពីអាងទឹក ទំនប់ទឹកជ្រាវ ដែលមានទំហំផ្ទៃដី២៨៨,៦០៣ហិកតា ដែលស្តុក ទឹកស្រោចស្រពបានលើផ្ទៃដីស្រែប្រាំងបានជាង៣០០ហិកតា។
ម្យ៉ាងទៀត ផ្ទៃដីគម្រោងអភិវឌ្ឍន៍មជ្ឈមណ្ឌលវប្បធម៌ សន្តិភាព របស់សម្តេចព្រះអគ្គមហាសង្ឃរាជធិបតីកិត្តិឧទ្ទេសបណ្ឌិត ទេព វង្ស គឺបានជួយដល់ការតម្កល់ទឹកស្តុកនៅទ្វេដងឡើងថែមទៀត ព្រមទាំងធ្វើការអភិវឌ្ឍន៍ វត្តអារាម ទីសក្ការៈ មន្ទីរពេទ្យ បណ្ណាល័យ សាលារៀន សារមន្ទីរ អគារស្នាក់នៅ ធ្វើជា សួនច្បារ ដើម្បីបម្រើនូវផលប្រយោជន៍ដល់សាធារណជន ហើយដីនេះមិនអាចកែប្រែស្ថានភាពដី ពីដីសាធារណៈរបស់រដ្ឋ ទៅជាដីឯកជនរបស់រដ្ឋទេ។
ក្នុងនោះដែរ មន្ទីរធនធានទឹកក៏បានឲ្យដឹងថា ដីផ្ទៃអាងនេះ ត្រូវបានសហគមន៍ជ្រាវ បានស្នើសុំធ្វើការជីកស្តារបាតអាង ដោយបានសុំច្បាប់ពីអនុញ្ញាត នៅឆ្នាំ២០១៥ ទើបតែពេលនេះទើបអនុវត្ត ស្របទៅនឹងគម្រោងអភិវឌ្ឍន៍មជ្ឈមណ្ឌលវប្បធម៌ សន្តិភាព របស់ សម្ដេចព្រះអគ្គមហាសង្ឃរាជធិបតីកិត្តិឧទ្ទេសបណ្ឌិត ទេព វង្ស ហើយក៏ត្រូវបានរងការរិះគន់ពីសារព័ត៌មានបណ្ដាញសង្គមទៀតផង។
ម្យ៉ាងទៀត ចំពោះគម្រោងនេះ គឺត្រូវបានប្រគល់សិទ្ធិឲ្យទៅក្រុមហ៊ុន បរិសុទ្ធ ប្រផីធី មេនេចម៉ិន ដើម្បីអភិវឌ្ឍន៍គម្រោងមជ្ឈមណ្ឌលវប្បធម៌សន្តិភាពនេះ។
ក្នុងការជីក ដឹកជញ្ជូនដីចេញពីតំបន់ អភិវឌ្ឍន៍នេះ ក៏ពុំមានច្បាប់អនុញ្ញាតនៅឡើយ តែបើធ្វើការដឹកជញ្ជូននៅក្នុងតំបន់អភិវឌ្ឍន៍ គឺត្រូវពឹងផ្អែកទៅលើច្បាប់ដែល រាជរដ្ឋាភិបាលបានអនុញ្ញាត នៅក្នុងតំបន់ផ្ទៃអាងទឹកនេះ ទោះបីតំបន់ផ្ទៃអាងនេះ ស្ថិតនៅក្នុងតំបន់២ របស់អាជ្ញាធរបឹងទន្លេសាប គឺមិនបានប៉ះពាល់ដល់តំបន់ព្រៃលិចទឹក សម្រាប់ត្រីពងកូន និង សត្វស្លាបរស់នៅឡើយ។
ក្នុងនោះដែរ តំណាងអនុវត្តគម្រោង ក៏បានលើកឡើងអំពីគម្រោងផែនការរបស់គម្រោងអភិវឌ្ឍន៍មជ្ឈមណ្ឌលវប្បធម៌ សន្តិភាព របស់ សម្តេចព្រះអគ្គមហាសង្ឃរាជធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា ក្នុងការបម្រើនូវផលប្រយោជន៍ជាសាធារណៈ ព្រមទាំងជាតំបន់អេកូទេសចរណ៍ និង កសិទេសចរណ៍ ដើម្បីទាក់ទាញ ដល់ភ្ញៀវជាតិ អន្តរជាតិ ចូលមកទស្សនាកម្សាន្ត សំខាន់លើផ្នែកសាសនា។
លោកបានបន្តទៀតថា គម្រោងនេះ ក៏បានកំពុង ស្វែងរកនូវដៃគូអភិវឌ្ឍន៍ ដោយគម្រោងនេះ ត្រូវចំណាយទុនប្រមាណ៤០លានដុល្លារ។ បន្ទាប់ពីការស្តាប់នូវរាល់ខ្លឹមសារ អត្ថន័យក្នុងកិច្ចពិភាក្សា និង សេចក្ដីរាយការណ៍របស់ថ្នាក់ដឹកនាំមន្ទីរពាក់ព័ន្ធ និង តំណាងក្រុមហ៊ុនរួចមក មានប្រសាសន៍នោះដែរ លោក ទៀ សីហា ក៏បានលើកនូវចំណុចសំខាន់ៗមួយចំនួន ដើម្បីបណ្ដាមន្ទីរអង្គភាព ត្រូវធ្វើការត្រួតពិនិត្យឡើងវិញ និង ធ្វើកិច្ចសហការជាមួយក្រុមហ៊ុន ដោយការអនុវត្តនាពេលកន្លងមក គឺ ពុំមានច្បាប់អនុញ្ញាតនៅឡើយ ដោយឈរលើគោលការណ៍អនុញ្ញាតអភិវឌ្ឍន៍លើផ្ទៃដីទំហំ ២៨៨,៦០៣ហិកតា ដែលរាជរដ្ឋាភិបាលបានអនុញ្ញាតតាមរយៈលិខិតលេខ ៩៤៩ សជណ ចុះថ្ងៃទី២០ ខែសីហា ឆ្នាំ២០១៥ របស់ទីស្ដីការគណៈរដ្ឋមន្ត្រី អនុញ្ញាតថ្វាយចំពោះ សម្ដេចព្រះអគ្គមហាសង្ឃរាជធិបតីកិត្តិឧទ្ទេសបណ្ឌិត ទេព វង្ស ដើម្បីធ្វើការអភិវឌ្ឍន៍។
ក្នុងនោះ លោកក៏បានគូសបញ្ជាក់ថា គម្រោងអភិវឌ្ឍន៍នេះ មានស្ថានភាពធំធេងណាស់ ដែលត្រូវប្រើប្រាស់ទុនជាច្រើន។ ដូច្នេះដើម្បីធ្វើការងារនេះឲ្យស្របទៅនឹងច្បាប់ក្រុមហ៊ុន ត្រូវធ្វើការសហការជាមួយមន្ទីរ ស្ថាប័នពាក់ព័ន្ធ រៀបចំនូវរាល់ឯកសារ ដោយធ្វើការ លំអិតទៅតាមគម្រោង ដោយទីតាំងនេះ គឺមានអត្ថន័យ និង អត្ថប្រយោជន៍ដ៏ធំធេងរបស់សម្តេចព្រះអគ្គមហាសង្ឃរាជធិបតីកិត្តិឧទ្ទេសបណ្ឌិត ទេព វង្ស សម្រាប់ទៅពេលអនាគត។
ម្យ៉ាងទៀតគម្រោងនេះ បានដំណើរការទៅបានប្រកបដោយជោគជ័យនោះ គឺជាកិត្តិយសសម្រាប់ខេត្តប្រវត្តិសាស្ត្រសៀមរាប ក្នុងវិស័យព្រះពុទ្ធសាសនា និង ទេសចរណ៍ទៀតផង។ ក្នុងនោះ លោកក៏បានធ្វើឲ្យធ្វើការពិនិត្យឡើងវិញផងដែរ រាល់ផលប៉ះពាល់របស់ប្រជាពលរដ្ឋ ព្រមទាំងសុំឲ្យក្រុមហ៊ុនធ្វើការស្មើសុំ ទៅក្រសួងធម្មការ និង សាសនា ក្នុងការរៀបចំលើគម្រោងនេះ។
ក្នុងនោះដែរ អង្គប្រជុំ ក៏បានធ្វើការពិភាក្សា និង ដោះស្រាយ ពីបញ្ហានៅតំបន់ទេសចរណ៍បឹងពារាំង រវាងសហគមន៍នេសាទចុងឃ្នាស និង សហគមន៍ជ្រាវ ដែលជាអ្នកអភិរក្សថែរក្សា បឹងពារាំង ដែលជាជម្រកត្រីពូជ និង ទីកន្លែងសត្វស្លាបគ្រប់ប្រភេទរកចំណី និង ស្នាក់នៅ ព្រមទាំងបានបម្រើដល់ភ្ញៀវទេសចរ និង បង្កើនប្រាក់ចំណូលដល់ប្រជាពលរដ្ឋក្នុងសហគមន៍ជ្រាវទៀតផង៕
Source: Kampuchea Thmey Daily
0 Comments