រតនគិរី ៖ ថ្មីៗនេះក្រុមហ៊ុនចិនបានយកគ្រឿងចក្រមកជីកស្រះទប់ទឹកនៅក្បែរអូរណាយជាកន្លែងពលរដ្ឋបានប្រើប្រាស់ជាយូរឆ្នាំមកហើយ ពោលតាំងពីជំនន់ដូនតាមកម្ល៉េះ ឥលូវត្រូវក្រុមហ៊ុនចិនមកជីកបំផ្លាញចោលអស់គ្មានសល់។
ក្រុមហ៊ុនចិនមកជីកស្រះស្ថិតនៅត្រង់ចំណុចក្នុងភូមិណាយ ឃុំញ៉ាង ស្រុកអណ្ដូងមាស ខេត្តរតនគិរី កំពង់ប្រឈមនិងការអត់ទឹកប្រើប្រាស់ ខណៈក្រុមហ៊ុនចិន បានសាងសង់សំណង់រឹង និងជីកស្រះនៅមាត់អូរណាយ។
ពាក់ព័ន្ធក្រុមហ៊ុនចិនសាងសង់សំណង់រឹង និងជីកធ្វើស្រះមាត់អូរនេះ កាលពីដើមខែមីនា ឆ្នាំ២០១៩កន្លងទៅ ដោយក្រុមហ៊ុនចិនបានមកកាយដីធ្វើស្រះជាកន្លែងពលរដ្ឋបានប្រើប្រាស់ទឹក ហើយម្យ៉ាងវិញទៀតរដូវនេះជារដូវប្រាំងកំពុងរងនូវការខ្វះទឹកប្រើប្រាស់ផងដែរ។
ជុំវិញករណីខាងលើនេះដែរ លោក សយ សុខហឿន ប្រធានភូមិបាល ស្រុកអណ្ដូងមាស បានប្រាប់សារព័ត៌មានយើងថា ដីក្រុមហ៊ុនចិននៅចំណុចខាងលើនោះ លោកមិនទាន់ចេញប្លង់ឲ្យបានត្រឹមត្រូវនៅឡើយទេ ហើយការសាងសង់សំណង់ និងជីកស្រះនេះដែរ គឺបំពានច្បាប់ទាំងស្រុងទៅហើយ ពីព្រោះការសាងសង់សំណង់រឹង និងជីកស្រះក្នុងអូរនេះ ខាងក្រុមហ៊ុនចិន មិនបានសុំច្បាប់ពីមន្ត្រីជំនាញឡើយ។
ចំណែកលោក ចាន់ ប៊ុនធឿន ប្រធានមន្ទីរធនធានទឹកខេត្តរតនគិរី បានប្រាប់សារព័ត៌មានយើងថា លោកមិនដឹងថា មានក្រុមហ៊ុនចិន មកជីកស្រះ និងមានបំណងបិទអូរនោះទេ ហើយមិនមានច្បាប់ណាមួយ ជីកស្រះ ឬទប់អូរ ដោយមិនមានការសិក្សាឲ្យបានត្រឹមត្រូវនោះ ម្យ៉ាងវិញទៀតការសិក្សានេះ ត្រូវសិក្សាថាមានផលប៉ះពាល់អ្វីខ្លះនៅពេលដែលគេជីកស្រះ និងបិទអូរនោះ។
ហើយនៅពេលបិទអូរ តើប្រជាពលរដ្ឋទទួលបានផលប្រយោជន៍អ្វីខ្លះ មិនមែនជីកស្រះ និងទប់អូរ ធ្វើឲ្យប្រជាពលរដ្ឋត្រូវរង់គ្រោះ ហើយក្រុមហ៊ុនទទួលបានផលប្រយោជន៍តែម្នាក់ឯងនោះឡើយ។
ដោយឡែកលោក ខេន សានីត អភិបាលស្រុកអណ្ដូងមាស អ្នកសារព័ត៌មានយើង មិនអាចសុំការបំភ្លឺបានទេ កាលពីថ្ងៃទី៧មីនា ដោយលោកបានប្រាប់ថា កំពង់ជាប់ប្រជុំ។
មជ្ឈដ្ឋានប្រជាពលរដ្ឋរស់នៅក្នុងភូមិណាយ ក្នុងឃុំញ៉ាង ស្រុកអណ្តូងមាស កំពង់ប្រើប្រាស់ទឹកអូរនេះតាំងពីដូនតាមកហើយ ហើយពួកគាត់ មានការព្រួយបារម្ភយ៉ាងខ្លាំងចំពោះបញ្ហាប្រឈមនិងការអត់ទឹកប្រើប្រាស់នៅថ្ងៃមុខ។
បើសិនជាទង្វើរបស់ក្រុមហ៊ុនចិននេះ មិនមានការសិក្សា និងត្រួតពិនិត្យឲ្យបានត្រឹមត្រូវ ច្បាស់លាស់ពីអាជ្ញាធរមូលដ្ឋាននិងសមត្ថកិច្ចជំនាញច្បាស់ជាប្រជាពលរដ្ឋទាំងមូលនៅក្នុងស្រុកអណ្តូងមាសរង់នូវការអត់ទឹកប្រើប្រាស់៕
Source: Kampuchea Thmey Daily
0 Comments