ខ្សែប្រយុទ្ធ​ជនជាតិ​ប្រេ​ស៊ី​ល​របស់​ក្រុម​វិសាខា រំពឹង​ថា ​ក្រុម​ខ្លួន​នឹង​រកបាន​៣​ពិន្ទុ​នៅ​ប្រកួត​បន្ទាប់​ក្រោយ​អា​ចរក​ត្រឹម​១​ពិន្ទុ​ក្នុង​ប្រកួត​បើកឆាក

កីឡាករ Da Cruz Guardiano Eliel សមាជិក​ថ្មី​របស់​ក្លិប​កីឡាបាល់ទាត់​វិសាខា ក្នុង​ពានរង្វាន់​លី​គ​កំពូល​កម្ពុជា (Metfone Cambodian League) រដូវ​កាល​ឆ្នាំ​២០១៩ បាន​សម្ដែង​អារម្មណ៍​សោកស្ដាយ ក្រោយ​មិនអាច​ជួយ​ក្លិប ដណ្ដើមយក ៣​ពិន្ទុ​ពី​ការប្រកួត​ដំបូង​កាលពី​ចុង​សប្ដាហ៍​ថ្មីៗ​នេះ ខណៈ​គិតថា​នឹង​បំភ្លេច​ការប្រកួត​បើកឆាក​ចោល ហើយ​ព្យាយាម​ធ្វើ​ឲ្យ​បានល្អ ដើម្បី​ទទួលបាន​ជ័យជម្នះ​សម្រាប់​ប្រកួត​បន្តបន្ទាប់​។



កីឡាករ​ជនជាតិ​ប្រេ​ស៊ី​ល បាន​លើកឡើងថា «​ចំពោះ​ប្រកួត​ដំបូង ខ្ញុំ​គិតថា ក្រុម​យើង​លេង​បានល្អ​ហើយ ប៉ុន្ដែ​គួរ​ឲ្យ​ស្ដាយ ដែល​យើង​មិនអាច​ទទួលបាន ៣​ពិន្ទុ តែ​ខ្ញុំ​នឹង​បំភ្លេច​ការប្រកួត​ដំបូង ហើយ​ព្យាយាម​និង​ប្រឹងប្រែង​ការប្រកួត​បន្ទាប់​។ ខ្ញុំ​សង្ឃឹមថា យើង​នឹងធ្វើ​បានល្អ​បំផុត នៅ​ប្រកួត​បន្ទាប់​»​។​សម្រាប់​ប្រកួត​ដំបូង​ដែល​បញ្ចប់​ទៅ​លទ្ធផល​ស្មើគ្នា ០-០ ជាមួយ​ក្រុម​សូល​ទី​ឡូ​អង្គរ កីឡាករ​ម្ចាស់​អាវ​លេខ​៣១ សម្លឹង​ឃើញថា «​មូលហេតុ​ក្រុម​យើង មិនអាច​ឈ្នះ​ក្រុម​សូល​ទី​ឡូ​អង្គរ ភាគច្រើន​ដោយសារ​ខ្វះ​សំណាង។ ប៉ុន្ដែ​យើង​មិនត្រូវ​ទម្លាក់កំហុស​ឲ្យ​ខ្លួនឯង​ទេ យើង​ត្រូវ​ខំប្រឹង​បន្ថែម ដើម្បី​យក​ពិន្ទុ​ឲ្យ​បាន​ច្រើនជាង​នេះ ។ បើ​យើង​ព្យាយាម​ឲ្យ​អស់ពី​សមត្ថភាព ចុងក្រោយ​យើង​នឹង​ទទួលបាន​ជ័យជម្នះ​»​។



កីឡាករ Da CRUZ GUARDIANO ELIEL មាន​តួនាទី​ជា​ខ្សែប្រយុទ្ធ និង​ពាក់អាវ​លេខ ៣១ ប្រចាំ​ក្រុម​វិសាខា ដែលជា​ក្លិប​ដំបូង​របស់​គេ​នៅ​ប្រទេស​កម្ពុជា​។ CRUZ បាន​ចាប់ផ្ដើម​អាជីព​បាល់ទាត់​ជាមួយ​ក្រុមយុវជន Parana FC នៅ​ឆ្នាំ​២០០៧ តែ ១​ឆ្នាំ​ក្រោយមក​គេ បាន​ក្លាយជា​កីឡាករ​កម្រិត​អាជីព ហើយ​បាន​លេង​ឲ្យ​ក្លិប ក្នុងប្រទេស​កំណើត​ជាច្រើន ដូចជា​ក្លិប Rondonopolis, ក្លិប Cristal FC, ក្លិប Cianorter, ក្លិប Nacional និង​ក្លិប Uberaba ជាដើម ។ ចំពោះ​ក្លិប​ក្រៅ​ស្រុក ដែល CRUZ ធ្លាប់​លេង រួមមាន​ក្លិប Sportivo Luqueno(​ប៉ា​រ៉ា​ហ្គា​យ​) ឆ្នាំ​២០១០) ។ ក្លិប Perak FA(​ម៉ាឡេស៊ី​) ឆ្នាំ​២០១៣-២០១៤ ។ ក្លិប Busaiteen(​ប៉ា​រ៉ែ​ន​) ឆ្នាំ​២០១៤-២០១៥ ។ ក្លិប UiTM(​ម៉ាឡេស៊ី​) ឆ្នាំ​២០១៥-២០១៦ ។ ក្លិប Nakhon Pathom United(​ថៃ​) ឆ្នាំ​២០១៦ និង​ចុងក្រោយ​លេង​ឲ្យ​ក្លិប SPORTING CLUDE IDEAL(​ព័រ​ទុយ​ហ្គា​ល់​) ឆ្នាំ​២០១៧-២០១៨​។



កីឡាករ​ដែល​មាន​បទពិសោធន៍​ប្រកប​អាជីព​ច្រើន​ទ្វីប​រូបនេះ​បានបញ្ជាក់​ទៀត​ថា ​«ដូច​បងប្អូន​ឃើញ​អញ្ចឹង​ការប្រកួត​ដំបូង យើង​ប្រឹងប្រែង ហើយ​ក៏មាន​ភាពសប្បាយ​រីករាយ​ដែរ អត់​មាន​បញ្ហា​អ្វី​ទេ តែ​អ្វី​សំខាន់ កុំ​ឲ្យ​តែ​ចាញ់​ការប្រកួត​។ ប៉ុន្ដែ​ប្រកួត​បន្ទាប់​យើង​នឹង​ព្យាយាម​ឲ្យ​អស់ពី​លទ្ធភាព ដើម្បី​ឈ្នះ​។ ចំពោះ​ក្ដី​រំពឹង​ឈ្នះ​ពាន​វិញ អ្នកណា​ក៏​ចង់បាន​ដែរ សំខាន់​យើង​ត្រូវ​ព្យាយាម​។ តែ​អ្វីៗ​ត្រូវធ្វើ​ការ​ជា​ជំ​ហ៊ានៗ ហើយ​បើ​យើង​ព្យាយាម ខ្ញុំ​សង្ឃឹមថា វិសាខា​នឹង​ទទួលបាន​ពាន ក្នុង​រដូវ​កាល​នេះ​»​។

យោង​តាម​កាលវិភាគ​បន្ទាប់ពី​ប្រកួត​ស្មើ​ក្រុម​សូល​ទី​ឡូ​អង្គរ ០-០ កាលពីពេល​ថ្មីៗ ក្លិប​កីឡាបាល់ទាត់​វិសាខា នឹង​បន្ដ​បើកទ្វារ​កីឡដ្ឋាន​វិសាខា​របស់ខ្លួន​ក្នុង​រាជធានី​ភ្នំពេញ ទទួល​ក្លិប​គិរីវង់​សុខ​សែនជ័យ​ក្នុង​សប្ដាហ៍​ទី២​ នៃ​លីគ​កំពូល​កម្ពុជា នៅ​ថ្ងៃទី៣០ ខែមីនា ឆ្នាំ២០១៩ ខាងមុខ៕

Source: Kampuchea Thmey Daily