ឃាត់ខ្លួន​ជនសង្ស័យ​ជួញដូរ​គ្រឿងញៀន​៧​នាក់​ រួមជាមួយ​វត្ថុតាង​ថ្នាំញៀន​៣៤​កញ្ចប់​

កណ្តាល ៖ សមត្ថកិច្ច​ប៉ូលិស​ស្រុក​កៀនស្វាយ ​ចុះបង្ក្រាប​មុខសញ្ញា​ជនសង្ស័យ​ជួញដូរ​គ្រឿងញៀន​៧​នាក់​ រួមជាមួយ​វត្ថុតាង​ថ្នាំញៀន​ចំនួន​៣៤​កញ្ចប់​ និង​មធ្យោបាយ​សម្ភារៈ​វេច​ខ្ចប់​ជាច្រើន​ទៀត​កាលពី​យប់​ថ្ងៃទី​១៩​ ខែមីនា ​ឆ្នាំ​២០១៩ ចំណុច​ភូមិ​ជ្រោយ​ព្រីង ឃុំ​កំពង់ស្វាយ ស្រុក​កៀនស្វាយ​,​ខេត្ត​កណ្តាល​។

មុខសញ្ញា​ជនសង្ស័យ​ដែល​សមត្ថកិច្ច​ឃាត់ខ្លួន​ក្នុងករណី​ជួញដូរ​ចែកចាយ​រក្សាទុក​ដោយ​ខុសច្បាប់​នូវ​សារធាតុ​ញៀន​ទាំង​៧​នាក់​នេះ​ ៖ ទី​១.​ឈ្មោះ​ គា​ មាន​ ភេទ​ប្រុស​ អាយុ​៤៤​ឆ្នាំ មាន​ទីលំនៅ​ភូមិ​ព្រែក​ដូង​២ ឃុំ​កំពង់ស្វាយ។​ ទី​២.​ឈ្មោះ​ មិត្ត​ ទូច​ (​ហៅ​ ហ៊ីង​)​ ភេទ​ប្រុស​ អាយុ​23​ឆ្នាំ មាន​ទីលំនៅ​ភូមិ​ព្រែក​ដូង​២ ឃុំ​កំពង់ស្វាយ។ ទី​៣.​ឈ្មោះ​ ក្រឹម​ ច​ន្នី ​ភេទ​ប្រុស​ អាយុ​32​ឆ្នាំ​ នៅ​ភូមិ​ព្រែក​ដូង​២ ឃុំ​កំពង់ស្វាយ។ ទី​៤.​ឈ្មោះ ​លី​ ឈៀង​ថេ​ង ​(​ហៅ​ទូច​)​ ភេទ​ប្រុស ​អាយុ​33​ឆ្នាំ ​នៅ​ភូមិ​ព្រែក​ស្វាយ​,​ឃុំ​ឈើទាល​,​។ ទី​៥.​ឈ្មោះ​ ជា​ សុខ​អាណា​ ភេទ​ស្រី​ អាយុ​32​ឆ្នាំ​(​ប្រពន្ធ​របស់​ឈ្មោះ ​លី​ ឈៀង​ថេ​ង​),​ទី​៦​.ឈ្មោះ​ នាង​ ពៅ​ ភេទ​ប្រុស ​អាយុ​22​ឆ្នាំ ​នៅ​ភូមិ​ស្ដៅ​កន្លែង​,​ឃុំ​ដីឥដ្ឋ​ និង​ទី​៧.​ឈ្មោះ ​ប៉ូ​ត ​រដ្ឋា​ ភេទ​ប្រុស ​អាយុ​22​ឆ្នាំ ​នៅ​ភូមិ​ស្ដៅ​កន្លែង​,​ឃុំ​ដីឥដ្ឋ​។

​ក្នុង​កិច្ចប្រតិបត្តិការ​នេះ​ សមត្ថកិច្ច​ដកហូត​បាន​វត្ថុតាង​ជា​បន្តបន្ទាប់​រួមមាន ៖ ១/​ម្សៅ​ក្រាម​ពណ៌​ស​ថ្លា​ សង្ស័យ​ជា​សារធាតុ​ញៀន​ សរុប​ចំនួន​៣៤​កញ្ចប់​(​ធំ​២.​មធ្យម​១.​តូច​៣១)​។​ ២/​ម៉ូតូ​ចំនួន​៣​គ្រឿង​(​ម៉ាក​CUB​ ជ្រុង​C50 ​គ្មាន​ស្លាកលេខ​មួយគ្រឿង​)។ ម៉ាក​យ៉ាម៉ាហា​សេ​រ៉ូ​ស ពណ៌​ខ្មៅ​ គ្មាន​ស្លាកលេខ​មួយ​គ្រឿង​។ ម៉ាក​HongdaC125​ គ្មាន​ស្លាកលេខ។ ៣/​ទូរ​សព្វ​ដៃ​ចំនួន​13​គ្រឿង ​និង​សម្ភារៈ​វេច​ខ្ចប់​ប្រើ​ប្រាស់​មួយចំនួនទៀត​។

សមត្ថកិច្ច​បានបញ្ជាក់​ឲ្យ​ដឹងទៀតថា ​នៅ​យប់​មុនពេល​កើតហេតុ ​កម្លាំង​នគរបាល​ជំនាញ​ផ្នែក​ប្រឆាំង​បទល្មើស​គ្រឿងញៀន​ស្រុក​កៀនស្វាយ​ សហការ​ជាមួយ​កម្លាំង​ប៉ុស្ដិ៍​នគរបាល​រដ្ឋបាល​កំពង់​ស្វាយ​ និង​ប៉ុស្តិ៍​ឈើ​ទាល​ បាន​ចុះ​ល្បាត​ក្នុងភូមិ​សាស្ត្រ​ខាងលើ ​ក្នុង​គោលបំណង​រក្សា​ការពារ​សន្តិសុខ ​សុវត្ថិភាព ​សណ្ដាប់ធ្នាប់​ជូន​បងប្អូន​ប្រជាជន​ ស្របតាម​ការណែនាំ​របស់​ឯកឧត្ដម​ឧត្ដមសេនីយ៍​ទោ​ អ៊ា​វ​ ចំរើន​ ស្នងការ​នគរបាល​ខេត្តកណ្តាល​។

​លុះ​ល្បាត​មកដល់​ចំណុច​ភូមិ​ជ្រោយ​ព្រីង​,​ឃុំ​កំពង់ស្វាយ ​វេលា​ម៉ោង​ប្រហែល​ជាង​១០​យប់​ ថ្ងៃ​ដដែល ​ក៏​ប្រទះឃើញ​មុខសញ្ញា​២​នាក់​ ១/​ឈ្មោះ​គា​ មាន​ និង​ ឈ្មោះ ​មិត្ត​ ទូច​(​ហៅ​ហ៊ីង​)​ ជិះ​ម៉ូតូ​១​គ្រឿង​ ម៉ាក​CUB​ជ្រុង​ ពាក់​ស្លាកលេខ "​ភ្នំពេញ​"1V.0396 ​ឌុប​គ្នា​ ដោយមាន​ការសង្ស័យ​ កម្លាំង​សមត្ថកិច្ច​ ក៏​ឃាត់ខ្លួន​ឆែកឆេរ​រកឃើញ​ថ្នាំញៀន​១​កញ្ចប់​តូច​យកមក​សាកសួរ​។​

យោងតាម​ចម្លើយសារភាព​របស់​មុខ​សញ្ញា​ទាំង​២​នាក់​ខាងលើ​ ទើប​សមត្ថកិច្ច​បង្កើត​គណៈកម្មការ​ចុះ​ធ្វើការ​ស្រាវជ្រាវ​ភ្លាមៗ​ទាំងយប់ ​រហូត​ឈានទៅដល់​ឃាត់ខ្លួន​មុខសញ្ញា​ជួញដូរ​ចែកចាយ​ចំនួន​៥​នាក់​ទៀត​តែម្តង​។

​បច្ចុប្បន្ន​ មុខសញ្ញា​ជនសង្ស័យ​ទាំង​៧​នាក់ ​រួមជាមួយ​វត្ថុតាង ​ត្រូវ​នគរបាល​ស្រុក​កៀនស្វាយ​ កសាង​សំណុំរឿង​បញ្ជូន​ទៅ​ស្នងការដ្ឋាន​នគរបាល​ខេត្ត​កណ្តាល ​ចាត់ការ​បន្ត​តាម​នីតិវិធី​ច្បាប់​៕

​



Source: Kampuchea Thmey Daily