បាត់ដំបង ៖ ជនសង្ស័យចំនួន៣នាក់ ដែលជាមុខសញ្ញាជួញដូរថ្នាំញៀនយ៉ាងសកម្ម ត្រូវបានកម្លាំងអធិការដ្ឋាន នគរបាលក្រុងបាត់ដំបង តាមស្រាវជ្រាវរហូតឃាត់ខ្លួនបានជាបន្តបន្ទាប់ រួមនឹងថ្នាំញៀនមួយចំនួនផងដែរ ដែលកន្លងមកក្រុមនេះគឺជាមុខសញ្ញាចាស់ ដែលត្រូវបានសមត្ថកិច្ចតាមប្រមាញ់រហូតមក។
លោកវរសេនីយ៍ឯក ឆាង វណ្ណឆៃ អធិការនគរបាលក្រុងបាត់ដំបងបានបញ្ជាក់ថា កិច្ចប្រតិបត្តិការនេះ បានធ្វើឡើង នាថ្ងៃទី២២ ខែមីនា ឆ្នាំ២០១៩ វេលាម៉ោង១១និង៥០នាទី នៅចំណុចក្រុមទី២៣ ភូមិកម្មករ សង្កាត់ស្វាយប៉ោ ដោយកម្លាំងជំនាញប្រឆាំងគ្រឿងញៀន ក្រុងបាត់ដំបង ផ្ទាល់តែម្ដង។
នៅក្នុងកិច្ចប្រតិបត្តិការលើកទី១នេះ សមត្ថកិច្ចបានបង្ក្រាប ករណីរក្សាទុកដោយខុសច្បាប់នូវសារធាតុញៀន ក្នុងបទល្មើសជាក់ស្តែង១ករណី ព្រមទាំងបានឃាត់ខ្លួនជនសង្ស័យចំនួន០១នាក់ ឈ្មោះ វណ្ណ រតនា ភេទប្រុស អាយុ៣៨ឆ្នាំ មានទីលំនៅ ភូមិកម្មករ សង្កាត់ស្វាយប៉ោ ក្រុងបាត់ដំបង។
នៅក្នុងនោះកម្លាំងបានឆែកឆេរ និងរកឃើញ វត្ថុតាងមួយចំនួនរួមមាន ថ្នាំញៀនប្រភេទម៉ាទឹកកកចំនួន០៤កូនថង់ ទម្ងន់០,៩៧ក្រាម ទូរស័ព្ទដៃចំនួន០១គ្រឿង ដោយបាននាំខ្លួនជនសង្ស័យរូបនោះមកធ្វើការសាកសួរនៅអធិការដ្ឋាន ដើម្បីបន្តកិច្ចប្រតិបត្តិការ។
លោកអធិការបានបន្តថា ក្រោយពីបានទទួលចម្លើយសារភាពរួចមក នៅរសៀលថ្ងៃដដែល វេលាម៉ោង៣និង១៥នាទី លោកបានចាត់កម្លាំងឲ្យចុះសហការជាមួយកម្លាំងព្រហ្មទណ្ឌ កម្រិតស្រាល នៃស្នងការដ្ឋានខេត្ត ដើម្បីបន្តការស្រាវជ្រាវ និងឈានដល់ការឃាត់ខ្លួនជនសង្ស័យបានចំនួន០២នាក់ បន្ថែមទៀត ដែលជនទាំងនោះមានឈ្មោះ ស៊ូ ភក្តី ភេទស្រី អាយុ៣១ឆ្នាំ និង ឈ្មោះ សុខ សឿន ភេទប្រុស អាយុ១៧ឆ្នាំ ស្នាក់នៅផ្ទះជួល ស្ថិតនៅក្រុមទី១២ ភូមិអូរតាគាំ១ សង្កាត់ទួលតាឯក និងបានដកហូតនូវវត្ថុតាងរួមមាន ៖ ថ្នាំញៀនប្រភេទម៉ាទឹកកក ចំនួន០៤កញ្ចប់ កូនជញ្ជីងថ្លឹង០១ សៀវភៅកត់ត្រាទិញ លក់ថ្នាំញៀន០១ក្បាល និងសម្ភារៈសម្រាប់ច្រកថ្នាំញៀនមួយចំនួនទៀត។
បច្ចុប្បន្ន ជនសង្ស័យទាំង៣នាក់ រួមជាមួយនឹងថ្នាំញៀនប្រមាណ ជិត១ខាំ ត្រូវបានកម្លាំងអធិការក្រុង រៀបចំបញ្ជូនទៅកាន់ការិយាល័យជំនាញ នៃស្នងការដ្ឋាន នគរបាលខេត្តហើយ៕
Source: Kampuchea Thmey Daily
0 Comments