បាត់ដំបង ៖ ជនសង្ស័យចំនួន៣នាក់ ដែលជាមុខសញ្ញាជួញដូរគ្រឿងញៀនខុសច្បាប់ ត្រូវបានកម្លាំងជំនាញ នៃអធិការដ្ឋាន នគរបាលស្រុកមោងឬស្សី និងអធិការដ្ឋាន នគរបាលស្រុកឯកភ្នំ ចុះឃាត់ខ្លួនក្នុងថ្ងៃតែមួយ ខណៈដែលមុខសញ្ញាទាំងនេះ កំពុងប្រព្រឹត្តជាក់ស្តែង។
គួរបញ្ជាក់ដែរថា កិច្ចប្រតិបត្តិការលើកទី១ បានធ្វើឡើង កាលពីថ្ងៃទី២២ ខែមីនា ឆ្នាំ២០១៩ វេលាម៉ោង១១និង៤០នាទី ត្រង់ចំណុចខាងមុខខារ៉ាអូខេ យីហោ៩៩៩ ស្ថិតក្នុងភូមិ តាតុក ១ ឃុំមោង ស្រុកមោងឬស្សី ខេត្តបាត់ដំបង ដោយនៅទីនោះ សមត្ថកិច្ចឃាត់ខ្លួនជនសង្ស័យបានម្នាក់ ឈ្មោះ រី សារិទ្ធ ភេទប្រុស អាយុ២៧ឆ្នាំ រស់នៅត្រង់ចំណុចខាងលើ ដោយកម្លាំងបានធ្វើការដកហូតនូវវត្ថុតាងរួមមាន ថ្នាំញៀនប្រភេទម៉ាទឹកកកចំនួន១ថង់ មានទម្ងន់០,៣១ក្រាម ទូរស័ព្ទដៃចំនួន១គ្រឿង។
ក្រោយពីទទួលបានចម្លើយសារភាព ព្រមទាំងមានការអនុញ្ញាតពី លោក នួន សាន ព្រះរាជអាជ្ញា សាលាដំបូងរួចមក កម្លាំងស្រុកបានបន្តកិច្ចប្រតិបត្តិការរបស់ខ្លួនទៅកាន់ចំណុចភូមិតាតុក ២ ឃុំមោង នៅវេលាម៉ោង១២និង០៥នាទី ក្នុងថ្ងៃដដែល ដោយបានឃាត់ខ្លួនជនសង្ស័យបានម្នាក់ទៀតឈ្មោះ ញាណ ប៉ូឡូ ភេទប្រុស អាយុ៣៩ឆ្នាំ រស់នៅចំណុចខាងលើ ដោយកម្លាំងជំនាញបានដកហូតថ្នាំញៀនប្រភេទម៉ាទឹកកកចំនួន៣ថង់ មានទម្ងន់៥,២១ក្រាម។
ដោយឡែកនៅថ្ងៃនោះដែរ វេលាម៉ោង៤ល្ងាច សមត្ថកិច្ចស្រុកឯកភ្នំ បានចុះប្រតិបត្តិការទៅកាន់ចំណុចភូមិអូរកំបុត ឃុំព្រែកខ្ពប ស្រុកឯកភ្នំ ខេត្តបាត់ដំបង ដោយបានឃាត់ខ្លួនជនសង្ស័យម្នាក់បន្ថែមទៀត ឈ្មោះ សាំង សីហា ហៅវ៉ូច ភេទប្រុស អាយុ៣២ឆ្នាំ រស់នៅត្រង់ចំណុចខាងលើ ដោយបានដកហូតថ្នាំញៀនប្រភេទម៉ាទឹកកកចំនួន១៤ថង់ មានទម្ងន់២,១២ក្រាម ទូរស័ព្ទដៃចំនួន២ គ្រឿង និងជញ្ជីងសម្រាប់ថ្លឹងថ្នាំញៀន១គ្រឿង។ បច្ចុប្បន្ន ជនសង្ស័យទាំងអស់នេះ ត្រូវបានសមត្ថកិច្ចជំនាញ នៃស្នងការដ្ឋាន នគរបាលខេត្ត បញ្ជូនទៅកាន់សាលាដំបូងហើយ ដើម្បីចាត់វិធានការតាមផ្លូវច្បាប់៕
Source: Kampuchea Thmey Daily
0 Comments