ឧត្តរមានជ័យ ៖ ដើម្បីពង្រឹងបាននូវគុណភាពចំណីអាហារ ដែលបរិភោគប្រចាំថ្ងៃ ជូនដល់ប្រជាពលរដ្ឋនោះ នៅថ្ងៃទី២៥ ខែមីនា ឆ្នាំ២០១៩ សាខាកាំកុងត្រូលខេត្តឧត្តរមានជ័យ សហការជាមួយមន្ទីរពាណិជ្ជកម្មខេត្ត សមត្ថកិច្ច និងអាជ្ញាធរមូលដ្ឋាន បានបន្តការចុះត្រួតពិនិត្យមើល លើផលិតផល និងចំណីអាហារដែលបានតាំងលក់នៅក្នុងស្តង់ និងម៉ាតនានា ក្នុងស្រុកអន្លង់វែង ខេត្តឧត្តរមានជ័យ។
ការចុះពិនិត្យនេះផងដែរ មន្ត្រីសាខាកាំកុងត្រូល បានផ្តោតសំខាន់ទៅលើ គ្រឿងឧបភោគបរិភោគ ដែលហួសកាលបរិច្ឆេទ និងគ្រឿងភេសជ្ជៈដែលខូចគុណភាពផ្សេងៗ នៅក្នុងឱកាសនោះ មន្ត្រីសាខាកាំកុងត្រូលខេត្ត បានពិនិត្យឃើញមានជាក់ស្តែងបានដកហូតទំនិញខូចគុណភាពចម្រុះ សរុបប្រមាណ១៦០គ.ក្រ ទឹកក្រូចដបតូច២៤០ដប. នំកញ្ចប់កូនក្មេង៣៤កញ្ចប់.ប្រេងឆា៤២ដប.មីម៉ាម៉ា២៥កញ្ចប់.សៀង៣ដប.គូលេន៤កំប៉ុង.ស្ករក្មេង២កំប៉ុង.ដំណាប់ទំពាំងបាយជូ៣ប្រអប់.និងទឹកដោះគោបឺតក្មេង១១ប្រអប់តូច.យកមករក្សាទុកនៅសាខាកាំកុងត្រូលខេត្ត ដើម្បីដុតកម្ទេចចោលនៅពេលក្រោយ។
ជាមួយគ្នានោះផងដែរ មន្ត្រីកាំកុងត្រូលខេត្ត ក៏បានធ្វើការអប់រំណែនាំបន្ថែម ឲ្យបងប្អូនអាជីវករលក់ដូរ ត្រូវគិតដល់សុខភាពអ្នកទិញជាធំ និងជាចាំបាច់បំផុត បន្តបន្ទាប់ទៀត។
មន្ត្រីជំនាញសូមឲ្យ បងប្អូនប្រជាពលរដ្ឋចូលរួមសហការជាមួយមន្ត្រីជំនាញ ដើម្បីទប់ស្កាត់ការនាំចូលផលិតផលខូចគុណភាព ឬក្លែងក្លាយ ដែលបង្កដល់ផលប៉ះពាល់ ដល់សុខុមាលភាពបងប្អូន។
បន្ទាប់មក ជាមួយនឹងការចុះពិនិត្យនេះផងដែរ សមត្ថកិច្ច អាជ្ញាធរមូលដ្ឋាន រួមនឹងបងប្អូនប្រជាពលរដ្ឋ បានសម្តែងនូវក្តីសប្បាយរីករាយផងដែរ ដែលបានមន្ត្រីជំនាញ ចុះមកពិនិត្យរកមើលទំនិញខូចគុណភាពដោយផ្ទាល់ ដើម្បីគិតគូរទៅលើសុខភាពប្រជាពលរដ្ឋយើង៕
Source: Kampuchea Thmey Daily
0 Comments