ភ្នំពេញ ៖ លោកសាស្ត្រាចារ្យ ម៉មប៊ុនហេង រដ្ឋមន្ត្រីក្រសួងសុខាភិបាលបានណែនាំដល់ប្រជាពលរដ្ឋប្រុងប្រយ័ត្នចំពោះជំងឺពងបែកដៃជើងនិងមាត់ ខណៈក្រសួងបានរកឃើញការកើនឡើងនៃករណីជំងឺនេះនៅលើកុមារអាយុក្រោម៥ឆ្នាំ និង ករណីខ្លះមានសភាពធ្ងន់ធ្ងរដែលតម្រូវសំរាកនៅមន្ទីរពេទ្យកុមារដើម្បីសង្គ្រោះបន្ទាន់ នៅក្នុងអំឡុងពេលនៃការកើនឡើងកំដៅនេះ។
លោកសាស្ត្រាចារ្យ ម៉ម ប៊ុនហេងបានលើកឡើងនៅក្នុងសេចក្តីជួនព័ត៌មានមួយចុះថ្ងៃទី២២ខែមីនាឆ្នាំ២០១៩ឲ្យដឹងថា «គ្រប់ៗគ្នា ត្រូវតែមានការប្រុងប្រយ័ត្នខ្ពស់ចំពោះជំងឺពងបែក ដៃ ជើង និងមាត់ នៅពេលដែលអាកាសធាតុក្តៅ ឡើងក្តៅខ្លាំងនេះ តាមរយៈការរក្សាអនាម័យឲ្យបានល្អ ឧស្សាហ៍លាងដៃជាមួយសាប៊ូនិងទឹកឲ្យបានញឹកញាប់ ទាំងកុមារនិងអ្នកថែទាំកុមារ ។ បើកុមារឬទារកមានសញ្ញាគ្រោះថ្នាក់ដូចជា សន្លឹម ប្រកាច់ ឬ កន្ត្រាក់ដៃជើង ឬរោគសញ្ញាផ្លូវដង្ហើម (ហត់) ត្រូវប្រញាប់បញ្ជូនទៅមន្ទីរពេទ្យដែលនៅជិតបំផុត »។
ក្រសួងសុខាភិបាលបានឲ្យដឹងថា ជំងឺពងបែកដៃ ជើង និងមាត់ គឺជាជំងឺឆ្លងមួយប្រភេទកើតឡើង ញឹកញាប់ ចំពោះទារក និង កុមារ។ វាបង្កឲ្យមានរោគសញ្ញា គ្រនក្តៅ មានដំបៅឈឺក្នុងមាត់ និង មានពងកន្ទូល លើបាតដៃ បាតជើង និង កំប៉ះគូទ។ វាកើតមាននៅក្នុងប្រទេសជាច្រើនពេញទូទាំងពិភពលោក។
ជំងឺពងបែក ដៃជើង និងមាត់នេះ ភាគច្រើនជាជំងឺស្រាល ហើយអ្នកជំងឺ ស្ទើរតែទាំងអស់ជាសះស្បើយក្នុងរយៈពី ៧ថ្ងៃ ទៅ១០ ថ្ងៃ ដោយពុំចាំបាច់មានការព្យាបាល ហើយកម្រមានផលវិបាកណាស់ អ្នកជំងឺត្រូវបរិភោគទឹកឲ្យបានច្រើន ហើយអ្នកជំងឺអាចត្រូវការ ថ្នាំបញ្ចុះកំដៅ និងថ្នាំបំបាត់ការឈឺចាប់ ដែលបណ្តាលមកពីពងបែកក្នុងមាត់។ ប៉ុន្តែមិនត្រូវប្រើថ្នាំ អាស្ពីរីន (aspirin) ដើម្បីបញ្ចុះកំដៅឡើយ។
សេចក្តីជូនព័ត៌មានរបស់ក្រសួងដដែលបានឲ្យដឹងថា ជាកម្រ ជំងឺពងបែក ដៃ ជើង និងមាត់ អាចបង្កឲ្យមានផលវិបាកធ្ងន់ធ្ងរមួយចំនួន រួមមាន រោគសញ្ញាប្រព័ន្ធប្រសាទ(សន្លឹម ប្រកាច់ ឬ កន្លាក់ដៃជើង) និងរោគសញ្ញាផ្លូវដង្ហើម (ហត់)។ អ្នកជំងឺដែលមានផលវិបាក ធ្ងន់ធ្ងរ ត្រូវ ប្រញាប់ទៅមន្ទីរពេទ្យដែលនៅជិតបំផុត។
ជំងឺពងបែក ដៃ ជើង និងមាត់ អាចឆ្លង ពីមនុស្សម្នាក់ទៅ មនុស្សម្នាក់ទៀត ដោយការប៉ះពាល់ផ្ទាល់ជាមួយនឹងវត្ថុរាវ នៃផ្លូវដង្ហើម (ទឹកមាត់ កំហាក និងសំបោរ) ទឹករងៃ ដែលចេញពីពងបែក លាមក នៃអ្នកជំងឺហើយ អ្នកជំងឺអាចចំលង ខ្លាំងបំផុតក្នុងសប្តាហ៍ទីមួយតែជំងឺនេះមិនឆ្លងពីមនុស្សទៅសត្វ ឬ ពីសត្វមកមនុស្សឡើយ។
ក្រសួងសុខាភិបាលបានណែនាំថា ជំងឺនេះអាចការពារបានការឆ្លង ដោយការអនុវត្ត អនាម័យល្អ និងការយកកូនទៅពេទ្យទាន់ពេល ប្រសិនបើមានរោគសញ្ញាធ្ងន់ធ្ងរ។ អ្នកត្រូវលាងដៃកុមារឲ្យបានញឹកញាប់ជាមួយទឹកនិងសាប៊ូ ឬជាមួយទឹកអាល់កុល ជាពិសេសក្រោយប៉ះពងបែក ឬ ដំបៅ មុនពេលរៀបចំអាហារ មុនពេលបរិភោគ មុនបញ្ចុក ចំណីដល់ទារក ឬ កុមារ ក្រោយប្រើប្រាស់បង្គន់អនាម័យ និងក្រោយប្តូរទ្រនាប់ គូទទារក ឬជូតសំអាតរាងកាយកុមារ។ លាងសំអាតផ្ទៃនិង របស់ដែលប្រឡាក់ដោយទឹកនិងសាប៊ូ។ ជៀសវាងការប៉ះពាល់ស្និទ្ធស្នាល (ថើប អោប ប្រើប្រាស់សម្ភារសំរាប់ហូបចុក រួមគ្នា។ល។)
ជាមួយកុមារ ដែលមានជំងឺពងបែក ដៃ ជើង និងមាត់ អាចកាត់បន្ថយការឆ្លងផងដែរ។ ផ្តល់អាហារដែលមានជីវជាតិច្រើន និងទឹកស្អាតដល់កុមារ ប្រើស្លាបព្រា និងបានដាច់ដោយឡែកសម្រាប់កុមារនីមួយៗ។
ក្រសួងសុខាភិបាល និងបន្តធ្វើការជូនដំណឹងដល់សាធារណជន អំពីការវិវត្តន៍នៃបញ្ហាសុខភាពតាមគេហទំព័ររបស់នាយកដ្ឋានប្រយុទ្ធនឹងជំងឺឆ្លង www.cdcmoh.gov.kh និងហ្វេសប៊ុកឈ្មោះ នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល៕
Source: Kampuchea Thmey Daily
0 Comments