ព្រឹកថ្ងៃពុធនេះ សម្ដេចតេជោ ហ៊ុន សែន អញ្ជើញប្រគល់សញ្ញាប័ត្រ ជូនគរុសិស្ស-និស្សិតជិត ២ពាន់នាក់

ភ្នំពេញ ៖ នៅវេលាម៉ោង៧និង៣០នាទីព្រឹក ថ្ងៃទី២៧ ខែមីនា ឆ្នាំ២០១៩ នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានអញ្ជើញប្រគល់សញ្ញាប័ត្រដល់គរុសិស្ស គរុនិស្សិតបញ្ចប់ការសិក្សាឆ្នាំ២០១៧-២០១៨ សរុប១,៩១៨នាក់ នារី៧១៣នាក់។

លោក ពិន ចំណាន រដ្ឋលេខាធិការក្រសួងអប់រំ យុវជន និងកីឡា បានឲ្យដឹងថា គរុសិស្ស និស្សិតដែលទទួលសញ្ញាប័ត្រនៅថ្ងៃនេះរួមមាន ៖ និស្សិតអធិការអប់រំចំនួន៤០នាក់ នារី៤នាក់, បរិញ្ញាបត្រជាន់ខ្ពស់ផ្នែកគ្រប់គ្រងអប់រំ២៣នាក់ នារី៣នាក់, និស្សិតវិជ្ជា ជីវៈនាយកសាលាមធ្យមសិក្សា ទុតិយភូមិ១៨នាក់ នារី១នាក់,គ្រូបង្រៀនកម្រិតឧត្ដមបរិញ្ញាបូក១ ចំនួន៨០៥នាក់ នារី៣២៤នាក់, គ្រូបង្រៀនកម្រិតមូលដ្ឋានតាមប្រព័ន្ធពន្លឿន៩៨៨នាក់ នារី៣៥០នាក់, គ្រូបង្រៀនកម្រិតមូលដ្ឋានភាសាបារាំង-ខ្មែរ១២ បូក២ ចំនួន៤៤នាក់ នារី៣១នាក់។

សម្រាប់ការប្រគល់សញ្ញាប័ត្រដល់គរុសិស្ស និស្សិតនៅថ្ងៃនេះ គឺជាការប្រគល់សញ្ញាប័ត្រលើកទី២៣ ហើយរាល់ការចែកសញ្ញាប័ត្រនេះ តែងទទួលបានការផ្តល់កិត្តិយសអញ្ជើញជាអធិបតីពី សម្ដេចតេជោ ហ៊ុន សែន។

លោករដ្ឋលេខាធិការក៏បានឲ្យដឹងថា ចាប់ពីឆ្នាំ១៩៧៩ ដល់ឆ្នាំ១៩៩៣ វិទ្យាស្ថានជាតិអប់រំ បណ្ដុះ បណ្ដាលគ្រូ និងមន្ត្រីអប់រំបាន៣ម៉ឺននាក់ និងពី ឆ្នាំ១៩៩៣ ដល់ឆ្នាំ២០១៨ បណ្ដុះបណ្ដាលគ្រូ និងមន្ត្រីអប់រំបាន២០,៣៨៥នាក់ នារី៦៥១នាក់។

គរុសិស្ស និស្សិត ដែលបញ្ចប់ការសិក្សា និងទទួលបានបរិញ្ញាបត្រនៅថ្ងៃស្អែកនេះ នឹងក្លាយជាធនធានថ្មីបន្ថែមទៀត សម្រាប់ជួយដល់វិស័យអប់រំនៅកម្ពុជា និងជួយបណ្ដុះបណ្ដាលកូនខ្មែរឲ្យក្លាយជាធនធានដ៏សំខាន់សម្រាប់រួមចំណែកអភិវឌ្ឍន៍ជាតិ៕