ភ្នំពេញ ៖ បើនិយាយពីវត្តទាំងអស់នៅក្នុងខណ្ឌពោធិ៍សែនជ័យ គ្មានវត្តណាមានរឿងអាស្រូវច្រើនដូចវត្តជន្លង់ម្លូនេះទេ ពោលគឺអស់ពីរឿងមួយចូលរឿងមួយមិនចេះចប់មិនចេះហើយ ទោះបីប្ដូរចៅអធិការវត្ត ប៉ុន្មានកញ្ឆេរទៀត ក៏នៅតែមានរឿងរហូតដែរ ព្រោះចៅអធិការវត្តដែលមកគ្រប់គ្រងដឹកនាំវត្តនេះឡើងមក ដោយការលើកបន្ដុបពីថ្នាក់លើ មិនដែលសួរចិត្តពលរដ្ឋចំណុះជើងវត្តទេ ម្យ៉ាងចៅអធិការទាំងនោះភាគច្រើនគិតតែពីរឿងផលប្រយោជន៍ផ្ទាល់ខ្លួន ជួនកាលមានចៅអធិការខ្លះប្រព្រឹត្តអបាយមុខជាមួយកូនចៅអ្នកស្រុកទៀតផង។
ជាក់ស្ដែងមកដល់ជំនាន់ចៅអធិការវត្តចុងក្រោយនេះ ដែលត្រូវបានថ្នាក់លើលើកបន្ដុបដែរនោះ ពេលនេះមានរឿងទៀតហើយ ដែលរឿងលើកនេះ ត្រូវបានប្រភពបង្ហើបថា អាចផ្ដើមចេញពីផលប្រយោជន៍លុយកាក់បានមកពីការលក់ដីវត្តឲ្យគេធើម៉ុងខ្មោច ខ្សែស្រឡាយចិន បានលុយរាប់ម៉ឺនដុល្លារ រួចលាក់លាមកិបកេងគ្នា រវាងព្រះសង្ឃ និងគណៈកម្មការអាចារ្យ ទើបបង្កជម្លោះមិនចេះឈប់ឈរ។
តែជម្លោះលើកនេះ ត្រូវបានគេអះអាងថា ផ្ដើមចេញពីរឿងចៅអធិការវត្តអង្គនេះ ហាមប្រាមមិនឲ្យពុទ្ធបរិស័ទ ចំណុះជើងវត្តចូលទៅក្នុងវត្ត ដើម្បីធ្វើបុណ្យទានចំថ្ងៃសីល ហើយមានបរិស័ទ ខ្លះមានជំនឿខាងព្រហ្មញ្ញសាសនាប្រារព្ធពិធីបន្តិចបន្តួច ត្រូវបានចៅអធិការវត្តហាមឃាត់ មិនឲ្យចូលទៅក្នុងវត្តទៅវិញ។
វត្តជន្លង់ម្លូស្ថិតនៅក្នុងភូមិព្រៃរងៀង សង្កាត់ភ្លើងឆេះរទេះ ខណ្ឌពោធិ៍សែនជ័យ ហើយតាំងពីបុរាណកាលមក ប្រជាពលរដ្ឋ ពុទ្ធបរិស័ទខ្មែរ តែងតែគោរពប្រតិបត្តិនូវជំនឿសាសនា ទាំងព្រះពុទ្ធសាសនា ទាំងព្រហ្មញ្ញសាសនា ជារៀងរាបដរាបមកដល់បច្ចុប្បន្ន ទោះបីបច្ចុប្បន្ននេះច្បាប់ចែងថាព្រះពុទ្ធសាសនា ជាសាសនារបស់រដ្ឋ តែជំនឿ របស់ពលរដ្ឋប្រកាន់ខ្ជាប់នៅដដែល នូវសាសនាទាំង២ ដើរទន្ទឹមគ្នា គ្រប់ទីអារាម ទោះជាព្រះពុទ្ធសាសនាជាធំពិតមែន ក៏នៅតែមានប្រតិបត្តិនូវព្រហ្មញ្ញសាសនាជាមួយផងដែរ សូម្បីតែសម្តេចសង្ឃ ក្នុងបុរមរាជវាំង ក៏ សម្ដេច គោរពនូវជំនឿព្រហ្មញ្ញដែរ ក៏ប៉ុន្តែ ចម្លែកតែវត្តជន្លង់ម្លូ ក្នុងពេលថ្មីៗនេះ ត្រូវបានព្រះគ្រូចៅអធិការវត្ត អ៊ឹម សែម រារាំងមិនអនុញ្ញាតឲ្យព្រះសង្ឃគង់ក្នុងវត្តខាងលើ បរិស័ទចំណុះជើងវត្ត អ្នកស្រុក ឲ្យគោរពប្រតិបត្តិជំនឿព្រហ្មញ្ញសាសនា នៅក្នុងវត្តជន្លង់ម្លូឡើយ ក្នុងហេតុផល គ្មានសណ្ដាប់ធ្នាប់ ធ្វើឲ្យផ្ទុះអធិករណ៍ រវាងប្រជាពលរដ្ឋ ជាមួយចៅអធិការ ពីមួយថ្ងៃទៅមួយថ្ងៃ ពលរដ្ឋខឹង សម្បារនឹងគ្រូចៅអធិការវត្ត ទើបមកធ្វើជាមេវត្តថ្មី បំបិទសិទ្ធិពលរដ្ឋ រឿងជំនឿសាសនា រហូតដល់ ដេញ រារាំង ប្រជាពលរដ្ឋ មិនអនុញ្ញាតចូលវត្តក្នុងថ្ងៃសីលទៀតផង ធ្វើឲ្យពលរដ្ឋកាន់តែផ្ទុះកំហឹង ប្រមូលផ្ដុំតវ៉ា ដល់អាជ្ញាធរសង្កាត់ នៅតែដោះស្រាយមិនចេញមកដល់ព្រឹកថ្ងៃទី២១ ខែមិនា ឆ្នាំ២០១៩នេះ ពលរដ្ឋ អ្នកស្រុក រាប់រយនាក់ត្រៀម ឡើងតវ៉ានៅការិយាល័យធម្មការ ដើម្បីឲ្យដឹងសខ្មៅ នេះបើតាមពលរដ្ឋលើកឡើង។
ពលរដ្ឋបានលើកឡើងថា ចៅអធិការវត្ត ឡើងកាន់តំណែងដោយសារការលើកបន្ដុប ពីថ្នាក់លើ មកកាងទីអារាម ខុសទំនៀបទម្លាប់ ប្រពៃណីពលរដ្ឋខ្មែរ ធ្វើឲ្យប្រជាជនអស់ជំនឿ ព្រះពុទ្ធសាសនាចុះអន់ថយ ដោយសារព្រះសង្ឃអង្គលើកបន្ដុប រូបនេះ។
តែបើតាមប្រភពផ្សេងទៀតបានបង្ហើបឲ្យដឹងថា វត្តជន្លង់ម្លូ ចាប់តាំងពីផ្តើមកាប់ព្រៃឈើទាល យកដីលក់ សម្រាប់បញ្ចុះសព អនុញ្ញាតឲ្យធ្វើម៉ុង កាលណាមក ផ្ទៃក្នុងវត្ត ផ្ទុះអធិករណ៍ច្រើនលើកច្រើនសាហើយ ដោយសារតែលាភសក្ការៈ លុយចំណូលច្រើនតែចៅអធិការស៊ីដាច់ ប្តូរពីមួយអង្គទៅមួយអង្គ មកដល់ពេលនេះ ចៅអធិការថ្មី ត្រូវបានលើកបន្ដុប ពីថ្នាក់លើ ព្រះនាម អ៊ឹម សែម អស់រយៈពេល៣ឆ្នាំហើយ សូម្បីតែលុយចំណូលបានមកពី បុណ្យទាន លក់ដីក្បែរ វត្ត ក៏លោកកិបកេងដែរ លក់បាន៤ម៉ឺនដុល្លារ មកប្រាប់ថាបានតែ២ម៉ឺន ហើយលុយ២ម៉ឺននោះទៀតសោត និងលុយផ្សេងៗ លោកចៅអធិការអ្នកកាន់កាប់ទាំងអស់ ចាត់ទុកថា គណៈកម្មការវត្តជាទីងមោង។
រឿងរ៉ាវមិនចេះចប់ នៅវត្តជន្លង់ម្លូ ធ្វើឲ្យពលរដ្ឋអស់ជំនឿ លើមេវត្តអង្គណា ក៏ដូចអង្គណា ដាក់ឲ្យមកធ្វើចៅអធិការ បូម បឺតកេងយកតែលុយ ពលរដ្ឋសួរច្រើនចាប់ផ្ដើមផ្ទុះជម្លោះ ជាមួយបរិស័ទមិនចេះចប់មិនចេះហើយ៕
Source: Kampuchea Thmey Daily
0 Comments