លោកហែម គីរី អគ្គលេខាធិការសហព័ន្ធខ្មែរកីឡាហែលទឹក បានអះអាងអោយដឹងថា កីឡាករថ្នាលរបស់កម្ពុជាចំនួន៣រូប ដែលកំពុងតែហ្វឹកហាត់នៅប្រទេសជប៉ុននោះ កំពុងតែមានការរីកចម្រើនខ្លាំងណាស់។
លោកអគ្គលេខាធិការអះអាងទៀតថា ពេលនេះពួកគេទើបតែហ្វឹកហាត់រយៈពេលខ្លីប៉ុណ្ណោះតែគេមានការប្រែប្រួលរីកចម្រើនច្រើន។ នៅប្រទេសជប៉ុនគេត្រូវហ្វឹកហាត់មួយថ្ងៃ១០ម៉ោង គឺពេលព្រឹកហាត់៤ម៉ោង និងល្ងាចហាត់រយៈពេល៦ម៉ោង។ ពេលវេលាហ្វឹកហាត់ នឹងត្រូវបង្កើនរហូតជាង១០ម៉ោងនៅពេលដែលពួកគេមានភាពស៊ាំជាមួយនឹងរយៈពេល១០ម៉ោងនេះ។ អ្វីដែលជាលក្ខណៈពិសេសនោះ គឺពួកគេទ្រាំទ្របានជាមួយនឹងកម្មវិធីហ្វឹកហាត់ដ៏តឹងតែងនេះ។ ពួកគេហ្វឹកហាត់ទាំងបច្ចេកទេស ហ្វឹកហាត់កម្លាំង ហ្វឹកហាត់ដង្ហើម។
កីឡាករទាំង៣រូបនោះ គឺឆោម ច័ន្ទថន កីឡាករអ៊ួង លីហេង និង កីឡាករឌឿន វ៉ាត់ធីឌុន។ ពួកគេអមដោយគ្រូបង្វឹកកម្ពុជាមួយរូបគឺលោកហែមថុន ពន្លឺទៅជាមួយ។
នេះជាលើកដំបូងហើយ ដែលសហព័ន្ធខ្មែរកីឡាហែលទឹក បញ្ជូនកីឡាករឲ្យទៅហ្វឹកហាត់ រយៈពេលយូរនៅឯក្រៅប្រទេស។ ពួកគេត្រូវហ្វឹកហាត់ទីនោះរយៈពេល៦ខែសឋ។ កីឡាករវ័យក្មេងទាំង៣រូបនេះ គឺជាអត្តពលិកត្រៀមស៊ីហ្គេមលើកទី៣០នៅប្រទេសហ្វីលីពីននាចុងឆ្នាំ២០១៩នេះ ស៊ីហ្គេមលើកទី៣១ឆ្នាំ២០២១នៅទីក្រុងហាណូយប្រទេសវៀតណាម និង ស៊ីហ្គេមលើកទី៣២ឆ្នាំ២០១២ក្នុងខណៈដែលកម្ពុជាធ្វើជាម្ចាស់ផ្ទះ៕
Source: Kampuchea Thmey Daily
0 Comments