កំពង់ស្ពឺ ៖ គ្រោះអគ្គិភ័យ បានឆាបឆេះផ្ទះមួយខ្នង ក្នុងក្រុងច្បារមន ចំថ្ងៃទិវាសិទ្ធនារីអន្តរជាតិ ថ្ងៃទី៨ ខែមីនា ឆ្នាំ២០១៩ វេលាម៉ោង១០និង៣០នាទី នៅភូមិថ្មី សង្កាត់រការធំ ក្រុងច្បារមន ខេត្តកំពង់ស្ពឺ ខណៈពេលម្ចាស់ផ្ទះចាក់សោចោលគ្មានមនុស្ស។
នគរបាលបានឲ្យដឹងថា ផ្ទះដែលទទួលរងគ្រោះអគ្គិភ័យធ្វើអំពីឈើលើ ថ្មក្រោម ត្រូវបានព្រះអគ្គិភ័យបំផ្លាញអស់ទាំងស្រុង។
នគរបាលនិយាយថា ម្ចាស់ផ្ទះមាន ឈ្មោះ ជូ ធីម ភេទប្រុស អាយុ៥១ឆ្នាំ ប្រពន្ធឈ្មោះ យង់ វុទ្ធី អាយុ៤៥ឆ្នាំ រស់នៅភូមិ/សង្កាត់ខាងលើ។
នគរបាលនិយាយថា ចំថ្ងៃទិវាសិទ្ធិអន្ដរជាតិនារី ៨មិនា លើកទី១០៨ ម្ចាស់ផ្ទះមិននៅ ដោយចាក់សោទុកចោល គ្រោះអគ្គិភ័យបានលេបត្របាក់ទាំងស្រុងហើយ មូលហេតុបណ្តាលមកពីឆ្លងចរន្តអគ្គិសនី។
ករណីខាងលើនេះ បណ្ដាលឲ្យខូចខាតនូវសម្ភារៈមួយចំនួនរួមមាន ផ្ទះមួយខ្នងទំហំ ៦ម៉ែត្រគុណ៨ម៉ែត្រ ឈើលើថ្មក្រោម ដំបូលប្រក់ស៊ីបប្រូ ,គ្រែដេកចំនួន ២ ,ទូរឈើចំនួន ០៤ ,ទូរទស្សន៍ ០១ គ្រឿង ប្រាក់រៀល ២លានរៀល,ខ្សែ.ក មាស ២ខ្សែ,បន្តោង ២ ខ្សែដៃមាស ០១ ,ចិញ្ចៀន ០១វង់ សរុបអស់២តំឡឹង ៣ជីកន្លះ និងសម្ភារៈឯកសារមួយចំនួនទៀត។
លោកឧត្ដមសេនីយ៍ត្រី អ៊ុម ប៊ុនធឿន ស្នងការរង ផែនបង្ការពន្លត់អគ្គិភ័យ បានឲ្យដឹងថា ក្នុងកិច្ចប្រតិបត្តិការខាងលើ ជំនាញប្រើប្រាស់រថយន្តអគ្គិភ័យចំនួន០២គ្រឿង ទឹកអស់០៣រថយន្ត ទើបគ្រប់គ្រងស្ថានការណ៍បានទាំងស្រុង និងទប់ស្កាត់ការពារបាន មិនឲ្យរាលដាលទៅដល់ផ្ទះប្រជាពលរដ្ឋដែលនៅក្បែរនោះផងដែរ។
ករណីអគ្គិភ័យនេះ ដោយសារតែម្ចាស់ផ្ទះមិននៅ រួចចាក់សោ ទើបសមត្ថកិច្ចពិបាកក្នុងការជួយអន្តរាគមន៍បាញ់ទឹកពន្លត់បានតែខាងក្រៅលើដំបូលតែប៉ុណ្ណោះ។
លោកស្នងការរង អ៊ុម ប៊ុនធឿន សំណូមពរដល់បងប្អូនប្រជាពលរដ្ឋទាំងអស់ មេត្តាជ្រាបថា គ្រប់ពេលដែលបងប្អូនមិននៅផ្ទះ សូមកុំដោតនៅសម្ភារៈដូចជា ឆ្នាំងដាំបាយ បំពង់ទឹកក្ដៅ ខ្សែភ្លើងសាកឧបករណ៍អេឡិចត្រូនិក ចំពោះខ្សែភ្លើងគួរតែកុំប្រើខ្សែតំណច្រើន ក្នុងករណីណាមិនចាំបាច់ត្រូវបិតឌីសង់ទ័រចោលតែម្ដង៕
Source: Kampuchea Thmey Daily
0 Comments