កំពង់ឆ្នាំង ៖ ម៉ូតូម៉ាកហុងដា អាល់ហ្វាគេចពន្ធចំនួន០៦គ្រឿង ត្រូវបានសមត្ថកិច្ចនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកំពង់ឆ្នាំង សហការជាមួយអធិការដ្ឋាននគរបាលមូលដ្ឋានស្ទាក់ចាប់បាននៅចំណុចជិតប៉ុស្តិ៍រដ្ឋបាលកំពង់អុស ស្រុកជលគិរី នៅវេលាម៉ោង៨និង៣០នាទីព្រឹក ថ្ងៃទី២៣ ខែមីនា ឆ្នាំ២០១៩ ក្នុងពេលជនសង្ស័យមួយក្រុម បាននាំគ្នាជិះម៉ូតូទាំងនោះ ឆ្លងកាត់ពីខេត្តកំពង់ចាម ចូលមកស្រុកជលគីរី នាំយកម៉ូតូទាំងនោះយកមកដាក់លក់នៅក្នុងខេត្តកំពង់ឆ្នាំង។
លោកវរសេនីយ៍ឯក ជិន សុផាត នាយការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា ក្នុងពេលទទួលបានបទបញ្ជា ពីលោកឧត្ដមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង នៅព្រឹកថ្ងៃទី ២៣ខែមីនា លោកបានដឹកនាំកម្លាំង សហការជាមួយសមត្ថកិច្ចនគរបាល ស្រុកជលគីរី និងប៉ុស្តិ៍រដ្ឋបាលកំពុងអូស ដាក់កម្លាំងចាំស្ទាក់ចាប់ ម៉ូតូគេចពន្ធនៅចំណុចខាងលើ ដោយចាប់ម៉ូតូចំនួន០៦គ្រឿង ជាប្រភេទម៉ូតូម៉ាក ហុងដា អាល់ហ្វា ផលិតនៅប្រទេសវៀតណាមអត់មានពន្ធ គឺគេចពន្ធ។
លោកនាយការិយាល័យ បានបញ្ជាក់ថា ម៉ូតូទាំងនេះ នាំចូលពីប្រទេសវៀតណាម ព្រំប្រទល់ខេត្តកំពង់ចាម កាត់មកខេត្តកំពង់ឆ្នាំងតាមស្រុកជលគីរី ក្នុងគោលបំណងយកមកដាក់តាំងលក់ នៅក្រុងកំពង់ឆ្នាំង ប៉ុន្តែត្រូវសមត្ថកិច្ចនគរបាលស្ទាក់ចាប់បាននៅវេលាម៉ោងប្រមាណជាង៨ព្រឹក និងបាននាំមកកាន់ស្នងការដ្ឋាននគរបាលខេត្ត កសាងសំណុំរឿងបញ្ជូនទៅកាន់មន្ត្រីរដ្ឋាករគយ ធ្វើការបង់ពន្ធទៅតាមផ្លូវច្បាប់។
ជាក់ស្តែងនៅរសៀលថ្ងៃដដែល មន្ត្រីសាខាគយខេត្តកំពង់ឆ្នាំងបានចុះមកពិនិត្យវាយតម្លៃ ហើយបានយកម៉ូតូទាំង០៦គ្រឿង ទៅស្នាក់ការសាខាគយ និងរដ្ឋាករ ខេត្តកំពង់ឆ្នាំង មានទីតាំងស្ថិតនៅ ភូមិទ្រា ឃុំស្រែថ្មី ស្រុករលាប្អៀរ ដើម្បីឲ្យម្ចាស់ម៉ូតូទាំងនោះចូលខ្លួនមកបង់ពន្ធម៉ូតូទៅតាមផ្លូវច្បាប់ ។
សូមបញ្ជាក់ថា ជារឿយៗ ម៉ូតូគេចពន្ធតែងនាំមកពីប្រទេសជិតខាងប្រទេសវៀតណាម និងប្រទេសថៃ ចូលមកកម្ពុជាហើយបានដាក់លក់នៅតាមទីផ្សារដោយមិនសូវឃើញមានការបង្ក្រាបឡើយ៕
Source: Kampuchea Thmey Daily
0 Comments