កំពង់ស្ពឺ ៖ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានថ្លែងឲ្យដឹងពីចក្ខុវិស័យរបស់សម្តេចក្នុងការរៀបចំកិច្ចប្រជុំកំពូលអាស៊ាននៅឆ្នាំ២០២២ ដែលកម្ពុជាធ្វើជាម្ចាស់ផ្ទះដោយសម្តេចបានបង្ហាញថា ការរៀបចំកិច្ចប្រជុំកំពូលអាស៊ាននឹងប្រារព្ធនៅទីក្រុងសៀមរាបនិងកិច្ចប្រជុំកំពូលអាស៊ាននិងដៃគូធ្វើឡើងនៅក្រុងព្រះសីហនុ។ សម្តេចបានលើកឡើងបែបនេះ នៅក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-ក្រុងព្រះសីហនុកាលពីព្រឹកថ្ងៃទី២២ ខែមីនា នេះ។
សម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា «ឥឡូវខ្ញុំកំពុងតែស្នើឲ្យក្រុមហ៊ុនមួយរបស់អ្នកវិនិយោគចិនកសាងមជ្ឈមណ្ឌលសន្និសីទអន្តរជាតិដ៏ធំមួយនៅក្រុងព្រះសីហនុ...ព្រោះខ្ញុំចង់ប្រជុំអាស៊ាននិងដៃគូពាក់ព័ន្ធនៅក្រុងព្រះសីហនុ នាចុងឆ្នាំ២០២២ ចឹងទេយើងអាចធ្វើទាន់»។
សម្តេចបន្តថា ព្រលានយន្តហោះអន្តរជាតិកងកេងអាចនឹងធ្វើទាន់នៅចុងឆ្នាំ២០២១ ដោយក្រុមហ៊ុនវ៉ាំងស៊ីរបស់បារាំងបានអះអាងថា ធ្វើទាន់ដែលអាចឲ្យយន្តហោះប្រភេទធំៗ មកពីឆ្ងាយអាចចុះចតបានរាប់ទាំងយន្ដហោះរបស់ប្រធានាធិបតីអាមេរិកក៏អាចមកចុះចតបានដែរ។ ក៏ប៉ុន្តែក្រុងព្រះសីហនុមិនទាន់មានមជ្ឈមណ្ឌលសន្និសីទអន្តរជាតិទេ អញ្ចឹងទេត្រូវសហការជាមួយក្រសួងការបរទេសដើម្បីរៀបចំ មជ្ឈមណ្ឌលនេះ។
សម្តេចបានបន្តថា ខ្ញុំចង់ប្រជុំអាស៊ាននៅសៀមរាបនៅក្នុងខែមេសាឆ្នាំ២០២២ ហើយនៅពេលដែលប្រជុំអាស៊ាននិងដៃគូពាក់ព័ន្ធ គឺធ្វើនៅក្រុងព្រះសីហនុ ដើម្បីឲ្យសៀមរាបទទួលបានមួយផ្នែក និង កំពង់សោមទទួលបានមួយផ្នែក។
សម្ដេចតេជោ ហ៊ុន សែន ក៏បានបង្ហើបផងដែរថា នាពេលខាងមុខនៅភ្នំពេញនិងខេត្តសៀមរាបនឹងត្រូវសាងសង់ព្រលានយន្ដហោះថ្មី ព្រោះថា តម្រូវការរបស់ប្រជាពលរដ្ឋមានការកើនឡើង ខណៈដែលពីដើមអត់មាននរណាមានលុយជិះសំបុត្រយន្ដហោះនោះទេ ប៉ុន្ដែឥឡូវនេះ ភ្នំពេញ-សៀមរាប មានមនុស្សពេញៗ។ ចក្ខុវិស័យរបស់សម្តេចគឺចង់ឲ្យមានព្រលានយន្តហោះអន្តរជាតិមួយទៀតនៅភូមិភាគឦសាន ប្រទេសគឺវាអាចស្ថិតនៅចន្លោះខេត្តមណ្ឌលគិរីនិងរតនគិរីដើម្បីឲ្យតំបន់នោះក្លាយជាពោលសេដ្ឋកិច្ចមួយដ៏សំខាន់នៅទិសឦសានរបស់ប្រទេស ដែលក្នុងនោះ វាជាតំបន់កសិ-ឧស្សាហកម្ម កសិ-ទេសចរណ៍ និងផ្នែកដទៃទៀតដែលកំពុងអភិវឌ្ឍន៍នៅទីនោះ។
សម្តេចតេជោនាយករដ្ឋមន្ត្រីបានបញ្ជាក់ថា ធ្វើបែបនេះគឺដើម្បីជំរុញប្រទេសកម្ពុជាពីប្រទេសដែលមានប្រាក់ចំណូលមធ្យមកម្រិតទាបនៅពេលនេះឲ្យក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងសម្រេចចក្ខុវិស័យនូវប្រាក់ចំណូលខ្ពស់នៅឆ្នាំ២០៥០។
កម្ពុជាធ្លាប់ធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន ២ដងរួចមកហើយ នៅរាជធានីភ្នំពេញគឺនៅឆ្នាំ២០០២ និងឆ្នាំ២០១២។
នៅក្នុងឱកាសនោះដែរ សម្តេចតេជោ ហ៊ុន សែន ក៏បានលើកឡើងពាក់ព័ន្ធនិងឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះស៊ីហ្គេម នោះសម្ដេចតេជោ ហ៊ុន សែន បានសម្រេចកំណត់យកខែឧសភាដើម្បីរៀបចំព្រឹត្តិការណ៍កីឡាស៊ីហ្គេមលើកទី៣២ នាឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះលើកដំបូងក្នុងប្រវត្តិសាស្ដ្រ។
សម្ដេចតេជោមានប្រសាសន៍ថា «ខ្ញុំសូមប្រកាសជូនប្រជាពលរដ្ឋទូទាំងប្រទេសថា ស៊ីហ្គេមឆ្នាំ ២០២៣ នឹងត្រូវធ្វើក្នុងខែឧសភា ឆ្នាំ២០២៣ ។ ហេតុអ្វីបានជាស៊ីហ្គេមត្រូវធ្វើក្នុងខែឧសភា ឆ្នាំ២០២៣? ដោយសារខែកក្កដា ឆ្នាំ២០២៣ គឺយើងត្រូវធ្វើការបោះឆ្នោតអញ្ចឹងក្រោយការបោះឆ្នោត ក្រែងមានបញ្ហានេះ បញ្ហានោះ ចឹងយើងធ្វើស៊ីហ្គេមក្នុងខែឧសភា ឆ្នាំ២០២៣ ដើម្បីទុកពេលសម្រាប់ការបោះឆ្នោត និងសម្រាប់ការរៀបចំរាជរដ្ឋាភិបាលថ្មីដើម្បីកុំឲ្យស្ទះការងារ»។
បន្ថែមលើនេះ សម្ដេចតេជោនាយករដ្ឋមន្ដ្រីបានបន្ដថា ផ្លូវល្បឿនលឿនពីភ្នំពេញ-ក្រុងព្រះសីហនុ ក៏អាចបម្រើដល់ការធ្វើម្ចាស់ផ្ទះស៊ីហ្គេមឆ្នាំ២០២៣ផងដែរ ព្រោះផ្លូវនេះនឹងធ្វើរួចរាល់ក្នុងខែមីនាឆ្នាំ២០២៣។ ដូច្នេះប្រភេទកីឡាខ្លះដែលត្រូវប្រកួតនៅតំបន់ឆ្នេរពិសេសខេត្តព្រះសីហនុ ពួកគេអាចប្រើប្រាស់ផ្លូវល្បឿនលឿននេះបាន ដោយសារកីឡាមិនមែនប្រកួតតតែមួយកន្លែងទេគឺមានប្រកួតច្រើនកន្លែងជាក់ស្ដែងដូចជាកីឡាទូកក្ដោង ត្រូវប្រកួតនៅសមុទ្រ មិនអាចប្រកួតតែនៅពហុកីឡដ្ឋានជាតិមរតកតេជោបានឡើយ។
គួរបញ្ជាក់ថា ការប្រកួតកីឡាស៊ីហ្គេមដែលជាព្រឹត្តិការណ៍កីឡាប្រចាំតំបន់អាស៊ាន ហើយតែងតែប្រារព្ធធ្វើឡើង ២ឆ្នាំម្ដង នឹងត្រូវរៀបចំលើកដំបូងនៅលើទឹកដីប្រទេសកម្ពុជា នាឆ្នាំ២០២៣។ ទន្ទឹមជាមួយគ្នានោះ ថ្នាក់ដឹកនាំរាជរដ្ឋាភិបាលដោយមានសម្ដេចតេជោ ហ៊ុន សែន ជានាយករដ្ឋមន្ដ្រីរួមទាំងក្រសួង និងស្ថាប័នពាក់ព័ន្ធ ក៏បានត្រៀមខ្លួនជាស្រេច ដើម្បីស្វាគមន៍ព្រឹត្តិការណ៍ជាប្រវត្តិសាស្ដ្រនេះផងដែរ៕
Source: Kampuchea Thmey Daily
0 Comments