អតីត​ជំទប់​ទី​២ អតីត​គណបក្ស​ស​សង្គ្រោះ​ជាតិ ត្រូវ​បាន​ចាប់ខ្លួន ក្រោយ​បង្ហោះ​ព័ត៌មាន​បំភ្លៃ​ការពិត​រឿង​កម្មករ​ចូលរួម​សំណេះសំណាល​ជាមួយ​សម្តេច​តេ​ជោ ហ៊ុន សែន នៅ​ពោធិ៍សាត់​

ភ្នំពេញ ​៖ ឈ្មោះ ឡុង សា​មាន មាន​ទីលំនៅ​ភូមិ​ឃ្លាំងមឿង ឃុំ​អន្លង់ត្នោត ស្រុក​ក្រគរ ខេត្តពោធិ៍សាត់ និង​ជា​អតីត​ជំទប់​ទី​២ អតីត​គណបក្ស​សង្គ្រោះ​ជាតិ (CNRP) ឃុំ​អន្លង់ត្នោត ត្រូវ​បាន​សមត្ថកិច្ច​ផ្នែក ផែនការ​ងារ សន្តិសុខ នៃ​ស្នងការដ្ឋាន​នគរបាល​ខេត្តពោធិ៍សាត់ ចាប់​ឃាត់ខ្លួន​សួរនាំ ក្រោយពី​បុគ្គល​នេះ បង្ហោះ​ព័ត៌មាន​បំភ្លៃ​ការពិត ទាក់ទង​កម្មករ កម្មការិនី ចូលរួម​សំណេះសំណាល​ជាមួយ​សម្តេច​អគ្គមហាសេនាបតី​តេ​ជោ ហ៊ុន សែន នៅ​ពោធិ៍សាត់ កាលពី​ថ្ងៃទី​២០ ខែមីនា ឆ្នាំ២០១៩ ហើយ​ក្រោយពី​សួរនាំ ឈ្មោះ ឡុង សា​មាន បាន​អះអាង​ថា អ្វី​ដែល​គេ​សរសេរ​បង្ហោះ​បំភ្លៃ​ការពិត​នេះ គឺជា​គោល​ការ​ណ៍​របស់​ថ្នាក់លើ (​អតីត​គណបក្ស​ស​សង្គ្រោះ​ជាតិ​)​។



ឈ្មោះ ឡុង សា​មាន អាយុ​៣៩​ឆ្នាំ ដែល​មាន​កំរិត​វប្បធម៌​ថ្នាក់​ទី​១២ និង​មានកូន​ក្នុង​បន្ទុក​ចំនួន​៣​នាក់​ផង​នោះ បាន​សារភាព​នៅ​ចំពោះមុខ​សមត្ថកិច្ច​ថា ការសរសេរ​ព័ត៌មាន​មិន​ពិត ហើយ​បង្ហោះ​ព័ត៌មាន​តាម​ហ្វេ​ស​ប៊ុ​ក​នេះ គឺ​ធ្វើ​ឡើង​តាម​លំនាំ​របស់​ថ្នាក់ដឹកនាំ​អតីត​គណបក្ស​សង្គ្រោះ​ជាតិ (CNRP) គឺ​លោក Niv Chamroeun II ហើយ​រូបភាព​កម្មករ ដែល​បាន​យក​ទៅ​បង្ហោះ​នោះ គឺ​កូ​ពី​ចេញពី​ហ្វេ​ស​ប៊ុ​ក មិនមែនជា​រូប​ពិត នៅក្នុង​សំណេះសំណាល​នោះ​ទេ​។ ឈ្មោះ ឡុង សា​មាន បន្ត​ថា សកម្មភាព​បង្ហោះ​ព័ត៌មាន​តាម​ហ្វេ​ស​ប៊ុ​ក​បំភ្លៃ​ព័ត៌មាន​នេះ គេ​បាន​ធ្វើ​ជាច្រើនលើក​រួចមក​ហើយ និង​ត្រូវបាន​អាជ្ញាធរ​អប់រំ ជាច្រើនលើក​រួច​មក​ហើយ ប៉ុន្តែ​គេ​នៅតែ​បន្ត​ប្រព្រឹត្ត​រហូតដល់​ពេល​សមត្ថ​កិច្ច​ឃាត់ខ្លួន នាពេលនេះ​។

សូម​បញ្ជាក់​ថា កាលពី​ព្រឹក​ថ្ងៃ ទី​២០ ខែមីនា ឆ្នាំ​២០១៩ សម្តេច​អគ្គមហាសេនាបតី​តេ​ជោ ហ៊ុន សែន នាយក រដ្ឋមន្ត្រី​នៃ​ព្រះរាជាណាចក្រ​កម្ពុជា បាន​អញ្ជើញ​ជួប​សំណេះសំណាល​ជាមួយ​កម្មករ កម្មការិនី​សរុប​ប្រមាណ​១០,៦៨៩​នាក់ មកពី​រោងចក្រ​សហគ្រាស​ចំនួន​៦ នៅក្នុង​ខេត្តពោធិ៍សាត់ ដែល​ជំនួប​សំណេះសំណាល​នេះ បាន​ធ្វើ​ឡើង​នៅ​ភូមិ​វាលវង់ ឃុំ​ស្នា​អ​ន្សា ស្រុកក្រគរ ខេត្តពោធិ៍សាត់​។ តែ​អ្វី​ដែល​អស់សំណើច​នោះ ខណៈ​ដែល​ពេលវេលា​ជំនួប​មិនទាន់​មកដល់​ផង ឈ្មោះ​ឡុង សា​មាន បាន​បង្ហោះ​ព័ត៌មាន​ថា កម្មករ​ដែល​ត្រូវ​ចូលរួម​ក្នុង​ពិធី​សំណេះសំណាល​ជាមួយ​សម្តេច​តេ​ជោ ហ៊ុន សែន នោះ គឺ​ត្រូវ​ថៅកែ​បង្ខំ​ឲ្យ​ងើប​តាំងពី​ម៉ោង​៣​រៀប​ភ្លឺ ដើម្បី​ទៅ​អូស​កាត​នៅ​រោងចក្រ ហើយ​ត្រូវ​ដើរ​ចំងាយ​ជាង​១​គីឡូម៉ែត្រ ធ្វើ​ឲ្យ​អត់ងងុយ ហើយ​បើ​កម្មករ​ណា​មិន​ចូលរួម​ពិធី​សំណេះសំណាល​នោះ នឹងត្រូវ​កាត់​ប្រាក់ខែ​ជាដើម​។



តាម​ចម្លើយ​សារភាព​របស់​ឈ្មោះ ឡុង សា​មាន អ្វី​ដែល​គេ​បាន​សរសេរ និង​បង្ហោះ​នៅតាម​បណ្តាញ​សង្គម​ហ្វេ​ស​ប៊ុ​ក គឺ​គេ​ទទួល​បាន​ពី​វិទ្យុ​អាស៊ីសេរី និង​វី​អូ​អេ ជាដើម​។ ឈ្មោះ ឡុង សា​មាន បានបញ្ជាក់​យ៉ាងនេះ​ថា “​ខ្ញុំ​មិនបាន​ដឹង​ព័ត៌មាន​ទាំងនោះ​ពិតប្រាកដ​ទេ ខ្ញុំ​គ្រាន់តែ​លឺ​តាម​វិទ្យុ​អាស៊ីសេរី​, VOA និង​តាម​បណ្តាញ​សង្គម​ហ្វេ​ស​ប៊ុ​ក​ប៉ុណ្ណោះ​៕

Source: Kampuchea Thmey Daily