ភ្នំពេញ ៖ ស្នាមញញឹមលាយឡំដោយសំណើចរបស់កម្មករ,កម្មការិនី និងអតីតកម្មករដែលធ្លាប់បំពេញការងារនៅសាធារណរដ្ឋកូរ៉េក្នុងឱកាសជួបជុំពិសារបាយសាមគ្គីកាលពីរសៀលថ្ងៃទី១១ ខែមីនា ដែលរៀបចំដោយលោក ឡុង ឌីម៉ង់ ឯកអគ្គរាជទូតកម្ពុជា ប្រចាំនៅប្រទេសកូរ៉េ និងលោកស្រីបានបង្ហាញពីមោទនភាពនៃការរីកចម្រើនលើជីវភាពរស់នៅប្រចាំថ្ងៃរបស់ពួកគេ និងជំនាញវិជ្ជាជីវៈក្រោយពីបងប្អូនបានឆ្លងកាត់បទពិសោធន៍ការងារនៅប្រទេសកូរ៉េ។
ជាអ្នកការទូតវៃក្មេងដែលបានបំពេញការងារជាឯកអគ្គរាជទូតជិត៣ឆ្នាំប្រចាំប្រទេសកូរ៉េលោកឡុង ឌីម៉ង់ បានលើកឡើងថា ក្នុងនាមជាយុទ្ធជនជួរមុខលើសមរភូមិការទូត គឺត្រូវតែការពារផលប្រយោជន៍,អធិបតេយ្យភាពជាតិ និងកិត្តិយសជាតិនៅបរទេស។
លោកឡុង ឌីម៉ង់ បន្តថា ៖ បច្ចុប្បន្នមានជនជាតិកម្ពុជាជាពលករ,ជាសិស្ស,ជាអ្នកបំពេញការងារជាដើមមានជាង៦ម៉ឺននាក់នៅកូរ៉េ។ មានកិច្ចជាច្រើនដែលក្រុមការងារស្ថានទូតកម្ពុជានៅកូរ៉េត្រូវបំពេញ ជាពិសេសជាអ្នកបម្រើសេវាសាធារណៈ និងដោះស្រាយរាល់បញ្ហាជូនពលករ ពលការិនីដោយការទទួលខុសត្រូវនិងប្រកបដោយឆន្ទៈ។ ជាមួយគ្នានេះ សាធារណរដ្ឋកូរ៉េ បានផ្តល់កិច្ចសហការយ៉ាងល្អប្រសើរលើវិស័យការងារធ្វើឲ្យពលករ,ពលការិនី របស់យើងអាចមានប្រាក់ចំណូលអតិបរមា១៥០០ដុល្លារក្នុង១ខែ និងបានផ្ញើប្រាក់មកជួយក្រុមគ្រួសារនៅក្នុងប្រទេសជាង៦០០លានដុល្លារក្នុងមួយឆ្នាំ។
លោកឯកអគ្គរាជទូតបន្ថែមថា យើងតែងប្រកាន់ស្មារតីទទួលខុសត្រូវ និងធ្វើការជាក្រុមរបស់ក្រុមការងារស្ថានទូតដើម្បីផលប្រយោជន៍ប្រជាពលរដ្ឋកម្ពុជា នៅកូរ៉េ មិនដូចពួកអគតិខំប្រឹងឃោសនាបង្ខូចកិត្តិយសជាតិដោយអយុត្តិធម៌នោះទេ។
ក្នុងកិច្ចសហប្រតិបត្តិការដ៏ល្អរវាងកម្ពុជានិងកូរ៉េនាពេលនេះដែរ ប្រធានាធិបតីនៃសាធារណរដ្ឋកូរ៉េ លោកម៉ូនជេ អ៊ីន នឹងអញ្ជើញមកបំពេញទស្សនកិច្ចផ្លូវរដ្ឋនៅកម្ពុជារយៈពេល៣ថ្ងៃចាប់ពីថ្ងៃទី១៤ដល់ថ្ងៃទី១៦មីនា ឆ្នាំ២០១៩នេះដែលស្របទៅនឹងគោលនយោបាយបើកចំហមកកាន់ទិសខាងត្បូង របស់កូរ៉េ៕
Source: Kampuchea Thmey Daily
0 Comments