និយតករអាមេរិកបានបញ្ជាឲ្យក្រុមហ៊ុន Boeing ធ្វើការកែលម្អជាបន្ទាន់ដល់យន្តហោះប្រភេទ 737 Max 8 ដ៏មានប្រជាប្រិយភាពរបស់ខ្លួនបន្ទាប់ពីគ្រោះថ្នាក់សម្លាប់មនុស្សជាលើកទីពីរក្នុងរយៈពេលពីរបីខែបានជំរុញឲ្យមានការផ្អាកការហោះហើរនៅទូទាំងពិភពលោក។
កាលពីថ្ងៃអង្គារ ប្រទេសសិង្ហបុរីបានហាមឃាត់ការប្រើប្រាស់យន្តហោះមានបច្ចេកវិទ្យាខ្ពស់នៅក្នុងដែនអាកាសរបស់ខ្លួនហើយបានក្លាយជាប្រទេសចុងក្រោយគេបង្អស់ក្នុងបញ្ជីដែនយុត្តាធិការដែលកំពុងមានការព្រួយបារម្ភអំពីសុវត្ថិភាពរបស់យន្តហោះ។
កាលពីថ្ងៃអាទិត្យ យន្តហោះ Boeing 737 MAX 8 របស់ក្រុមហ៊ុនអាកាសចរណ៍អេត្យូពីបានធ្លាក់បន្ទាប់ពីហោះហើរបានប៉ុន្មាននាទីឆ្ពោះទៅកាន់ទីក្រុង Nairobi ដោយបានសម្លាប់មនុស្សទាំងអស់១៥៧នាក់នៅលើយន្តហោះ។ វាបានកើតឡើងបន្ទាប់ពីយន្ដហោះម៉ាកដូចគ្នារបស់ក្រុមហ៊ុន Lion Air បានធ្លាក់នៅក្នុងប្រទេសឥណ្ឌូនេស៊ីកាលពីខែតុលាដោយបានសម្លាប់មនុស្សចំនួន១៨៩នាក់។
ក្រុមអ្នកស៊ើបអង្កេតបានរកឃើញប្រអប់ខ្មៅរបស់យន្តហោះនៃក្រុមហ៊ុនអាកាសចរណ៍អេត្យូពីដែលបានធ្លាក់នៅក្បែរទីក្រុង Addis Ababa ហើយកំពុងដឹកអ្នកដំណើរនិងអាកាសយានិកមកពី ៣៥ប្រទេសរួមទាំងបុគ្គលិកអង្គការសហប្រជាជាតិជាច្រើននាក់ផងដែរ។
រដ្ឋបាលអាកាសចរណ៍សហព័ន្ធអាមេរិក (FAA) បាននិយាយកាលពីថ្ងៃចន្ទថា ខ្លួនបានបញ្ជាឲ្យក្រុមហ៊ុន Boeing ធ្វើឲ្យប្រសើរឡើងនូវកម្មវិធីប្រឆាំងការគាំងម៉ាស៊ីនយន្តហោះនិងប្រព័ន្ធបញ្ជារបស់ម៉ូឌែលនេះដោយផ្តល់ពេលឲ្យក្រុមហ៊ុននេះរហូតដល់ចុងខែមេសាដើម្បីធ្វើបច្ចុប្បន្នភាព។
ប៉ុន្តែស្ថាប័ននេះបានសម្រេចផ្អាកការហោះហើរសម្រាប់ពេលនេះ។ ស្ថាប័ននេះបាននិយាយថា ការស៊ើបអង្កេតទើបតែចាប់ផ្តើមប៉ុណ្ណោះហើយរហូតមកដល់ពេលនេះគ្មានទិន្នន័យណាមួយត្រូវបានផ្តល់ឲ្យដើម្បីធ្វើការសន្និដ្ឋានឬចាត់វិធានការណាមួយឡើយ។
ស្ថាប័ននេះបានឲ្យដឹងក្នុងសេចក្តីថ្លែងការណ៍មួយថា “ប្រសិនបើយើងកំណត់បានបញ្ហាដែលប៉ះពាល់ដល់សុវត្ថិភាព, FAA នឹងចាត់វិធានការភ្លាមៗនិងសមស្រប”។
គួរបញ្ជាក់ថា ការប្រកាសរបស់និយតករសិង្ហបុរីថា យន្តហោះ MAX គ្រប់ប្រភេទទាំងអស់ត្រូវបានហាមឃាត់ពីដែនអាកាសរបស់ខ្លួនគឺបានធ្វើឡើងបន្ទាប់ពីប្រទេសចិនបានបញ្ជាឲ្យក្រុមហ៊ុនអាកាសចរណ៍ក្នុងស្រុកផ្អាកប្រតិបត្តិការពាណិជ្ជកម្មរបស់យន្តហោះ MAX 8 ហើយប្រទេសឥណ្ឌូនេស៊ីបានផ្អាកយន្ដហោះទាំងអស់របស់ខ្លួនសម្រាប់ការត្រួតពិនិត្យ។
ក្រុមហ៊ុនអាកាសចរណ៍អេត្យូពីបានផ្អាកយន្តហោះ MAX 8 ដែលនៅសេសសល់របស់ខ្លួនខណៈក្រុមហ៊ុនអាកាសចរណ៍ក្នុងប្រទេសអាហ្វ្រិកខាងត្បូង ប្រេស៊ីលនិងម៉ិកស៊ិកបានដកយន្តហោះប្រភេទនេះពីការហោះហើរហើយអាកាសយានិកមកពីក្រុមហ៊ុន Aerolineas Argentinas របស់ប្រទេសអាហ្សង់ទីនបានបដិសេធហោះហើរ។
រដ្ឋាភិបាលម៉ាឡេស៊ីបានបញ្ជាឲ្យពិនិត្យឡើងវិញជាបន្ទាន់នូវការបញ្ជាទិញយន្តហោះ MAX ជាច្រើនគ្រឿងដោយក្រុមហ៊ុនអាកាសចរណ៍ម៉ាឡេស៊ី៕ AFP
Source: Kampuchea Thmey Daily
0 Comments