ស្ទឹងត្រែង ៖ ក្រោមបញ្ជារបស់ឯកឧត្តមម៉ុមសារឿន អភិបាលខេត្តស្ទឹងត្រែង បានបញ្ជាឱ្យកម្លាំងសមត្ថកិច្ចចុះការពារព្រៃឈើ ដែលនៅសេសសល់នៅក្នុងរដ្ឋបាលខេត្តទាំងមូល។
ក្នុងប្រតិបត្តិការចុះការពារព្រៃធម្មជាតិជីវចម្រុះនៅក្នុងរដ្ឋបាលខេត្តស្ទឹងត្រែងរយៈពេលបីខែកន្លងមកនេះ កម្លាំងសមត្ថកិច្ចការិយាល័យប្រឆាំងបទល្មើសសេដ្ឋកិច្ចខេត្តដឹកនាំដោយលោកវរសេនីយ៍ឯកវ៉ាសុផាន់ នាយការិយាល័យប្រឆាំងបទល្មើសសេដ្ឋកិច្ចខេត្ត បានសហការជាមួយកម្លាំងរដ្ឋបាលព្រៃឈើស្រុកថាឡាបរិវ៉ាត់ ចុះឃាត់រថយន្តបាកុងដឹកឈើឡាំងបួនជ្រុងមុខកាត់ចាប់ពី 50 ទៅដល់ 60 សង់ទីម៉ែត្រដែលមានប្រវែងចាប់ពី 6 ម៉ែត្រទៅ 8 ម៉ែត្រចំនួន 1 រថយន្តប្រមាណជាជិត 10 ម៉ែត្រគូប។
ប្រភពព័ត៌មានបានឲ្យដឹងថា រថយន្តឪរ៉ាល់បាកុង ដែលដឹកឈើឡាំបួនជ្រុងៗធំនេះ បានធ្វើសកម្មភាពជាយូរខែមកហើយ ដោយសារមានការត្រូវរ៉ូវពីរដ្ឋបាលព្រៃឈើស្រុកថាឡាបរិវ៉ាត់ និងមានយោធាជាអ្នកកាងផងដែរ។
បន្ទាប់ពីមានបទបញ្ជាពីឯកឧត្តមម៉ុមសារឿនអភិបាលខេត្តកម្លាំងការិយាល័យប្រឆាំងបទល្មើសសេដ្ឋកិច្ចខេត្តដឹកនាំដោយលោកវរសេនីយ៍ឯក វ៉ាសុផាន់ បានចុះ ស្រាវជ្រាវលើទីកន្លែងកំពុងធ្វើសកម្មភាពបានជួបរថយន្តបាកុងមួយគ្រឿងកំពុងធ្វើសកម្មភាពដឹកចេញពីទីតាំងដីរដ្ឋបាលខេត្តស្ទឹងត្រែងក្នុងស្រុកថាឡាបរិវ៉ាត់ទៅកាន់ខេត្តព្រះវិហារ ដែលគេដឹងថាដឹកយកទៅលក់ឱ្យក្រុមហ៊ុនមួយឈ្មោះក្រុមហ៊ុនឌីឌុកដែលមានទីតាំងនៅក្នុងស្រុកឆែប។
លោកវរសេនីយ៍ឯកនាយការិយាល័យប្រឆាំងបទល្មើសសេដ្ឋកិច្ចបានបញ្ជាក់ថា ការចុះបង្ក្រាបនិងចុះស្រាវជ្រាវគ្រប់ទីតាំងធ្វើសកម្មភាពនេះ គឺអាជ្ញាធរខេត្តបានបញ្ជាកម្លាំងដើម្បីរក្សាការពារព្រៃឈើនិងធនធានធម្មជាតិដែលនៅសេសសល់ចុងក្រោយ ហើយការចាប់រថយន្តដឹកឈើនៅក្នុងរដ្ឋបាលខេត្តស្ទឹងត្រែងនេះ ព្រោះក្រុមហ៊ុនដែលនៅខេត្តផ្សេងបានចូលមកកាប់ធ្វើឱ្យប៉ះពាល់ដល់ខេត្តទាំងមូលដែលខេត្តកំពុងតែរក្សាការពារ បែរជាឈ្មួញនៅខេត្តព្រះវិហារបានចូលមកកាប់ឈើនៅក្នុងទឹកដីខេត្តស្ទឹងត្រែងធ្វើឲ្យបាត់បង់ព្រៃឈើក្នុងរដ្ឋបាលខេត្តកំពុងរក្សាការពារ។
លោកវរសេនីយ៍ឯកវ៉ាសុផាន់នាយការិយាល័យប្រឆាំងបទល្មើសសេដ្ឋកិច្ចបានបញ្ជាក់ថា នៅថ្ងៃទី 12 មីនានេះផងដែរ កម្លាំងរបស់លោកក៏កំពុងតែបន្តប្រតិបត្តិការនៅតាមតំបន់នានាមួយចំនួនដែលក្រុមឈ្មួញកំពុងធ្វើសកម្មភាពដើម្បីធ្វើការទប់ស្កាត់ក្នុងការកាប់បំផ្លាញព្រៃឈើខុសច្បាប់បន្តទៅទៀត។
លោកបន្តថា រថយន្ត បាកុងដែលបង្ក្រាបបានមានឈើចំនួន 8 ដើមប្រវែងចាប់ពី 6 ម៉ែត្រទៅ 8ម៉ែត្រនេះបច្ចុប្បន្នត្រូវបានគេបញ្ជូនមកកាន់សង្កាត់សំអានក្នុងផ្នែករដ្ឋបាលព្រៃឈើថាឡាបរិវ៉ាត់ដើម្បីចាត់ការបន្តទៅតាមនីតិវិធី។
សូមបញ្ជាក់ថា ក្រុមហ៊ុនឌីឌុកដែលមានច្បាប់អនុញ្ញាតពីរដ្ឋាភិបាលនៅក្នុងស្រុកឆែបដែលនៅជាប់ព្រំប្រទល់ខេត្តស្ទឹងត្រែង កំពុងតែធ្វើសកម្មភាពខុសច្បាប់ដែលបំផុសឱ្យប្រជាពលរដ្ឋកាប់ឈើពីតំបន់នានាក្រៅពីក្រុមហ៊ុនដឹកយកទៅលក់ឲ្យខ្លួនដើម្បីទៅជាឈើស្របច្បាប់។ បញ្ហានេះធ្វើឲ្យព្រៃឈើជាច្រើនដែលនៅក្រៅតំបន់ក្រុមហ៊ុនជាពិសេសនៅក្នុងរដ្ឋបាលខេត្តស្ទឹងត្រែង ត្រូវបានក្រុមឈ្មួញកាប់ដឹកជញ្ជូនយកទៅលក់ឲ្យក្រុមហ៊ុននោះផងដែរ៕
Source: Kampuchea Thmey Daily
0 Comments