•ឡូញ វ៉ាន់ឌី ជួប ថន ភឿត
មាស សុជាតិ អ្នកប្រដាល់ក្លិបឃ្លាំងមឿងកីឡា ត្រូវគេផ្គូឲ្យជួបប្រកួតជាមួយអ្នកប្រដាល់អ៊ីរ៉ង់ឈ្មោះ កាហ្វារី (Gafari Goloojeh) នៅក្នុងកម្មវិធីប្រដាល់Boostrong Fighter On Fire នៅសង្វៀនទូរទស្សន៍ប៉ុស្តិ៍អាស៊ីអាគ្នេយ៍(SEATV) នាព្រឹកថ្ងៃអាទិត្យ ទី២៤ ខែមីនា ឆ្នាំ២០១៩នេះ។ ពីរនាក់នេះ ជួបប្រកួតគ្នាក្នុងទម្ងន់៦៥គីឡូក្រាម។
កាហ្វារី ពុំមែនជាជើងខ្លាំងនោះទេ គេទើបមកស្រុកលើកដំបូងប៉ុណ្ណោះ។ ទាំងពីរនាក់នេះ មិនធ្លាប់ប៉ះគ្នាទេកន្លងមក។ ដូច្នេះ ការជួបប្រកួតលើកនេះ មិនដឹងថា នរណាជួបសំណាងល្អ នរណាជួបសំណាងអាក្រក់នោះទេ?។
មាស សុជាតិ គេវាយលឿន រហ័ស និងខ្លាំង ប៉ុន្តែហាក់ដូចជាមិនសូវមានផ្លែល្អនោះឡើយ។ ប៉ុន្តែយ៉ាងណា គេជាអ្នកប្រដាល់ដែលមានកម្លាំងកាយសម្បទារឹងមាំ។ សុជាតិ មានប្រវត្តិប្រកួតចំនួន៨៥លើក ឈ្នះ៦៣លើក ចាញ់២០លើក និងស្មើ០២លើក។
កាហ្វារី គេក៏ល្អនិងខ្លាំងដែរ។ អ្នកប្រដាល់អ៊ីរ៉ង់រូបនេះ គេមានភាពខ្លាំងខាងកណ្ដាប់ដៃ តែជង្គង់ និង កែង គេមិនសូវប្រសប់ប៉ុន្មានទេ។ គេវាយមួយៗទេ តែច្បាស់ និងចំគោលដៅល្អ។ កាហ្វារី គេមានប្រវត្តិប្រកួតតែចំនួន១៨លើក ឈ្នះ១១លើក ចាញ់០៧លើក និងមិនដែលស្មើ។
ទោះជាយ៉ាងនេះក្តី សម្រាប់ការប្រកួតលើកនេះ មិនដឹងថា មាស សុជាតិ អាចឈ្នះ កាហ្វារី បាន ឬអត់នោះទេ?។ តែយ៉ាងណា កាហ្វារី ក៏ប្រហែលជាមិនឈ្នះ មាស សុជាតិ នោះដែរ ដោយសារគេខ្លាំងសម្រុកវាយយកៗ មិនដកដៃឡើយ។ ដោយសារបែបនេះហើយ ទើបក្រុមអ្នកវិភាគកីឡាប្រដាល់ក្នុងស្រុក ក៏គេមិនហ៊ានថា កាហ្វារី ឈ្នះមាស សុជាតិ នោះដែរ?។
កាហ្វារី នេះ គេមិនធ្លាប់មកប្រកួតនៅស្រុកខ្មែរទេកន្លងមក។ បើតាម លោកថៃ អ៊ូ អ្នកដឹកនាំកីឡាករថៃមកប្រកួតឲ្យដឹងថា អ្នកប្រដាល់អ៊ីរ៉ង់រូបនេះ មានថ្វីដៃល្អ និងវាយខ្លាំង ដោយសារគេមានកាយសម្បទាខ្លាំង និងកម្ពស់ខ្ពស់ថែមទៀត។ គេជាអ្នកប្រដាល់ជើងថ្មី ដោយគេមិនធ្លាប់មកប្រកួតនៅកម្ពុជានោះឡើយ។ អ្នកប្រដាល់អ៊ីរ៉ង់រូបនេះ មានសមត្ថភាពបច្ចេកទេសប្រដាល់កម្រិតទាប តែយ៉ាងណា មាស សុជាតិ មិនអាចមើលស្រាលបានឡើយ។
ដូច្នេះ ចាំមើលមាស សុជាតិ ជួបអ្នកប្រដាល់អ៊ីរ៉ង់កាហ្វារីលើកនេះ តើគេអាចយកឈ្នះបានដែរ ឬអត់?។
ឡូញ វ៉ាន់ឌី អ្នកប្រដាល់ក្លិបវិបុលដារិទ្ធមានរិទ្ធ នឹងជួបប្រកួតជាមួយ ថន ភឿត អ្នក ប្រដាល់ក្លិបឃ្លាំងមឿងកីឡា។ ពីរនាក់នេះ ជួបគ្នាក្នុងទម្ងន់៦០គីឡូក្រាម។
សេន កុសល អ្នកប្រដាល់ក្លិបមោងឬស្សីមរតកគុនខ្មែរ ត្រូវជួបប្រកួតជាមួយសុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ ដោយប្រកួតក្នុងទម្ងន់៦០គីឡូក្រាមដែរ។ រីឯ នួន ម៉ារ៉ាឌី អ្នកប្រដាល់ក្លិបភារម្យគុនខ្មែរ នឹងត្រូវជួបប្រកួតជាមួយសេក សាវ៉ាន់ អ្នកប្រដាល់ក្លិបអង្គរមានជ័យខេត្តសៀមរាប។ ពួកគេទាំងពីរ ប្រកួតគ្នា ក្នុងទម្ងន់៥១គីឡូក្រាម៕
Source: Kampuchea Thmey Daily
0 Comments