បន្ទាយមានជ័យ ៖ លោក សួន បវរ អភិបាលខេត្តបន្ទាយមានជ័យ បានថ្លែងកោតសរសើរម្ចាស់ផ្សាររាត្រីT M ក្នុងពិធីបើកការដ្ឋានធ្វើផ្លូវក្រាលកៅស៊ូ១ខ្សែ ដែលមានផ្ទៃក្រឡាជិត៤.០០០ម៉ែត្រក្រឡា ស្ថិតនៅខាងកើតសួនមានជ័យ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ នៅព្រឹកថ្ងៃទី២៥ ខែមីនា ឆ្នាំ២០១៩ថា នេះជាមោទនភាពយ៉ាងធំធេងណាស់សម្រាប់ខេត្តបន្ទាយមានជ័យ ដែលមានផ្សាររាត្រីT M ដ៏ធំមួយដំបូងគេបង្អស់ ដែលមានអាជីវករលក់ដូររាប់រយតូប និងមានទំនិញដាក់លក់គ្រប់មុខ និងទំនិញហូបចុកមិនខ្វះដាក់លក់ក្នុងផ្សាររាត្រីយ៉ាងស្រស់ត្រកាល មានសោភ័ណភាព ធ្វើឲ្យអ្នកចូលទិញៗមិនចេះជិនណាយ។
បើតាមការអះអាងរបស់ លោក ជា សុវណ្ណធួន និង អ្នកស្រី ប្លុង មុំ ម្ចាស់ផ្សាររាត្រីTMបានប្រាប់លោកអភិបាលខេត្តឲ្យដឹងថា ផ្សាររាត្រីTM របស់លោកចាប់ផ្ដើមសាងសង់នៅទី១ ខែមករា ឆ្នាំ ២០១១ ចាប់ផ្ដើមចូលលក់ ថ្ងៃ១ ខែមករា ឆ្នាំ២០១២ ស្ថិតនៅតាមផ្លូវបេនឡានថ្មី តាមស្ពានថ្មថ្មីប្រហែល១០០ម៉ែត្រ ក្នុងភូមិព្រៃឫស្សី សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ ផ្សារនេះ ចាប់ផ្ដើម គឺអាជីវករចូលលក់មានតូបប្រហែល២០តែប៉ុណ្ណោះ រហូតដល់មានអាជីវករចូលលក់២៨០តូប។
លោក ជា សុវណ្ណធួន បានប្រាប់ឲ្យដឹងទៀតថា ផ្សាររាត្រីTMនេះ ជោគជ័យរហូតមកដល់សព្វនេះដោយសារតែអាជីវករចូលលក់ដំបូងចេះរៀបចំកែច្នៃតូបដាក់ភ្លើងចម្រុះ លាបពណ៌ ពិសេសអីវ៉ាន់ដាក់លក់មានរបៀប ហើយតម្លៃដាក់លក់ជាក់លាក់ មិនកាត់ថ្លៃមិនកោរអ្នកទិញ អាចទិញយកទៅប្រើប្រាស់បាន។
លោកបានប្រាប់ឲ្យដឹងទៀតថា ដោយសារតែផ្សារមានសោភ័ណភាពមានសួនច្បារសម្រាប់ក្មេងលេង ពិសេសទៅទៀតនោះ មានអភិរក្សត្រីស្ទឹងធម្មជាតិទៀតផង ធ្វើឲ្យទាក់ទាញមានប្រជាពលរដ្ឋចូលមកទិញយ៉ាងគគ្រឹកគគ្រេងពី១ថ្ងៃ ទៅ១ថ្ងៃតូបចំនួន២៨០តូប ត្រូវអតិថិជនទិញយកអស់។
លោកបានបញ្ជាក់ទៀតថា ផ្សាររាត្រីរបស់លោកចាប់បើកលក់ពីម៉ោង១រសៀល ដល់ម៉ោង១២យប់ ហើយទំនិញដាក់លក់មានដូចជា ខោ អាវ កាបូប ស្បែកជើង ឥវ៉ាន់សម្រាប់ផ្ទះបាយ គ្រប់មុខមានគ្រឿងក្រអូប គ្រឿងហូបចុក មានដូចជា គុយទាវ គ្រឿងក្លែម បង្អែម ហើយមានសន្តិសុខល្អយាមទាល់ភ្លើងភ្លឺពេញផ្សារ។
លោកស្រីផល ផល្លា អាជីវករលក់ដំបូងគេបង្អស់បាននិយាយប្រាប់អ្នកយកព័ត៌មានឲ្យដឹងដែរថាគាត់ចូលមកលក់នៅផ្សាររាត្រីតាំងតែអ្នកលក់មានតែ២០ប៉ុណ្ណោះ លក់មិនសូវដាច់ទេ ដោយសារការតស៊ូ និងព្យាយាមជាកូន និងកូនប្រសារិះរកធ្វើអ្វីប្លែកៗ ហើយមានដាក់លក់ឥវ៉ាន់ប្លែក ធ្វើតូបលាបពណ៌ឲ្យបានស្អាត ស្រស់ ស្រាប់តែមានភ្ញៀវចូលមកទិញចាប់បើកលក់រហូតដល់បិតតូប។
លោកស្រី ផល ផល្លា បានប្រាប់បញ្ជាក់ឲ្យដឹងទៀតថា គាត់លក់តាំងពីតូប១ រហូតដល់តូប៤ កូនប្រសា២តូប គាត់២ការលក់ដូររបស់គាត់រហូតមកដល់សព្វថ្ងៃនេះ ជិត៧ឆ្នាំហើយ នៅតែលក់ដាច់រហូតធ្វើឲ្យជីវភាពរបស់ក្រុមគ្រួសាររបស់ធូរធារយ៉ាងច្រើន មិនបាច់ទៅធ្វើចំណាកស្រុកនាំតែហត់។
ចំណែក លោក ខុន ប៊ុន ជាមេការលក់គុយទាវ ថែ ណាមតុក ក៏បានប្រាប់អ្នកយកព័ត៌មានឲ្យដឹងដែរថា ថៅកែរបស់គាត់កាលពីមុនបានធ្វើចំណាកស្រុកស៊ីឈ្នួលលក់គុយទាវឲ្យថៃជាច្រើនឆ្នាំមកហើយ ដោយសារតែការព្យាយាម តស៊ូ លួចមើលចំណេះ និងរូបមន្តពីថៃយកមកអនុវត្តលក់នៅផ្សាររាត្រីនេះ បានជោគជ័យយ៉ាងខ្លាំង គ្រាន់តែលក់បានតែ២ឆ្នាំសោះ គុយទាវណាមតុក របស់គាត់ល្បីយ៉ាងខ្លាំង លោកចាប់បើកលក់ពីម៉ោង២ មានភ្ញៀវចូលហូបភ្លាមពេលខ្វះភ្ញៀវខ្ជិលដាំបាយហូបមកហូបគុយទាវរបស់លោកជាគ្រួសារក៏មានដែរគាត់បានបញ្ជាក់ទៀតថា ពាក្យចាស់ លោកពោលថាសេចក្ដីព្យាយាមតែងតែបានសម្រេចទោះបីតិចក្តីច្រើនក្តី។
លោក ជា សុវណ្ណធួន និង អ្នកស្រីប្លុងមុំម្ចាស់ផ្សាររាត្រីTM បានប្រាប់អ្នកយកព័ត៌មានឲ្យដឹងថា ដោយសារតែមានអតិថិជនមានការគាំទ្រផ្សាររបស់លោកច្រើនឥតគណនានោះ ធ្វើឲ្យប្រជាពលរដ្ឋមានភាពកក់ក្តៅយ៉ាងខ្លាំង នាំគ្នាចាប់ផ្ដើមបុកគ្រឹះសាងសង់ផ្ទះល្វែងជុំវិញផ្សាររីកដូចផ្សិត ដើម្បីពង្រីកមុខរបរតែរៀងខ្លួនៗបន្តទៀត៕
Source: Kampuchea Thmey Daily
0 Comments