នាយករដ្ឋមន្ត្រីកាណាដាលោក Justin Trudeau កាលពីថ្ងៃព្រហស្បតិ៍បានបដិសេធការចោទប្រកាន់ចំពោះការជ្រៀតជ្រែកមិនសមស្របក្នុងការកាត់ទោសក្រុមហ៊ុនធំមួយ ខណៈដែលមេដឹកនាំរបស់ប្រទេសនេះ កំពុងប្រយុទ្ធតស៊ួនឹងវិបត្តិដ៏អាក្រក់បំផុតរបស់ខ្លួនចាប់តាំងពីចូលកាន់តំណែងមក.
ខណៈប្រឈមនឹងការអំពាវនាវឲ្យលាលែងពីតំណែងដោយសាររឿងអាស្រូវនេះ លោក Trudeau បានដោះស្រាយការចោទប្រកាន់នេះនៅក្នុងសន្និសីទកាសែតពេលព្រឹកមួយនៅទីក្រុងអូតាវ៉ាដោយនិយាយថា លោកបានរៀនមេរៀនពីវិបត្តិនេះប៉ុន្តែបានបដិសេធការធ្វើខុសណាមួយ។
រង្វង់ផ្នែកខាងក្នុងរបស់លោក Trudeau ត្រូវបានគេចោទប្រកាន់ថាបានដាក់សម្ពាធលើអតីតអគ្គរាជអាជ្ញារបស់លោកឲ្យការពារក្រុមហ៊ុនវិស្វកម្មកាណាដា SNC-Lavalin ពីការកាត់ទោសពីបទសូកប៉ាន់។
ករណីនេះបានបង្កឲ្យមានការលាលែងពីតំណែងរបស់ដៃស្តាំលោក Trudeau និងរដ្ឋមន្ត្រីពីររូបខណៈការគាំទ្រសម្រាប់នាយករដ្ឋមន្ត្រីរូបនេះនិងគណបក្សសេរីនិយមរបស់គាត់បានធ្លាក់ចុះជាលើកដំបូងនៅក្រោមគណបក្សប្រឆាំង, ប្រាំពីរខែមុនការបោះឆ្នោតទូទៅមួយ។
ថ្លែងទៅកាន់ប្រព័ន្ធផ្សព្វផ្សាយ នាយករដ្ឋមន្ត្រីវ័យ៤៧ឆ្នាំរូបនេះបានទទួលស្គាល់ថា លោកបានលើកឡើងអំពីបញ្ហានៃការកាត់ទោសដែលមិនទាន់សម្រេចនេះនៅក្នុងកិច្ចប្រជុំកាលពីខែកញ្ញាឆ្នាំមុនជាមួយអគ្គរាជអាជ្ញាលោកស្រី Jody Wilson-Raybould ដែលបានលាលែងពីតំណែងដោយសារតែវិបត្តិនេះ។ លោកបាននិយាយថា ពួកគេបានពិភាក្សាអំពីផលប៉ះពាល់ដែលអាចកើតមានរបស់វាទៅលើការងារនៅក្នុងមូលដ្ឋានបោះឆ្នោតក្រុង Montreal របស់លោក។
ក្នុងរយៈពេលប៉ុន្មានថ្ងៃនៃការផ្តល់សក្ខីកម្មនៅចំពោះមុខគណៈកម្មាធិការយុត្តិធម៌សភា លោកស្រី Wilson-Raybould បាននិយាយថា លោកស្រីបានទទួលរងនូវសម្ពាធជាប់លាប់និងធ្ងន់ធ្ងរពីរង្វង់ផ្នែកខាងក្នុងរបស់លោក Trudeau ដើម្បីឲ្យជ្រៀតជ្រែកក្នុងករណីនេះរួមទាំងការគំរាមកំហែងលាក់បាំងផងដែរ។
ទោះបីជាយ៉ាងណាក៏ដោយ លោក Trudeau បានវាយបកវិញថា “មិនមានការដាក់សម្ពាធមិនសមរម្យទេ”។ លោកបានអះអាងជាថ្មីដល់លោកស្រី Wilson-Raybould ថា ការសម្រេចណាមួយគឺធ្វើឡើងដោយលោកស្រីតែម្នាក់ឯង៕ AFP
Source: Kampuchea Thmey Daily
0 Comments