ដាក់គោលដៅត្រួតពិនិត្យ អាវុធជាតិផ្ទុះ និងជាតិអាកុលនៅខណ្ឌទួលគោក គ្មានអាវុធឆ្លងកាត់ តែមានអ្នកស្រវឹងស្រាឆ្លងកាត់ច្រើន

ភ្នំពេញ ៖ គណៈបញ្ជាការឯកភាពខណ្ឌទួលគោក បានសម្រេចធ្វើការឃាត់ម៉ូតូជាច្រើនគ្រឿង ខណៈដែលម្ចាស់របស់វាជិះឆ្លងកាត់គោលដៅត្រួតពិនិត្យអាវុធជាតិផ្ទុះ ជាតិអាកុល និងពង្រឹងច្បាប់ចរាចរណ៍ផ្លូវគោក ហើយបានរកឃើញថា អ្នកទាំងនោះបានហូបគ្រឿងស្រវឹងលើសច្បាប់ដែលត្រូវផាកពិន័យ។

មន្ត្រីអនុវត្តច្បាប់ចរាចរណ៍ផ្លូវគោករបស់ខណ្ឌទួលគោកបានឲ្យដឹងថា នៅយប់ថ្ងៃព្រហស្បតិ៍
២កើត ខែផល្គុន ឆ្នាំច សំរឹទ្ធស័ក ព-ស២៥៦២ ត្រូវនឹងថ្ងៃទី៧ ខែមិនា ឆ្នាំ២០១៩ កម្លាំងចម្រុះ គណៈបញ្ជាការឯកភាពរដ្ឋបាលខណ្ឌទួលគោក បានដាក់គោលដៅត្រួតពិនិត្យ អាវុធជាតិផ្ទុះ និងជាតិអាកុល ត្រង់ចំណុចផ្លូវលេខ២១៧ កែងផ្លូវលេខ២២៣ ស្ថិតក្នុងសង្កាត់ផ្សារដើមគ ខណ្ឌទួលគោក។

ការងារនេះ ដឹកនាំដោយ លោក អ៊ិត ជុំនិត នាយករដ្ឋបាលសាលាខណ្ឌទួលគោក លោកវរសេនីយ៍ទោ តី សុវណ្ណារ៉េត អធិការរងនគរបាលខណ្ឌទួលគោក និង លោកវរសេនីយ៍ត្រី ប៊ួយ កុសលមេបញ្ជាការរងកងរាជអាវុធហត្ថខណ្ឌទួលគោក ដោយប្រើប្រាស់កម្លាំងសរុបរួមចំនួន៣៣នាក់។ ជាលទ្ធផល មានយានយន្តឆ្លងកាត់គោលដៅដៅត្រួតពិនិត្យសរុបចំនួន៥៤គ្រឿង ក្នុងនោះមាន រថយន្ដចំនួន១៧គ្រឿង ម៉ូតូចំនួន៣៧ អាវុធឆ្លងកាត់គោលដៅត្រួតពិនិត្យគ្មាន។

ចំពោះលទ្ធផលត្រួតពិនិត្យជាតិអាកុលមាន ជាតិអាកុលក្រោម០,២៥មិល្លីក្រាម ក្នុង១លីត្រខ្យល់ មានចំនួន១នាក់ (ម៉ូតូចំនួន១គ្រឿង និងរថយន្តចំនួន០គ្រឿង) កម្រិតអប់រំ។

ជាតិអាកុលចាប់ពី០,២៥មិល្លីក្រាម ដល់០,៣៩ មិល្លីក្រាម ក្នុង១លីត្រខ្យល់ មានចំនួន១នាក់(ម៉ូតូចំនួន១គ្រឿង) ឃាត់ម៉ូតូមានកម្រិតជាតិអាកុល០,២៥មិល្លីក្រាម រក្សាទុកនៅអធិការដ្ឋាននគរបាលខណ្ឌទួលគោក ដើម្បីផាកពិន័យតាមច្បាប់។ ជាតិអាកុល ចាប់ពី០,៤០មិល្លីក្រាម ក្នុង១លីត្រខ្យល់ឡើងទៅមានចំនួន២នាក់ (ម៉ូតូ២គ្រឿង) ម៉ូតូមានកម្រិតជាតិអាកុល០,៤១ និង០,៥៥ មិល្លីក្រាម ឃាត់ម៉ូតូចំនួន២គ្រឿង រក្សាទុកនៅអធិការដ្ឋាននគរបាលខណ្ឌទួលគោក ដើម្បីផាកពិន័យតាមច្បាប់៕