ប្រធានាធិបតីអាមេរិកលោក Donald Trump កំពុងស្វែងរកមូលនិធិថ្មីចំនួន៨.៦ពាន់លានដុល្លារសម្រាប់ជញ្ជាំងនៅព្រំដែនអាមេរិក-ម៉ិកស៊ិក ដែលនេះទំនងជាបង្កឲ្យមានការប្រយុទ្ធតស៊ូមួយផ្សេងទៀតជាមួយសភា។
សំណើកញ្ចប់ថវិកាឆ្នាំ២០២០ ដែលត្រូវបានគេកំណត់ថានឹងបង្ហាញជាផ្លូវការនៅថ្ងៃចន្ទគឺអាចនឹងលើសឆ្ងាយពីចំនួន៥.៧ពាន់លានដុល្លារដែលលោក Trump ទាមទារកាលពីឆ្នាំមុន។
សំណើមុននោះបាននាំឲ្យមានការជាប់គាំងមួយដែលបណ្តាលឲ្យមានការបិទផ្នែកខ្លះនៃរដ្ឋាភិបាលសហរដ្ឋអាមេរិករយៈពេល៣៥ថ្ងៃដែលជាការបិទយូរបំផុតមិនធ្លាប់មាន។
មេដឹកនាំសភានៃគណបក្សប្រជាធិបតេយ្យលោកស្រី Nancy Pelosi និងលោក Chuck Schumer បានថ្កោលទោសចំពោះរឿងនេះដោយព្រមានលោក Trump ថា បរាជ័យមួយផ្សេងទៀតនៅសភាកំពុងរង់ចាំគាត់។
ទីប្រឹក្សាសេដ្ឋកិច្ចរបស់សេតវិមានលោក Larry Kudlow បានយល់ស្របថា សំណើថ្មីនេះទំនងជាមានន័យថាគឺជាការប្រយុទ្ធតស៊ូជាថ្មីនៅក្នុងសភាស្តីពីការផ្តល់មូលនិធិជញ្ជាំង។
លោកបានប្រាប់កម្មវិធី “Fox News Sunday” ថា “ខ្ញុំស្មានទុកជាមុនថា រឿងនេះនឹងកើតឡើង”។
ប៉ុន្តែលោក Kudlow បាននិយាយថា លោក Trump នឹងបន្តតស៊ូជាមួយជញ្ជាំងរបស់គាត់ហើយគាត់នឹងតស៊ូជាមួយសន្តិសុខព្រំដែនរបស់គាត់។ ខ្ញុំគិតថាវាសំខាន់ខ្លាំងណាស់។
ដោយឡែក លោក Kudlow បានបង្ហាញសុទិដ្ឋិនិយមថា កំណើនសេដ្ឋកិច្ចរបស់សហរដ្ឋអាមេរិកនឹងកើនឡើងលើសពី៣ភាគរយនៅឆ្នាំ២០១៩និងខ្ពស់ជាងនេះទៀត។
ការិយាល័យគ្រប់គ្រងនិងថវិការបស់សេតវិមានបាននិយាយថា សំណើថវិការបស់លោកប្រធានាធិបតីត្រូវការការកាត់បន្ថយចំនួន២.៧ពាន់ពាន់លានដុល្លារពោលគឺខ្ពស់ជាងរដ្ឋបាលផ្សេងទៀតនៅក្នុងប្រវត្តិសាស្ត្រ។
សេចក្តីថ្លែងការណ៍មួយដោយនាយកស្តីទីលោក Russ Vought បាននិយាយថា ការកាត់បន្ថយនេះនឹងត្រូវបានសម្រេចតាមរយៈការកាត់បន្ថយការចំណាយខាងការពារចំនួន៥ភាគរយនៅក្រោមកម្រិតឆ្នាំ២០១៩ខណៈពេលដែលថវិកាបន្ថែមទៀតកំពុងត្រូវបានស្នើសុំសម្រាប់បញ្ហាមួយចំនួនដូចជាសន្តិសុខព្រំដែន ការពារជាតិ ប្រយុទ្ធប្រឆាំងគ្រឿងញៀននិងការថែទាំទាហានជើងចាស់៕ AFP
Source: Kampuchea Thmey Daily
0 Comments