កាលពីថ្ងៃសុក្រ អង្គការសហប្រជាជាតិ បានសង្កត់ធ្ងន់ថា ជនភៀសខ្លួនដែលកំពុងរត់គេចពីជម្លោះគួរតែត្រូវបានផ្តល់ឲ្យនូវជម្រកសុវត្ថិភាពបន្ទាប់ពីប្រទេសបង់ក្លាដែសបានប្រកាសថា ខ្លួននឹងលែងទទួលយកជនជាតិរ៉ូហ៊ីងយ៉ារបស់ប្រទេសមីយ៉ាន់ម៉ាទៀតហើយ។
រដ្ឋមន្ត្រីការបរទេសបង់ក្លាដែសលោក Shahidul Haque បានប្រាប់ក្រុមប្រឹក្សាសន្តិសុខកាលពីថ្ងៃព្រហស្បតិ៍ថា វិបត្តិជនភៀសខ្លួនគឺកាន់តែអាក្រក់ទៅៗហើយបានសម្តែងការសោកស្តាយចំពោះការពិតដែលថា គ្មានជនភៀសខ្លួនណាម្នាក់ក្នុងចំណោមជនភៀសខ្លួនរ៉ូហ៊ីងយ៉ារាប់ពាន់នាក់ដែលជ្រកកោននៅក្នុងប្រទេសរបស់គាត់បានត្រលប់ទៅផ្ទះវិញទេ។
អ្នកនាំពាក្យអង្គការសហប្រជាជាតិលោក Stephane Dujarric បាននិយាយថា “ប្រទេសបង់ក្លាដែសមានភាពសប្បុរសធម៌យ៉ាងខ្លាំងនៅក្នុងការគាំទ្រដែលពួកគេបានផ្តល់ទៅឲ្យជនភៀសខ្លួនរ៉ូហ៊ីងយ៉ា។ វាជាការសំខាន់ណាស់ដែលថា មនុស្សដែលភៀសខ្លួនចេញពីជម្លោះអាចរកកន្លែងមានសុវត្ថិភាពនៅគ្រប់ទីកន្លែងដែលពួកគេទៅ”។
ក្រោមកិច្ចព្រមព្រៀងមួយដែលបានសម្រេចជាមួយប្រទេសបង់ក្លាដែស ប្រទេសមីយ៉ាន់ម៉ាបានព្រមព្រៀងទទួលយកជនភៀសខ្លួនមួយចំនួនមកវិញប៉ុន្តែអង្គការសហប្រជាជាតិបានទទូចថា សុវត្ថិភាពរបស់ជនជាតិរ៉ូហ៊ីងយ៉ាគឺជាលក្ខខណ្ឌមួយសម្រាប់ការវិលត្រលប់របស់ពួកគេ។
លោក Haque បានប្រាប់កិច្ចប្រជុំក្រុមប្រឹក្សាសន្តិសុខស្តីពីបញ្ហាមីយ៉ាន់ម៉ាថា “ប្រទេសបង់ក្លាដែសនឹងមិនមានលទ្ធភាពទទួលយកមនុស្សបន្ថែមទៀតមកពីប្រទេសមីយ៉ាន់ម៉ាទេ”។ លោកបង្ហាញថារដ្ឋាភិបាលរបស់លោកបានត្រៀមខ្លួនរួចរាល់ដើម្បីបិទព្រំដែនចំពោះជនភៀសខ្លួន។
គួរបញ្ជាក់ថា ជនជាតិភាគតិចរ៉ូហ៊ីងយ៉ាប្រហែល៧៤០,០០០នាក់កំពុងរស់នៅក្នុងជំរំនៅប្រទេសបង់ក្លាដែសបន្ទាប់ពីពួកគេត្រូវបានបណ្តេញចេញពីរដ្ឋរ៉ាក់ឃីនភាគខាងជើងប្រទេសមីយ៉ាន់ម៉ាក្នុងអំឡុងពេលយុទ្ធនាការយោធាមួយកាលពីឆ្នាំ២០១៧ដែលអង្គការសហប្រជាជាតិបានពណ៌នាថាជាការបោសសម្អាតជនជាតិភាគតិច៕ AFP
Source: Kampuchea Thmey Daily
0 Comments