កាលពីថ្ងៃព្រហស្បតិ៍ ប្រទេសជាច្រើនរួមទាំងសមាជិកសហភាពអឺរ៉ុបទាំង២៨ផងដែរ បានអំពាវនាវដល់ប្រទេសអារ៉ាប៊ីសាអ៊ួឌីតឲ្យដោះលែងសកម្មជនចំនួន១០នាក់និងត្រូវសហការជាមួយការស៊ើបអង្កេត ដែលដឹកនាំដោយអង្គការសហប្រជាជាតិចូលទៅក្នុងករណីឃាតកម្មអ្នកសារព័ត៌មាន Jamal Khashoggi នៅស្ថានទូតរបស់ខ្លួនក្នុងទីក្រុងអ៊ីស្តង់ប៊ុល។
វាគឺជាការស្តីបន្ទោសលើកដំបូងលើប្រទេសអារ៉ាប៊ីសាអ៊ូឌីតនៅក្រុមប្រឹក្សាសិទ្ធិមនុស្សអង្គការសហប្រជាជាតិចាប់តាំងពីវាត្រូវបានបង្កើតឡើងក្នុងឆ្នាំ២០០៦ហើយបានកើតឡើងចំពេលមានការព្រួយបារម្ភជាអន្តរជាតិកាន់តែខ្លាំងអំពីការរំលោភបំពានរបស់អារ៉ាប៊ីសាអ៊ូឌីតលើសិទ្ធិសេរីភាពមូលដ្ឋានដូចជាសេរីភាពនៃការបញ្ចេញមតិជាដើម។
បេសកជនម្នាក់នៃប្រទេសសហភាពអឺរ៉ុបមួយបានប្រាប់រ៉យទ័រថា “វាជាជោគជ័យមួយសម្រាប់អឺរ៉ុបក្នុងការរួបរួមគ្នាលើរឿងនេះ”។
សេចក្តីថ្លែងការណ៍រួមមិនធ្លាប់មានពីមុនមកមួយនេះដែលក៏ត្រូវបានគាំទ្រដោយប្រទេសកាណាដានិងអូស្ត្រាលីប៉ុន្តែមិនមែនសហរដ្ឋអាមេរិកនោះគឺត្រូវបានអានដោយលោក Harald Aspelund ដែលជាឯកអគ្គរដ្ឋទូតអ៊ីស្លង់ប្រចាំនៅអង្គការសហប្រជាជាតិក្នុងទីក្រុងហ្សឺណែវ។
លោក Aspelund បានថ្លែងថា “យើងមានការព្រួយបារម្ភជាពិសេសអំពីការប្រើប្រាស់ច្បាប់ប្រឆាំងភេរវកម្មនិងបទប្បញ្ញត្តិសន្តិសុខជាតិផ្សេងទៀតប្រឆាំងនឹងបុគ្គលដែលអនុវត្តសិទ្ធិនិងសេរីភាពរបស់ពួកគេដោយសន្តិវិធី”។
សេចក្តីថ្លែងការណ៍នេះបានសរសេរថា ក្រុមសកម្មជនអាចនិងគួរដើរតួនាទីដ៏សំខាន់នៅក្នុងដំណើរការនៃកំណែទម្រង់ដែលប្រទេសនេះកំពុងស្វែងរក។
ស្របពេលជាមួយគ្នានោះដែរ ឯកអគ្គរាជទូតអារ៉ាប៊ីសាអ៊ូឌីតលោក Abdulaziz M.O. Alwasil បានសង្កត់ធ្ងន់លើកិច្ចខិតខំប្រឹងប្រែងរបស់ខ្លួនដើម្បីលើកកំពស់សិទ្ធិមនុស្សប៉ុន្តែបានអំពាវនាវឲ្យ មានការដោះស្រាយបញ្ហាសិទិ្ធមនុស្សនៅអារ៉ាប៊ីសាអ៊ូឌីតតាមលក្ខណៈមិនលំអៀងនិងចាកឆ្ងាយពីពាក្យចចាមអារាមនៅក្នុងប្រព័ន្ធផ្សព្វផ្សាយនិងអង្គការមិនមែនរដ្ឋាភិបាល។
សេចក្តីថ្លែងការណ៍រួមនេះបានអំពាវនាវឱ្យមានការដោះលែងលោក Loujain Al-Hathloul, Eman Al-Nafjan, Aziza Al-Yousef, Nassima Al-Sadah, Samar Badawi, Nouf Abdelaziz, Hatoon Al-Fassi, Mohammed Al-Bajadi, Amal Al-Harbi និង Shadan al-Anezi។
សកម្មជនទាំងនេះបានចោទប្រកាន់ថា សកម្មជនស្ត្រីដែលជាប់ពន្ធនាគាររាប់បញ្ចូលទាំងអ្នកដែលបានធ្វើយុទ្ធនាការដើម្បីសិទ្ធិក្នុងការបើកបរផងដែរនោះគឺត្រូវបានគេឆក់ខ្សែរភ្លើង ការវាយដំ ការរំលោភផ្លូវភេទនិងការធ្វើទារុណកម្មផ្សេងៗ៕ REUTERS
Source: Kampuchea Thmey Daily
0 Comments