បន្ទាយមានជ័យ ៖ ជនសង្ស័យម្នាក់ ប្រើស្នៀតថ្មីឲ្យអ្នករត់ឌុបជូនចុះឡើង ឲ្យលុយក្លែងក្លាយអ្នករត់ឌុបមិនយក គំរាមសម្លាប់ ត្រូវបានកម្លាំងអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ទោ អ៊ុំ សាខន នាយរងសេនាធិការ ប្រចាំការមូលដ្ឋានកងរាជអាវុធហត្ថក្រុងប៉ោយប៉ែត ចុះឃាត់ខ្លួននៅវេលាម៉ោង២រសៀល ថ្ងៃទី៧ ខែមេសា ឆ្នាំ២០១៩ នៅចំណុចភ្នំ១០០ ស្ថិតនៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ហើយបានបញ្ជូនជនសង្ស័យមកទីបញ្ជាការកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌ បានប្រាប់អ្នកយកព័ត៌មានឲ្យដឹងថា យោងតាមបណ្តឹងរបស់ជនរងគ្រោះឈ្មោះ សុខ ភារម្យ ភេទប្រុស អាយុ៥០ឆ្នាំ មុខរបររត់ម៉ូតូឌុប មានទីលំនៅស្ថិតក្នុងភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត បានបំភ្លឺឲ្យដឹងថា ជនសង្ស័យមានឈ្មោះ ជា សុភ័ក្ត្រ ភេទ ប្រុស អាយុ ២៨ឆ្នាំ មុខរបរមិនពិតប្រាកដ រស់នៅភូមិចាន់គីរី សង្កាត់ប៉ោយប៉ែត ក្រុងប៉ោយប៉ែត បានហៅខ្លួនឲ្យឌុបពីកន្លែងមួយទៅកន្លែងមួយ ពេលទៅដល់ចំណុចត្រូវឈប់ ក៏បានឲ្យប្រាក់មកខ្លួន តែប្រាក់នោះជាប្រាក់ក្លែងក្លាយ។ ពេលនោះខ្លួនមិនសុខចិត្តក៏បានប្រកែកគ្នា តែជនសង្ស័យបានគំរាម និងយកដែកឆាបបម្រុងចាក់មកលើខ្លួនទៀតផង ដោយខ្លួនមានការភ័យខ្លាចក៏ស្រែកឆោឡោហៅសមត្ថកិច្ចមកឃាត់ខ្លួនតែម្តង។
អាវុធហត្ថក៏បានសាកសួរ, ជនសង្ស័យបានឆ្លើយសារភាពថា ខ្លួនពិតជាបានប្រព្រឹត្តដូចការចោទប្រកាន់ របស់ជនរងគ្រោះពិតប្រាកដមែន ដោយខ្លួនបានជាប់ពន្ធនាគាររយៈពេល២ឆ្នាំមកហើយ ទើបតែចេញពីពន្ធនាគារកាលខែកុម្ភៈ ឆ្នាំ២០១៩ ថ្មីៗនេះ ហើយពេលនោះខ្លួនបានប្រើប្រាស់គ្រឿងញៀនរហូតបែកគំនិតប្រព្រឹត្តរឿងផ្តេសផ្តាស។
លោកវរសេនីយ៍ទោ ព្រហ្ម ថេង បានបញ្ជាក់បន្ថែមទៀតថា ផ្អែកលើចម្លើយសារភាពរបស់ជនសង្ស័យឃើញថាមានតម្រុយពិរុទ្ធភាពនៃបទល្មើសជាក់លាក់ ជនសង្ស័យខាងលើ អាចត្រូវចោទពីបទ គំរាមសម្លាប់និងចាយលុយក្លែងក្លាយ កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការដើម្បីចាត់ការទៅតាមផ្លូវច្បាប់៕
Source: Kampuchea Thmey Daily
0 Comments