ភ្លើងប្រចណ្ឌ យកខ្សែភ្លើងឆក់សម្លាប់ប្រពន្ធចុងកំពុងមានផ្ទៃពោះ រួចចងកសម្លាប់ខ្លួនឯងតាមក្រោយ

ភ្នំពេញ ៖ បុរសជាងទងម្នាក់ បានយកខ្សែភ្លើងឆក់ប្រពន្ធចុងសម្លាប់ចោល ហើយខ្លាចមិនស្លាប់បានយកកាំបិតប៉័ងតោអារ.កបន្ថែមរហូតស្លាប់ រួចចង កសម្លាប់ខ្លួនឯងជាក្រោយ។

ហេតុការណ៍នេះ បង្កឱ្យមានការភ្ញាក់ផ្អើល កាលពីវេលាម៉ោង២២និង៣០នាទីយប់ថ្ងៃទី០៦ ខែមេសា ឆ្នាំ២០១៩ នៅត្រង់ចំណុចបន្ទប់ជួលលេខស៊ី១៣ ក្រុម១ ភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ។

សពបុរស ដែលចងកធ្វើអត្តឃាតនោះ មានឈ្មោះទុយ រ៉ាន អាយុ ៣៩ឆ្នាំ មានមុខរបរជាងទង(ជាងមាស) មានប្រពន្ធកូនប្រុសម្នាក់ មិនត្រូវបានគេស្គាល់អត្តសញ្ញាណប័ណ្ណនោះទេ អ្នកទាំង៣នាក់ស្នាក់នៅផ្ទះលេខ១០៥ផ្លូវលេខ១១០ សង្កាត់ផ្សារចាស់ ខណ្ឌដូនពេញ ជិះរថយន្តមួយគ្រឿងម៉ាកលុចស៊ីសRX330បិទតែម350 ពណ៌ទឹកប្រាក់ ពាក់ស្លាកលេខភ្នំពេញ2AJ-4378។ ចំណែកស្ត្រីដែលបុរសខាងលើសម្លាប់នោះ ឈ្មោះណុង ស្រីមិ អាយុ២៣ឆ្នាំ មុខរបរនៅផ្ទះមានផ្ទៃពោះ២ខែមានកូនស្រីម្នាក់ជាមួយប្តីដើមអាយុ៣ឆ្នាំរស់នៅក្នុងបន្ទុក មានស្រុកកំណើតនៅភូមិជំនុំពល ឃុំជាំតាម៉ៅស្រុកមេមត់ ខេត្តត្បូងឃ្មុំ។

តាមប្រភពព័ត៌មានពីកន្លែងកើតហេតុបានឲ្យដឹងថា ស្ត្រីរងគ្រោះខាងលើ បន្ទាប់ពីប្តីដើមរបស់នាងជាប់ពន្ធនាគារចំនួន២ឆ្នាំ ដោយសារនាងគ្មានប្រាក់ចិញ្ចឹមកូននិងផ្គត់ផ្គង់គ្រួសារ នាងក៏បានចេញទៅធ្វើការបម្រើការងារនៅក្នុងខារ៉ាអូខេយីហោ(ស្ពានមាស) ដែលមានទីតាំងតាមបណ្ដោយផ្លូវជាតិលេខ៥ ក្នុងសង្កាត់ស្រះចក ខណ្ឌដូនពេញ ហើយក៏បានស្គាល់បុរសជាឃាតក បានរយៈពេល៦ខែ។

ប្រភពបានបន្តថា បន្ទាប់ពីស្គាល់គ្នា បុរសខាងលើបានឲ្យនាងឈប់ពីបម្រើការងារនៅទីនោះដោយជួលបន្ទប់ជួល រួចរួមរស់នៅជាមួយគ្នាដូចជាប្តីប្រពន្ធមិនបានរៀបការ ឬសែនព្រេននោះទេ តាំងពីរស់នៅជាមួយគ្នាជាប្តីប្រពន្ធមកបុរសនោះ មិនសូវទៅរួមរស់ជាមួយប្រពន្ធដើមទេ យូរៗទៅម្តងដោយរស់នៅជាមួយនាងច្រើនជាងប្រពន្ធដើម ហើយតែងតែប្រចណ្ឌនាងរករឿងឈ្លោះប្រកែកគ្នាជាញឹកញាប់ផងដែរ ព្រោះតែបុរសនោះស្រលាញ់នាងរងគ្រោះខ្លាំងណាស់។

ប្រភពព័ត៌មានឲ្យដឹងថា បុរសជាប្តីដើមរបស់នាងរងគ្រោះនៅសល់តែ៤ទៅ៥ខែទៀត នឹងត្រូវចេញពីពន្ធនាគារ ចំណែកបុរសជាឃាតកក៏បានដឹងរឿងរ៉ាវដែរ ហើយធ្លាប់ប្រាប់ស្ត្រីរងគ្រោះថាបើប្តីចេញពីពន្ធនាគារវិញ រូបគេនឹងចេញលុយឲ្យប្តីដើមឲ្យដាច់គ្នា ដើម្បីរូបគេយកនាងធ្វើប្រពន្ធព្រោះរូបគេស្រលាញ់នាងខ្លាំងណាស់អត់នាងមិនបានឡើយ។

ប្រភពបានបន្តទៀតថា នៅមុនពេលកើតហេតុ ពួកគេទាំង២នាក់ បានចូលក្នុងបន្ទប់ជួល រួចបិទទ្វារជិត តែមិនបានចាក់គន្លឹះទេ ហើយកូនស្រីអាយុ៣ឆ្នាំ បានរត់ទៅលេងផ្ទះអ្នកជិតខាង ខណៈពេលនោះគេឮសូរសំឡេងអ្នកទាំង២នាក់ឈ្លោះប្រកែកគ្នាខ្លាំងៗ មួយសន្ទុះក្រោយមកក៏ស្ងាត់ទៅវិញស្របពេលនោះកូនស្រីអាយុ៣ឆ្នាំ បានត្រឡប់មកពីលេងផ្ទះអ្នកជិតខាងវិញ ក៏រុញទ្វាររបើកឃើញម្តាយស្នាមរបួសកជិតដាច់ ហើយឃើញបុរសជាឃាតកដេកអោបសពម្តាយ នាងក៏រត់ស្រែកប្រាប់អ្នកជិតខាងឲ្យមកជួយ។ ភ្លាមៗនោះអ្នកជិតខាងមានការភ្ញាក់ផ្អើល បាននាំគ្នាមកមើល បន្ទាប់មកបុរសជាឃាតក បានងើបរត់មកចាក់គន្លឹះទ្វារបន្ទប់ជួលទំនងបុរសនោះខ្លាចប្រជាពលរដ្ឋវាយស្លាប់ក៏យកក្រមាចងភ្ជាប់ទៅនឹងមេដំបូលដែកបន្ទប់ជួល ចងកសម្លាប់ខ្លួនឯងតែម្តង។

ក្រោយកើតហេតុសមត្ថកិច្ចមូលដ្ឋានបានរាយការណ៍បន្តទៅខាងជំនាញកោសល្យវិច័យមកធ្វើការត្រួតពិនិត្យទើបដឹងថា ជាករណីសម្លាប់ស្រីកំណាន់ ហើយចងក សម្លាប់ខ្លួនឯងពិតប្រាកដមែន។

បន្ទាប់ពីសមត្ថកិច្ចជំនាញបានធ្វើការត្រួតពិនិត្យសពរួចរាល់ហើយ បានប្រគល់ឲ្យក្រុមគ្រួសាររៀងៗខ្លួន ដឹកយកធ្វើបុណ្យតាមប្រពៃណីនៅគេហដ្ឋាន៕