សមត្ថកិច្ចនគរបាលខេត្ត បន្តចុះផ្សព្វផ្សាយ និងរឹតបន្តឹងច្បាប់ចរាចរណ៍ នៅតាមគោលដៅ ក្នុងខេត្តប៉ៃលិន

Cambodia News April 08, 2019

ប៉ៃលិន ៖ នៅព្រឹកថ្ងៃទី០៨ ខែមេសា ឆ្នាំ២០១៩ សមត្ថកិច្ចនគរបាលចរាចរណ៍ នៃស្នងការដ្ឋាននគរបាលខេត្តប៉ៃលិន បានបន្តចុះផ្សព្វផ្សាយ ព្រមទាំងរឹតបន្តឹងច្បាប់ចរាចរណ៍ នៅតាមគោលដៅនានាក្នុងខេត្តប៉ៃលិន ក្នុងគោលបំណង ដើម្បីក្រើនរំលឹក ដល់បងប្អូនប្រជាពលរដ្ឋ ឲ្យមានការប្រុងប្រយ័ត្នកាត់បន្ថយគ្រោះថ្នាក់ចរាចរណ៍ ក្នុងការធ្វើដំណើរកម្សាន្ត នាពិធីបុណ្យជាតិខាងមុខនេះ។

បើតាម លោកវរសេនីយ៍ទោ ជា សីហា នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តប៉ៃលិន បានឲ្យដឹងថា ជារៀងរាល់ឆ្នាំ ជាពិសេសមុនថ្ងៃបុណ្យជាតិធំៗ ប្រជាពលរដ្ឋមួយចំនួន បានឈប់សម្រាកពីការងារ ជាក់ស្តែងបុណ្យចូលឆ្នាំថ្មី ប្រពៃណីជាតិខ្មែរ នឹងខិតជិតចូលមកដល់ សមត្ថកិច្ចនគរបាលចរាចរណ៍ ក្រោមការចង្អុលបង្ហាញពីឯកឧត្តមអភិបាលខេត្ត និងលោកឧត្ដមសេនីយ៍ទោស្នងការនគរបាលខេត្ត បានជំរុញដល់សមត្ថកិច្ចចរាចរណ៍ផ្លូវគោក ឲ្យបន្តចុះផ្សព្វផ្សាយ និងពង្រឹងច្បាប់ចរាចរណ៍ផ្លូវគោក ជូនដល់ប្រជាពលរដ្ឋ ដែលបានធ្វើដំណើរ តាមដងផ្លូវ ដើម្បីក្រើនរំលឹកឲ្យមានការប្រុងប្រយ័ត្ន ក្នុងការធ្វើដំណើរតាមយាន្តជំនិះគ្រប់ប្រភេទ ត្រូវគោរពច្បាប់ចរាចរណ៍ទាំងអស់គ្នា។

លោកនាយការិយាល័យចរាចរណ៍ បានបន្តថា ដើម្បីកាត់បន្ថយការគ្រោះថ្នាក់ចរាចរណ៍ អ្នកជិះម៉ូតូគ្រប់ប្រភេទ ត្រូវពាក់មួកសុវត្ថិភាពជាប់ ជាប្រចាំទាំងអ្នកឌុប និងអ្នកជិះពីក្រោយ ហើយត្រូវគោរពស្លាកសញ្ញាចរាចរណ៍ នៅតាមដងផ្លូវនានា តាមគោលដៅមិនត្រូវបើកក្នុងល្បឿនលឿនហួសកំណត់ឡើយ។ ចំណែកអ្នកបើកបររថយន្តបើកបរ ត្រូវពាក់ខ្សែក្រវាត់ឲ្យបានគ្រប់គ្នា ហើយបើកក្នុងល្បឿនតាមច្បាប់កំណត់ ហាមបើជែងគ្នា ដែលបង្កឲ្យមានគ្រោះថ្នាក់ចរាចរណ៍ជាយថាហេតុ ក្នុងនោះក៏មានការណែនាំដល់ម្ចាស់រថយន្ត ដែលដឹកសំពីងសំពោងលើរថយន្ត គ្មានសណ្ដាប់ធ្នាប់ផងដែរ។

ក្នុងឱកាសនោះដែរ ប្រជាពលរដ្ឋ ដែលទទួលបានការអប់រំ តាមសមត្ថកិច្ចតាមគោលដៅ បានសំដែង នូវការអរគុណដល់ថ្នាក់ដឹកនាំខេត្ត និងមន្ត្រីជំនាញពាក់ព័ន្ធទាំងអស់ បានផ្តល់ឯកសារផ្សេងៗ ដែលពាក់ព័ន្ធច្បាប់ចរាចរណ៍ ដល់ពួកគាត់ និងបានប្ដេជ្ញាចិត្តថា យើងនាំគ្នាគោរពច្បាប់ចរាចរណ៍ទាំងអស់គ្នា ការគោរពច្បាប់ចរាចរណ៍ គឺផ្តើមចេញពីខ្លួនយើងជាមុនផងដែរ៕