មេដឹកនាំគណបក្សប្រឆាំងរបស់ប្រទេសកាណាដាកាលពីថ្ងៃអាទិត្យបានបង្ហាញថា លោកនាយករដ្ឋមន្ត្រី Justin Trudeau បានគំរាមគាត់ជាមួយនឹងករណីបរិហារកេរ្តិ៍លើមតិយោបល់របស់គាត់អំពីរឿងអាស្រូវនយោបាយមួយដែលបានធ្វើឲ្យរង្គោះរង្គើរដ្ឋាភិបាលក្នុងរយៈពេលប៉ុន្មានខែមុនការបោះឆ្នោតរបស់ប្រទេសនេះ។
លោក Andrew Scheer ប្រធានគណបក្សអភិរក្សបានប្រាប់សន្និសីទសារព័ត៌មានមួយថា លោកបានទទួលលិខិតមួយពីមេធាវីរបស់លោក Trudeau ដែលចោទប្រកាន់លោកពីបទនិយាយ “បរិហារកេរ្តិ៍ខ្លាំងក្លា” ដែលបានធ្វើឡើងដើម្បីឆ្លើយតបទៅនឹងឯកសារជាច្រើនដែលបញ្ចេញដោយអតីតអគ្គរាជអាជ្ញាលោកស្រី Jody Wilson-Raybould កាលពីបំណាច់ខែមីនា។
លោក Trudeau បានស្ថិតនៅក្រោមសម្ពាធចាប់តាំងពីខែកុម្ភៈមកនៅពេលដែលលោកស្រី Wilson-Raybould បានចោទប្រកាន់គាត់និងរង្វង់ផ្នែកខាងក្នុងរបស់គាត់ថាបានដាក់សម្ពាធនយោបាយដើម្បីទប់ស្កាត់ការកាត់ក្តីលើក្រុមហ៊ុនវិស្វកម្ម SNC-Lavalin ដែលត្រូវបានគេចោទប្រកាន់ពីបទអំពើពុករលួយនៅក្នុងប្រទេសលីប៊ី។
កាលពីថ្ងៃទី២៩ខែមីនា អតីតអគ្គរាជអាជ្ញាបានបញ្ចេញឯកសារថ្មីចំនួន៤៣ទំព័រដែលព្យាយាមផ្សារភ្ជាប់ការទម្លាក់តំណែងរបស់លោកស្រីកាលពីខែមករាទៅនឹងផលប័ត្រផ្សេងទៀតដោយសារតែការតស៊ូរបស់លោកស្រីចំពោះសម្ពាធឲ្យដោះស្រាយករណីក្រុមហ៊ុន SNC-Lavalin ។
លោក Scheer បានចោទប្រកាន់រដ្ឋាភិបាលថា បានកុហកប្រជាជនកាណាដានិងពុករលួយ។
លោកបានថ្កោលទោសការគំរាមដាក់ពាក្យបណ្តឹងនេះថាជា “យុទ្ធសាស្ត្របំភិតបំភ័យ” របស់នាយករដ្ឋមន្ត្រី។ លោកបាននិយាយថា “វាគឺជាការប៉ុនប៉ងបន្ថែមទៀតដើម្បីបំបិទមាត់អ្នកដែលកំពុងក្រោកឈរប្រឆាំងនិងស្វែងរកការពិត”។
អ្នកនាំពាក្យម្នាក់របស់លោក Trudeau បាននិយាយកាលពីរសៀលថ្ងៃអាទិត្យថា លិខិតនេះត្រូវបានផ្ញើទៅឲ្យលោក Scheer ដើម្បីបញ្ជាក់ថា មានផលវិបាកសម្រាប់ការចេញសេចក្តីថ្លែងការណ៍ខុសឆ្គង។
លោក Scheer បានអំពាវនាវឲ្យលោកនាយករដ្ឋមន្ត្រីលាលែងពីតំណែងភ្លាមៗដោយនិយាយថា លោកលែងមានសិទ្ធិអំណាចខាងសីលធម៌ដឹកនាំទៀតហើយនិងបានទាមទារឲ្យមានការស៊ើបអង្កេតជាសាធារណៈមួយទៅលើការចោទប្រកាន់អំពីការជ្រៀតជ្រែកផ្នែកនយោបាយ៕ AFP
Source: Kampuchea Thmey Daily
0 Comments