ភ្នំពេញ ៖ បើសង្កេតតាមវីដេអូឃ្លីបមួយនេះឃើញថា ក្នុងទឹកដីខណ្ឌពោធិ៍សែនជ័យ មានភាពអនាធិបតេយ្យខ្លាំងណាស់ លើបញ្ហាល្បែងស៊ីសងខុសច្បាប់ ដែលបាននិងកំពុងរីកដុះដាលដូចផ្សិតជាពិសេសល្បែងឆ្នោតយួននោះតែម្ដង ជាក់ស្ដែងមានមនុស្សពី៥ ទៅ៦នាក់ បានមកបង្កការអុកឡុកដេញវាយតប់គ្នាយ៉ាងអនាធិបតេយ្យដូចជា គ្មានខ្លាចច្បាប់ទម្លាប់អីបន្តិចសោះឡើយ ដោយគ្រាន់តែឲ្យម្ចាស់ទីតាំងកត់ឆ្នោតនោះ ជួយកត់ឆ្នោតយួន ពេលម្ចាស់ទីតាំងមិនព្រមកត់ឲ្យ ក៏ផ្ទុះអំពើហិង្សាដាក់គ្នាផ្អើលឈុលតែម្ដង មិនរំខានដល់សមត្ថកិច្ចឡើយ។
ប្រភពព័ត៌មានបានឲ្យដឹងថា មុននេះមួយថ្ងៃ មានបក្ខពួកគេបានមកនិយាយបញ្ចុះបញ្ចូលឲ្យម្ចាស់ទីតាំងនោះជួយកត់ឆ្នោតយួនឲ្យថៅកែរបស់ខ្លួនផង តែម្ចាស់ទីតាំងមិនយល់ព្រម ហើយភ្នាក់ងារនោះបានចាកចេញទៅទាំងមិនសប្បាយចិត្ត លុះមកដល់ថ្ងៃកើតហេតុ ស្រាប់តែពួកគេមានគ្នាពី៥ទៅ៦នាក់បានលើកគ្នា មកដល់ទីតាំងកើតហេតុនេះម្ដងទៀត ពេលមកដល់ ពួកគេបាននិយាយបញ្ចុះបញ្ចូលឲ្យជួយកត់ឆ្នោតយួនដូចលើកមុនទៀត រីឯម្ចាស់ទីតាំងក៏មិនយល់ព្រមដូចលើកមុនចឹងដែរ ជាហេតុនាំឲ្យមានការឈ្លោះទាស់ទែងពាក្យសម្ដីគ្នារហូតដេញវាយគ្នាឆៅៗតែម្ដង។
ប្រភពបន្ដថា អ្នកកាងឆ្នោតនៅទីនោះក៏ខ្លាំង អ្នកបង្កក៏ខ្លាំង ប៉ះគ្នាប្រាវ អ្នកខ្លះធ្លាក់ទឹកស្អុយ បន្ទាប់ពីកើតហេតុ ពួកគេបានរត់ចែកជើងគ្នាបាត់អស់ ហើយសមត្ថកិច្ចក៏ទៅមិនទាន់ដែរ ប៉ុន្តែទោះយ៉ាងណាគេមិនឃើញសមត្ថកិច្ចមានចំណាត់ការទៅលើម្ចាស់ទីតាំងនោះទេ ទុកឲ្យដំណើរការជាធម្មតា។
មហាជនបានរិះគន់ថា នៅក្នុងទឹកដីខណ្ឌពោធិ៍សែនជ័យនេះ បើនិយាយពីល្បែងឆ្នោតយួននេះ មិនបាច់និយាយទេ សូម្បីនៅក្បែរៗច្រមុះសមត្ថកិច្ច និងអាជ្ញាធរខណ្ឌពោធិ៍សែនជ័យនោះ ក៏មានច្រើនកន្លែងដែរ តែអស់លោកសមត្ថកិច្ចមិនបង្ក្រាបនោះទេ ព្រោះជាឆ្នាំងបាយរបស់សមត្ថកិច្ចទៅហើយ ៕
Source: Kampuchea Thmey Daily
0 Comments