ភ្នំពេញ ៖ មន្ទីរអប់រំ យុវជន និងកីឡារាជធានីភ្នំពេញ កាលពីថ្ងៃទី៥ ខែមេសា ឆ្នាំ២០១៩ បានចេញសេចក្ដីជូនដំណឹងមួយសម្រេចផ្ទេរភារកិច្ចអ្នកគ្រូបង្រៀនម្នាក់ នៅសាលាបឋមសិក្សាភូមិឫស្សីដែលប្រមូលលុយពីសិស្សនៅក្នុងម៉ោងសិក្សា មកបម្រើការងារនៅទីចាត់ការសាលាវិញ។
ការសម្រេចផ្ទេរនេះបន្ទាប់ពីប៉ុន្មានថ្ងៃកន្លងមកនេះ មានព័ត៌មាន ក្នុងបណ្តាញសង្គម ហ្វេសប៊ុក បាននិងកំពុងបន្តចែកចាយករណីអ្នកគ្រូបង្រៀនម្នាក់នៅសាលាបឋមសិក្សាភូមិឫស្សី ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ បានប្រមូលលុយសិស្សក្នុងម៉ោងសិក្សា។
បន្ទាប់ពីបានទទួលព័ត៌មាននេះ មន្ទីរអប់រំ យុវជន និង កីឡារាជធានីភ្នំពេញ បានចាត់វិធានការជាបន្ទាន់ ដោយរៀបចំគណៈកម្មការចុះស្រាវជ្រាវ កាលពីថ្ងៃទី១២ ខែមីនា ឆ្នាំ២០១៩ និងបានរកឃើញថា អ្នកគ្រូបង្រៀនខាងលើពិតជាបានប្រព្រឹត្តខុសដូចការចោទប្រកាន់ប្រាកដមែន។ រីឯសាមីខ្លួន ក៏បានសារភាពទទួលកំហុស ដោយមានកិច្ចសន្យាជាលាយលក្ខណ៍អក្សរ។
ក្នុងគោលបំណងទប់ស្កាត់កុំឲ្យបាតុភាពអសកម្មបែបនេះកើតឡើង ក្នុងសាលាបឋមសិក្សាភូមិឫស្សីបន្តទៀត ពិសេសដើម្បីអនុវត្តវិធានការដាក់វិន័យ ចំពោះបុគ្គលប្រព្រឹត្តខុសច្បាប់ស្តីពី ការអប់រំ-ក្រមសីលធម៌វិជ្ជាជីវៈគ្របង្រៀន មន្ទីរអប់រំ យុវជន និងកីឡារាជធានីភ្នំពេញ បានដាក់ចេញនូវវិធានការណ៍មួយចំនួនដូចខាងក្រោមទី១ ៖ ផ្ទេរភារកិច្ចអ្នកគ្រូ បង្រៀនថ្នាក់ទី ១ឆ នៃសាលាបឋមសិក្សាភូមិឫស្សី មកបម្រើការងារនៅទីចាត់ការសាលាវិញ។ ទី២៖ ចាត់តាំងគ្រូបង្រៀនផ្សេងឲ្យទទួលភារកិច្ចបង្រៀនថ្នាក់ទី ១ឆ ជំនួសវិញ ដើម្បីបន្តនិរន្តភាពសិក្សារបស់សិស្ស។ ទី៣ ៖ ប្រគល់ភារកិច្ចដល់ការិយាល័យអប់រំ យុវជន និងកីឡាខណ្ឌមានជ័យ និងគណៈគ្រប់គ្រងសាលា ប្រជុំណែនាំ ឲ្យបានម៉ឺងម៉ាត់ដល់លោកគ្រូ-អ្នកគ្រូទាំងអស់ ដើម្បីគោរពច្បាប់ស្តីពីការអប់រំ និងក្រមសីលធម៌វិជ្ជាជីវៈគ្រូបង្រៀន។ ទី៤ ៖ ប្រគល់ភារកិច្ចដល់ការិយាល័យបឋមសិក្សា និងការិយាល័យអធិការកិច្ច នៃមន្ទីរអប់រំ យុវជន និង កីឡារាជធានីភ្នំពេញបន្តតាមដានកិច្ចការនេះ និងទី៥ ៖ មន្ទីរអប់រំ យុវជន និងកីឡារាជធានីភ្នំពេញ នឹងមានវិធានការរដ្ឋបាលចំពោះអ្នកដែលបានប្រព្រឹត្តល្មើសផ្ទុយពីការ ណែនាំរបស់ក្រសួង-មន្ទីរអប់រំ យុវជន និង កីឡារាជធានីភ្នំពេញ៕
Source: Kampuchea Thmey Daily
0 Comments