ភ្នំពេញ ៖ នៅចុងសប្ដាហ៍នេះ គេសង្កេតឃើញកម្លាំងអាជ្ញាធរ និងប្រជាពលរដ្ឋខណ្ឌច្បារអំពៅ បានរួមគ្នាធ្វើអនាម័យតាមមាត់ច្រាំងទន្លេ និងតាមដងផ្លូវក្នុងមូលដ្ឋានខណ្ឌច្បារអំពៅ។
យោងតាមប្រភពព័ត៌មានពី លោក ប៊ូ វឌ្ឍនា នាយករងរដ្ឋបាលសាលាខណ្ឌច្បារអំពៅបានឲ្យកម្ពុជាថ្មីដឹងនៅព្រឹកថ្ងៃទី៦ខែមេសានេះថា តាមផែនការណ៍របស់ លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ គឺកម្លាំងមន្ត្រីសាលាខណ្ឌច្បារអំពៅ សហការជាមួយអាជ្ញាធរតាមបណ្តាសង្កាត់ទាំង៨ ក្នុងមូលដ្ឋានខណ្ឌច្បារអំពៅ ចុះធ្វើអនាម័យតាមមាត់ច្រាំងទន្លេ និងតាមដងផ្លូវ ធ្វើយ៉ាងណាឲ្យអស់សំរាម ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរយើង ដែលនឹងប្រព្រឹត្តិធ្វើឡើងនៅថ្ងៃទី១៤.១៥.១៦ ខែមេសាខាងមុខនេះ។ ប៉ុន្តែនៅពេលដែលកម្លាំងអាជ្ញាធរយើងចុះធ្វើអនាម័យនោះ គឺមានកម្លាំងប្រជាពលរដ្ឋទាំងចាស់ទាំងក្មេង បាននាំគ្នាមកចូលរួមរើសសំរាមជាមួយដោយពួកគាត់អះអាងថា ធ្វើយ៉ាងណាឲ្យមូលដ្ឋានយើងបានស្អាត។
ទាក់ទិនទៅនឹងការធ្វើអនាម័យនេះដែរ លោក យ៉ិន វុធ ចៅសង្កាត់ច្បារអំពៅទី២ បានឲ្យកម្ពុជាថ្មីដឹងថា នៅចុងសប្ដាហ៍នេះ កម្លាំងរបស់លោកបានចុះធ្វើអនាម័យក្រោម និងគល់ស្ពានព្រះមុនីវង្សចាស់ថ្មី ពិសេសនៅតាមមាត់ច្រាំងទន្លេ។ ក្នុងពេលនោះដែរ ក៏មានការចូលរួមពីកម្លាំងប្រជាពលរដ្ឋក្បែរៗចំណុចមាត់ច្រាំងទន្លេមកជួយប្រមូលសំរាមជាមួយអាជ្ញាធរផងដែរ។
ក្នុងឱកាសនោះ លោក យ៉ិន វុធ បានសំណូមពរដល់ប្រជាពលរដ្ឋ សូមបញ្ឈប់ការយកសំរាមបោះចោលតាមដងផ្លូវ និងមាត់ច្រាំងទន្លេតទៅទៀត ព្រោះវាអាចប៉ះពាល់ដល់សុខភាព និងអាក្រក់មើលបំផុត។ ហើយការទុកដាក់សំរាម ត្រូវវេចខ្ចប់ឲ្យបានត្រឹមត្រូវ រង់ចាំរថយន្តប្រមូលសំរាមមកដឹកចាំយើងយកចេញពីផ្ទះទៅដាក់ក្នុងរថយន្ត ជៀសវាងយកទៅបោះចោលតាមដងផ្លូវ ឬមាត់ច្រាំងទន្លេឲ្យសោះ៕
Source: Kampuchea Thmey Daily
0 Comments