ត្បូងឃ្មុំ ៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភា និងលោកជំទាវ នាព្រឹកថ្ងៃទី៦មេសានេះ បានអញ្ជើញជាអធិបតីភាពដ៏ខ្ពស់ខ្ពស់ក្នុងពិធីបុណ្យឆ្លងឧបដ្ឋានសាលា និងសមិទ្ធផលនានា ក្នុងវត្តថ្មីសិរីសិក្ខារាម ហៅវត្តតាអាំ ស្ថិតនៅភូមិតាអាំ ឃុំកក់ ស្រុកពញាក្រែក ខេត្តត្បូងឃ្មុំ។
មានប្រសាសន៍សំណេះសំណាលទៅកាន់ប្រជាពលរដ្ឋក្នុងពិធីនោះ សម្ដេចអគ្គមហាពញាចក្រី ហេង សំរិន ប្រធានរដ្ឋសភា បានអំពាវនាវឲ្យបងប្អូនជនរួមជាតិមានការប្រុងប្រយ័ត្នខ្ពស់ចំពោះបញ្ហាសុខភាព ក្នុងរដូវក្តៅហួតហែងនេះ ពិសេសក្នុងពិធីបុណ្យចូលឆ្នាំថ្មីប្រពៃណីជាតិខាងមុខ ដើម្បីចូលរួមលើកកម្ពស់សុខុមាលភាពសង្គម តាមរយៈការ ថែរក្សាសុខភាព ដូចជាធ្វើអនាម័យខ្លួនប្រាណ ចំណីអាហារ ចូលរួមការពារជំងឺឆ្លង ក្នុងមូលដ្ឋានរបស់ខ្លួន។
ទន្ទឹមនេះ សម្ដេច បានក្រើនរំឭកចំពោះអាជ្ញាធរមូលដ្ឋាន ត្រូវរួមគ្នាធ្វើអន្តរាគមន៍ ឲ្យទាន់ពេលវេលា ដោះស្រាយបញ្ហាចំពោះមុខដូចជា គ្រោះធម្មជាតិមានគ្រោះរាំងស្ងួតជាដើម ធ្វើយ៉ាងណាជួយដោះស្រាយបញ្ហាទឹកជូនបងប្អូនប្រជាពលរដ្ឋ ដែលក្នុងនោះមានតំបន់ខ្លះបានចាប់ផ្តើមមានភ្លៀងធ្លាក់លាយឡំមកជាមួយខ្យល់កន្ត្រាក់ ដែលនាំឲ្យខូចខាតផ្ទះសម្បែងប្រជាជនយើងផងដែរ។ បញ្ហាមួយទៀតទាក់ទងនឹងបញ្ហាគ្រោះថ្នាក់ចរាចរណ៍ ដោយគ្រាន់តែក្នុងរយៈពេល៣ខែ ដើមឆ្នាំ២០១៩នេះមានអ្នកស្លាប់ជាង៥០០នាក់ទៅហើយ រួមនឹងមានអ្នករងរបួស និងខូចខាតមធ្យោបាយធ្វើដំណើរ ព្រមទាំងទ្រព្យសម្បត្តិផ្សេងៗជាច្រើនទៀតដ៏គួរឲ្យសោកស្ដាយបំផុត ដែលបញ្ហានេះសូមអ្នកប្រើប្រាស់ដងផ្លូវដោយមានការប្រុងប្រយ័ត្នខ្ពស់ទាំងអស់គ្នា ជាពិសេសក្នុងឱកាស នៃពិធីបុណ្យចូលឆ្នាំថ្មីប្រពៃណីជាតិនាពេលខាងមុខ មិនត្រូវបើកបរក្នុងស្ថានភាពស្រវឹង បើកបរដោយការធ្វេសប្រហែស និងបើកបរដោយការប្រមាថនោះទេ។ ទាក់ទងនឹងវិស័យព្រះពុទ្ធសាសនា សម្ដេចប្រធានរដ្ឋសភាបានបញ្ជាក់ថា យើងទាំងអស់គ្នានៅតែបន្តខិតខំប្រឹងប្រែងក្នុងការអភិវឌ្ឍន៍វិស័យព្រះពុទ្ធសាសនា ដើម្បីជាប្រយោជន៍ក្នុងការរួមចំណែក ពង្រឹងសាមគ្គីភាព ការលើកកម្ពស់វប្បធម៌ នៃការយោគយល់គ្នា ដោយយើងប្ដេជ្ញាបន្តការពារការគោរព និងលើកស្ទួយតម្លៃព្រះពុទ្ធសាសនាជាដរាប ធ្វើយ៉ាងណាឲ្យកម្លាំងដ៏មានឥទ្ធិពល នៃព្រះពុទ្ធសាសនាបន្តស្ថិតនៅ និងជ្រួតជ្រាបក្នុងក្រអៅបេះដូង នៃប្រជាជនខ្មែរ។ លើសពីនេះ យើងត្រូវរួមគ្នាលើកកម្ពស់តម្លៃសីលធម៌សង្គម គុណធម៌ វប្បធម៌ ប្រពៃណីទំនៀមទម្លាប់ដ៏ផូរផង់ និងសម្បូរបែបរបស់ខ្មែរយើងឲ្យបានល្អប្រសើរ និងស្ថិតស្ថេរគង់វង្សយូរអង្វែង។ យើងបានខិតខំធ្វើឲ្យវត្តអារាមក្លាយជាមជ្ឈមណ្ឌលជីវភាពខាងស្មារតី ដែលសកម្មចូលរួមការអភិវឌ្ឍសង្គមខាងផ្នែកវប្បធម៌ អប់រំ សង្គមកិច្ច និង សីលធម៌សង្គម ព្រមទាំងពង្រឹងសុខុដុមនីយកម្ម រវាងគ្រប់សាសនា រាំងស្កាត់ការធ្វើអាជីវកម្មលើសាសនា ប្រឆាំងការរើសអើង បែងចែកក្នុងចំណោមប្រជាជន ហើយថាជាការចាំបាច់ ណាស់ដែលត្រូវប្រែក្លាយសក្ដានុពលរបស់សាសនាទាំងអស់ ទៅជាកម្លាំងសាមគ្គីដ៏ខ្លាំងក្លាក្នុងការការពារសន្តិភាព ឯកភាពជាតិ និងជំរុញការអភិវឌ្ឍសង្គមសេដ្ឋកិច្ច។
សូមជម្រាបជូនថា វត្តថ្មីសិរីសិក្ខារាម ហៅវត្តតាអាំ ស្ថិតនៅភូមិតាអាំ ឃុំកក់ ស្រុកពញាក្រែក ខេត្តត្បូងឃ្មុំ ជាវត្តថ្មី កសាងឡើងកាលពីឆ្នាំ២០០៨ ក្រោមគំនិតផ្ដួចផ្ដើម និងការជួយឧបត្ថម្ភគាំទ្រដ៏ខ្ពង់ខ្ពស់របស់ សម្ដេចអគ្គមហាពញាចក្រី ហេង សំរិន និង លោកជំទាវ ហើយ ចំពោះឧបដ្ឋានសាលា រួមនឹងសមិទ្ធផលនានាក្នុងវត្ត ដែលបានធ្វើពិធីបុណ្យឆ្លងនាពេលនេះ មានតម្លៃជាង១សែនដុល្លារអាម៉េរិក ហើយក៏នៅមានសមិទ្ធផលចាំបាច់មួយចំនួនទៀតដូចជា ព្រះវិហារជាដើម ក៏នឹងត្រូវសាងសង់ឡើងជាបន្តបន្ទាប់ផងដែរ៕
Source: Kampuchea Thmey Daily
0 Comments