ទីក្រុង​ប៉េកាំង​សួរចម្លើយ​អ្នកនិពន្ធ​អំពី​ការសម្ងាត់​របស់​អូស្ត្រាលី

ប្រព័ន្ធ​ផ្សព្វផ្សាយ​ក្នុងស្រុក​បាន​រាយការណ៍​កាលពី​ថ្ងៃ​ចន្ទ​ថា ភ្នាក់ងារ​ក្រុង​ប៉េកាំង​បានដាក់​សម្ពាធ​អ្នកនិពន្ធ​កូនកាត់​ចិន​-​អូស្ត្រាលី​ពីរ​នាក់​ឲ្យ​ផ្តល់ព័ត៌មាន​អំពី​ការស៊ើបអង្កេត​សម្ងាត់​របស់​ទីក្រុង​កង់​បេ​រ៉ា​ចូលក្នុង​ការជ្រៀតជ្រែករ​បស់​ចិន​នៅក្នុង​នយោបាយ​ក្នុងស្រុក​។​

លោក Yang Jun ដែលជា​អ្នកនិពន្ធ​រឿង​ប្រលោមលោក​និង​ជា​អ្នកតស៊ូ​មតិ​ប្រជាធិបតេយ្យ​និង​លោក Feng Chongyi ដែលជា​សាស្ត្រាចារ្យ​នៅ​សកល​វិទ្យាល័យ​មាន​មូលដ្ឋាន​ក្នុង​ទីក្រុង​ស៊ីដនី​និង​ជា​អតីត​អ្នកកាសែត​គឺ​ត្រូវបាន​គេ​រាយការណ៍​ថា ត្រូវបាន​សួរចម្លើយ​អំពី​ការស៊ើបអង្កេត​សម្ងាត់​នេះ​។​
​អ្នក​ទាំងពីរ​គឺជា​មិត្តភក្តិ​របស់លោក John Garnaut ដែលជា​អតីត​អ្នកកាសែត​ម្នាក់​ដែល​កំពុង​ដឹកនាំ​ការស៊ើបអង្កេត​នេះ​។​

ទំនាក់ទំនង​រវាង​ប្រទេស​ទាំងពីរ​បាន​ជួបប្រទះ​ភាព​តានតឹង​ក្នុងពេល​ថ្មីៗ​នេះ​ដោយសារតែ​ការភ័យខ្លាច​នៃ​ការជ្រៀតជ្រែក​របស់​ចិន​ហើយ​ចំពេល​ទីក្រុង​ប៉េកាំង​បានបង្ហាញ​សាច់ដុំ​របស់ខ្លួន​នៅក្នុង​ប្រជុំ​កោះ​ប៉ាស៊ីហ្វិក​ដែល​ទីក្រុង​កង់​បេ​រ៉ា​ចាត់ទុកថា​ជា​បរិវេណ​របស់ខ្លួន​។​

ការស៊ើបអង្កេត​រួមគ្នា​មួយ​ដែល​ចេញផ្សាយ​កាលពី​ថ្ងៃ​ចន្ទ​ដោយ​កាសែត The Sydney Morning Herald, កាសែត The Age និង​ទូរទស្សន៍ ABC បាន​រកឃើញថា ប្រទេស​ចិន​បានធ្វើ​ប្រតិបត្តិការ​ស៊ើបការណ៍​សម្ងាត់​មួយ​ដើម្បី​ទទួលបាន​ព័ត៌មាន​លម្អិត​អំពី​ការស៊ើបអង្កេត​ដែល​ត្រូវបាន​បញ្ជា​ឲ្យ​ធ្វើឡើង​នៅក្នុង​ឆ្នាំ​២០១៦​ដោយ​អតីត​នាយករដ្ឋមន្ត្រី​លោក Malcolm Turnbull ។​

លោក Yang ដែលជា​ពលរដ្ឋ​អូស្ត្រាលី​មាន​រហស្សនាម​ថា Yang Hengjun គឺ​ត្រូវបាន​ឃាត់ខ្លួន​នៅក្នុង​ប្រទេស​ចិន​ចាប់តាំងពី​ការធ្វើដំណើរ​នៅ​ទីនោះ​កាលពី​ខែមករា​ដោយ​ត្រូវបាន​គេ​ចោទប្រកាន់ថា​បាន​បង្ក​គ្រោះថ្នាក់​ដល់​សន្តិសុខ​រដ្ឋ​។​

របាយការណ៍​កាលពី​ថ្ងៃ​ចន្ទ​គឺ​ស្របគ្នា​ជាមួយនឹង​ការ​អង្វរ​ករពី​ភរិយា​របស់លោក​ឲ្យ​ប្រទេស​អូស្ត្រាលី​ធ្វើ​បន្ថែមទៀត​ដើម្បី​ធានា​ការដោះលែង​គាត់​។​

របាយការណ៍​របស់ ABC បាន​និយាយថា ភ្នាក់ងារ​ចិន​ធ្លាប់បាន​ស្ទាក់ចាប់​និង​សួរចម្លើយ​លោក Yang នៅ​ទីក្រុង​ស៊ីដនី​ក្នុង​ឆ្នាំ​២០១៨​នៅពេលដែល​គាត់​កំពុងធ្វើដំណើរ​ទៅ​ជួប​លោក Garnaut ។​
​ចំណែក​លោក Feng ដែលជា​ពលរដ្ឋ​អូស្ត្រាលី​អចិន្ត្រៃយ៍​បាន​ប្រាប់ ABC ថា គាត់​ត្រូវបាន​សាកសួរ​អំពី​លោក Garnaut នៅពេលដែល​គាត់​ត្រូវបាន​ឃុំខ្លួន​រយៈពេល​ច្រើន​ថ្ងៃ​អំឡុងពេល​ធ្វើដំណើរ​ទៅកាន់​ប្រទេស​ចិន​ក្នុង​ឆ្នាំ​២០១៧​។​

លោក Feng និយាយថា “​ពួកគេ​ដឹង​ច្រើនណាស់​អំពី​លោក Garnaut ។ ក្នុងអំឡុងពេល​នៃ​ការសួរចម្លើយ ពួកគេ​មិនបាន​លាក់បាំង​ថា ពួកគេ​ខឹង​នឹង​គាត់​នោះទេ​”៕ AFP

​

Source: Kampuchea Thmey Daily